身為無綫首席創意官嘅藝人王祖藍近日由內地回港，正接受隔離嘅佢日前就與馬來西亞女主持顏薇恩、潘毖伶開直播，唔少網友一見佢現身即重提其「慳啲啦Baby」及《老表，你好嘢！》「蔡芯」等經典角色，但佢卻自爆將會息影，再不作戲劇演出：「冇演出呢啲全部都係我嘅遺作。仲淨一套同阿Sa（蔡卓妍）兩年前拍嘅電影，到依家都未出街。做咗管理工作之後，我哋呢啲老人家都冇㗎啦，最緊要培育下一代，無謂阻住個地球轉。」而講到培育新血，佢就提起憑《聲夢傳奇》彈起嘅姚焯菲、鍾柔美等，指有意搞聲夢夏令營，發掘下一屆聲夢學員。
另外，有人提議可以將高層運作拍成真人騷，佢就笑言如果其他高層都同意拍攝就認真有睇頭：「咁多年TVB高層嘅謠傳係咪真？點雪藏一個人？我以前點被人雪藏？點樣加人工？點樣減騷錢？我終於知道點解，嗰啲拍出嚟真係好睇到不得了，但我真係接受唔到囉！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
