農曆新年將至，新年最佳節目就是入場睇戲支持香港電影。今年賀歲檔有多部電影選擇，當中由黃子華自編自導自演的電影《乜代宗師》，成為觀眾熱捧的賀歲片之一。戲中兩位女角劉心悠和周家怡，早前在尖沙嘴接受《蘋果》訪問，今次二人在戲中，以嶄新形象示人，多得黃子華所賜。好像外表柔弱的劉心悠，卻在戲中演好打得的女拳手，相反外表較男仔頭的周家怡，卻演柔情似水的淑女，跟二人本身性格反差甚大，亦令二人有不一樣的經歷。
尤其劉心悠要經歷半年時間的拳擊訓練，她說︰「我接觸呢套戲之前，我對拳擊嘅認識係零，導演要畀時間我去成長去訓練，主要係技巧方面，周身瘀都係小事，最難係訓練時要發出野獸嘅聲音，要大聲嗌令喉嚨會好痛，返到屋企要食喉糖，好彩無失聲。」最令她感辛苦，竟然是除bra一刻，她笑謂︰「好好笑，最辛苦返到屋企除sport bra時，訓練完隻手好攰，除到一半就『戟』住個頭，呢刻除定唔除好呢？不如唔沖涼，但咁都唔係辦法，坐喺床休息一陣先再除。」至於周家怡雖然不用打，但今次角色有別於以往，她說︰「我未做過呢啲角色，真係好唔同，大家睇咗畀啲評價。」
為何導演黃子華將二人角色對調？她們異口同聲說︰「其實我哋都好想知，不過都幾好玩。」劉心悠更說︰「對於一個演員係一件好過癮嘅事，唔係做你自己。」而戲中講述她們是情敵，周家怡便說︰「我對佢（心悠）好好，做情敵首要，就係先要對情敵好。」
問二人現實中能否接受老公或男友被分一半？劉心悠說︰「如果男仔鍾意對方多啲而唔係我，我會退出不會去爭。」周家怡則做出交叉手勢說︰「一多過一個就唔係真係愛，而家唔係清朝。」
其實心悠和家怡都未婚，問二人今次跟子華合作，有否發現對方的優點？將來擇偶會否以子華為標準？心悠笑謂︰「以我呢半年來嘅觀察，佢係一個好冷靜嘅人，畀到女仔安全感，係佢最大優點。」而家怡則謂︰「佢係一個好識照顧人嘅人，女仔係好鍾意男仔take care人，佢觀察好細微，係個好好嘅男人同男神，又聰明又叻。」二人還對今次合作表示不夠喉，望再有機會合作。
農曆年快到，二人過往有何習俗，或會否去求姻緣？劉心悠透露每年劉媽媽會為她求姻緣，並將求得來的東西貼在她衣服後方。不過在旁的周家怡笑謂︰「你同你媽媽講，咁多年喇，即係唔work」二人即哈哈大笑一番。至於家怡笑言連親友已開始避談，她謂︰「當你單身一段時間，覺得單身都幾好，連自己都呃埋自己，哈哈，咁就唔會去拜，隨遇而安。」
早前導演黃子華透露，今次他是賣樓來拍戲，心悠原來事前並不知，她說︰「每日掛住訓練完返屋企，我聽到覺得so sweet，我好珍惜同佢、同劇組相處嘅日子，大家好難得一齊去做一件事，我係好感動。」而家怡事前略知一二，她說︰「呢個導演真係好好，佢就算隻手骨裂，腫晒都唔去睇醫生，因為所有嘢一停會好麻煩，所以佢隻手腫晒都照拍。有場戲我仲拍落佢隻手度，睇到佢係為咗部戲奉獻好多，多謝子華畀呢個機會我。」
至於新一年的願望，劉心悠坦言過去一年感到好豐富，她說︰「完成咗我人生check list中幾個，如北極跑馬拉松、去非洲、又練成拳手，2019年都心想事成。」而家怡則宣佈有新動向，她說︰「我公佈吓先，簽咗英皇，希望嚟緊拍多啲戲，望有多啲發展，世界而家好似癲咗，又有火災，望回復平靜，唔好再有火災天災，我更希望啲人要覺醒就覺醒。」
來源 source: http://hk.entertainment.appledaily.com
|
鍾意就快D Share啦！
|
|
|
