2014年7月31日 星期四

[壹週刊 1273] 泰國透視 發哥速成格仔餅 發哥,BKD_S,周潤發,M1,




拍完一個鏡頭,全身汗濕透身嘅發哥,白 tee下透現兩個月速成嘅格仔餅。

同你吟一吟

泰國透視 發哥速成格仔餅

行路行山,前後用咗兩年時間,靠對腳行到得番唔夠 150磅嘅發哥周潤發,因為答應王晶喺新戲《賭城風雲 2》剝衫,去泰國埋位前兩個月,每星期跟教練操肌個半鐘,加埋每日做二十分鐘腹部肌肉鍛鍊,終於將一幅過嘅腰腩,練成一嚿嚿格仔餅。

二五話戲中有場戲係顛覆版《激戰》,張家輝做師父,發哥上台打泰拳,純搞笑,所以發哥唔使練到有朱古力,格仔餅已經夠用。

練成腹肌,不過,導演又嫌發哥瘦得滯,要求佢增番幾磅,搞到發嫂日日帶住袋番薯同烚蛋去片場,俾發哥當零食。

喺曼谷郊區拍外景,朝朝○六通告,就算有警察幫忙開路,車程時間縮到一半,來回計都起碼兩個鐘,所以喺泰國埋位超過半個月,怕塞車嘅發哥都唔願出去外面搵嘢食,收工就閉關酒店。

直到上個禮拜三(七月二十三日),老闆于冬(博納)同黃栢高(太陽娛樂)去咗泰國探班,收工吹雞食飯,發哥發嫂塞咗個半鐘車,同張家輝仲有古天樂(《殺破狼 2》)一齊食咗餐,破晒戒!

收工前大合照,齊晒人獨欠王晶,發嫂嗌咪:「晶哥,快啲,我好熱呀!」講完自己笑到伏落劉偉強膊頭。

為咗減少塞車時間,開工收工都有騎警開路。

睇住兩部機,仲要分心玩鬥地主,王晶一心幾用。

劉偉強整到手,跟 set按摩師即場做嘢。

因為《爸爸去哪兒》走紅嘅四歲內地童星王詩齡,由媽咪揸機同發嫂合照,就連發哥都話要「靠晒佢」!又係喎,佢部處女作有七億票房,四歲人仔,家陣拍個廣告收 400萬人仔,按年齡計,貴過發哥、張家輝好多。

王詩齡俾國內網民插擺架子用替身,搞到王晶要公開幫口,呢場戲由泰國最紅童星,九歲嘅 Fha Sai(箭嘴)做替身,因為佢要午睡。

一身賭神 look嘅張家輝同原裝貨發哥過招,搞到晚晚冇覺好瞓。

老細(于冬、黃栢高)專登嚟泰國探班,發哥收工返酒店沖個涼,再塞個半鐘車同導演王晶、劉偉強、古天樂、張家輝一齊食晚飯。

發哥要 keep住磅數,發嫂帶埋番薯、烚蛋去現場俾老公食。

有「泰國最美變性人」之稱嘅 Poy,鏡頭前後,都絕對比女人更女人。

同張家輝拍一場匿喺榴槤車逃命戲,掛彩見紅嘅發哥講笑話自己食得太多榴槤,報應!

泰國拍外景,又熱又辛苦,一停機,第一時間飲水。

投資億五嘅《賭城 2》,演員陣容加碼,除咗發哥,仲有張家輝、余文樂,同埋去芭堤雅先有份埋位嘅劉嘉玲。



鍾意就快D Share啦!
Related Posts Plugin for WordPress, Blogger...