掃呢頁CODE去手機

2014年7月31日 星期四

[FACE 375] 肥妹發聲 打入《中國好聲音》 3 《巨聲》肥妹鄧小巧控訴大台涼薄 MF,




微博近日不斷發布上海遊山玩水相,小巧向本刊承認,《中國好聲音》全程正是在上海錄影。網上圖片

真面目

肥妹發聲 打入《中國好聲音》 3 《巨聲》肥妹鄧小巧控訴大台涼薄

冇樣冇後台,單靠實力想喺大台等發圍,傻的嗎?除非唔使開飯又預咗用十年青春白等。先旨聲明,等完十年唔擔保你變第二個鄭俊弘,仲等唔等好?

09年參加《巨聲》得第六名的鄧小巧,用行動證明唔等好過等,靜靜雞報名參加《中國好聲音》第三季,仲好爭氣咁過關斬將入咗 24強,等住本週五( 8月 1日)第三集節目出街全國響朵。

可以行出勇敢第一步,無非因為大台涼薄投閒置散足足四年,小巧今次巧威威呀!

月初有傳吳業坤亦有得入圍《中國好聲音》,不過遭無綫阻撓中途退賽,周一記者致電坤哥,至截稿前亦未得到回應。《忽然 1周》圖片

大台強項,離不開霸道、劇膠同抄襲。 09年見到強國、台灣歌唱比賽風行,人有佢有製作歌唱比賽《超級巨聲》,不過製作求其水準差人幾班,迴響自然差天共地,三屆巨聲幫,除咗林欣彤、許廷鏗、同肯削面的胡鴻鈞有碟出,其他賽後簽約歌手唔係淪為膠劇大茄就失晒蹤,包括首屆獲得第六名、有小林憶蓮之稱嘅肥妹鄧小巧。

陳奐仁推薦

好彩咋,原來全國熱話,剛播完第二集的《中國好聲音》第三季,香港代表唔止 Robynn and Kendy,仲有 25歲的鄧小巧。由海選打入第二圈復賽、再由複賽打入電視初賽,將於本週五( 8月 1日)第三集亮相的小巧,據悉一出聲就獲導師「轉凳」,已經成功打入 24強,將會同 Robynn and Kendy一樣歸於內地歌手楊坤旗下受訓繼續賽事。

週一記者致電求證,小巧亦不否認:「我唔方便講,因為簽咗保密協議。」原來,小巧今次由陳奐仁推薦比賽,由今年 4月開始,不停 send demo畀《中國好聲音》監製, send咗十幾首先有得面試呀!上星期第一次上台錄影,揀咗陳奕迅嘅一首國語舊歌,據聞反應好好。

第二集《中國好聲音》、首個香港歌唱單位 Robynn and Kendy亮相,不過明明出碟歌手自稱網路歌手, Robynn爺爺又係開國將軍葉劍英,網友熱議欠公平。網上圖片

據悉小巧同 Robynn and Kendy一樣被內地歌手楊坤收歸旗下,將會在餘下節目受訓再爭取下輪出線名額。網上圖片

變做佈景板

09年參加《超級巨聲》, 10年被安排主唱電視劇《天天天晴》主題曲〈半杯水〉,小巧自此以後的歌星路便停滯不前,唯一工作是與大班巨聲幫,被安排做節目佈景板排排企。

上屆《中國好聲音》,無綫都有安排六位巨聲面試,但就冇預鄧小巧,仲有藝員合約嘅小巧說︰「其實當時都幾心酸……可能覺得我冇唱片公司想簽啩……公司有提議我去拍劇,但我對演戲真係冇信心,最叻都係唱歌。」唔緊要啦,《超級巨聲》跳到《中國好聲音》已經好巴閉㗎喇!

教育學院畢業、暑假前正在小學教中文,小巧自爆來年沒有與小學續約:「因為未知比賽去到幾時,唔想耽誤學校同學生。」網上圖片

09年比賽完,小巧最受重用就係 10年主唱《天天天晴》主題曲〈半杯水〉,可惜從此以後無以為繼。

被無綫投閒致散當佈景板,小巧話:「佢哋其實都有俾嘢我做,係我要教書有時做唔到。」

《中國達人秀》肥妹 Kit:邊有公平?

網上圖片

強國歌唱比賽其實好多香港觀眾,《中國好聲音 3》播到第二集,去年參加《中國達人秀》被封為「中國 Adele」的港女張潔瑩,近日在 facebook公開爆粗示不滿,擺明係睇唔過眼 Robynn and Kendy。她對本刊說:「我唔理 Robynn爺爺係邊個,淨係講唱歌,就算呢個節目淨係用聲吸引評判轉身, Robynn and Kendy都喺香港有唱片公司、出過碟、開過演唱會。有一班專業人仕去照顧佢哋形象、佢哋嘅 demo肯定好 quality過我哋平民多多聲,最緊要係上台、面對觀眾唱歌,一出聲就有經驗有台型過普通人,咁叫公平咩?不過咁,我去內地參賽聽過一句說話,『沒有比賽,只有節目』,電視台睇得最重係節目效果,一定唔係實力,冇公平而言。」

靠大台不如靠自己

等大台俾機會,等得嚟都蚊瞓。所以已經有一班有見地又肯實幹的巨聲寧願靠自己。

巨聲二幫陳國峰

去年拍住無綫監製及巨聲吳業坤齊齊在佐敦開麵店賣日式拉麵,一年內已經回本,上月在西環開分店。

《忽然 1周》圖片

巨聲一幫劉威煌

開完音樂學校做校長後,去年九月再同周志文、周志康兄弟夾份,在油塘開設實景遊戲《異類教育》。

網上圖片

巨聲三幫譚嘉儀

翻唱舊歌擺上網,再加彈得一手好琴、好結他,閒閒哋一條片點擊廿幾萬,收視分分鐘高過《勁歌》。

給巨聲一條生路

以下呢班巨聲唔係冇得撈,不過身懷絕技仲有睇頭過唱歌,《 FACE》建議不防轉行或者撈多瓣。

胡鴻鈞招牌刀削麵

唔係人人知佢唱過咩歌,但係就一定全香港都知佢「削骨還父」孝行,胡鴻鈞如果可以豁出去賣刀削麵,做「削神」機會大過做「歌神」。

林師傑出書救毒男

早排林師傑背住正印有米女友鄧穎芝多次偷食,成件事最大興趣位肯定係其貌不揚的林師傑點解可以咁多選擇。一於出書教搵食啦,全港毒男等你打救!

Purple嬸嬸後繼有紫慧

何紫慧無論五官、造型同氣質都同唱作兒歌天后李紫昕有幾分相似,個名仲一樣有個紫字添!偶像派凍過水,不如向班兒童埋手,好彩仲可以做埋 Dr.Kong代言添!



鍾意就快D Share啦!