[FACE 375] 影帝教路 秋生數爆膠劇 4宗罪 秋生,黃秋生,MF,

真面目

影帝教路　秋生數爆膠劇 4宗罪

影帝黃秋生出名寸咀，話知你個台有幾大都係有嗰句講嗰句，最近俾大台重金禮聘為新劇《梟雄》坐陣，請得秋生，預咗要硬食一籮籮要求，而對住大台一貫求其工廠式作風，秋生自然晨早忍唔住要開炮狂轟大台劇本是但兼低智對白，擺明唔收貨之餘仲話啲對白令佢無法投入角色，搞到影帝要親自操刀撈埋編劇嗰份。

唔只劇本，仲有對服裝、出埠住宿甚至少年版人選都有要求，秋生哥話：「我對工作有責任，想將件事做得更好。」你想做得好，但大台未必配合到囉！

唔滿意馬明

身為影帝嘅 52歲黃秋生，原來對於劇中飾演自己少年版嘅馬國明都有不滿。雖然馬明同秋生唔會有同場對手戲，但細秋生 12年嘅馬明要做少年版都幾愁，佢試過專登入廠觀摩影帝做戲同留意佢啲小動作，不過影帝秋生卻贈佢兩句都費事。對於馬明好學，秋生竟然話：「真係唔識講！」大台力捧男一都唔俾面。

出 trip要住好

《梟雄》依足秋生要求，九月會移師上海車敦影視城進行外景拍攝 2個月，不過大台劇組出名慳得就慳，按慣例安排大家住啲 80至 100人仔一晚嘅 2星賓館，但身為影帝嘅秋生講明唔會入住，仲同監製王心慰講：「拍完咁辛苦，瞓都瞓唔好，點拍呀！」於是自己訂咗另一間四星舒適酒店，仲話會將單據畀番劇組找數。

網上圖片

網上圖片

戲服似公公

照咁睇，秋生件戲服又真係好似件獸醫袍喎！網上圖片

唔只劇本出事，就連劇中戲服都一樣出現問題，原本秋生飾演上海大亨角色所穿嘅霸氣服裝，大台竟然求其用一件白色長袍了事，事後秋生大彈件衫同獸醫袍根本無異，之後又話造型似「公公」，燒埋服裝阿姐嗰份。

對白唔順眼

黎耀祥係視帝又係男二，不過對住影帝黃秋生相信佢都唔敢鬆懈。網上圖片

秋生出名要求嚴謹，對住啲師奶劇本梗係唔順眼，直指劇本無助投入角色，最後要親自出馬改埋對白，甚至連對手嘅對白都改埋一份，早前出席活動時仲大方承認：「將對白改到合理，可能寫手太年輕，好多人生處境未經歷，文句組織有少許混亂。」寫得出嘅都走晒

邊個做𡃁版秋生先啱？

賭王何鴻燊後生嗰陣同黃秋生後生時餅印似到足，最佳人選非賭王莫屬不過可能要掉轉做秋生年老版喎！

香港電視藝人麥子樂，未轉會前喺大台經常客串不同細佬，更係御用𡃁版林峯！咁有經驗，唔驚畀秋生彈

吳嘉龍同黃秋生同樣都係中、英混血兒，兩個個樣都鬼鬼哋，由佢飾演年輕版都係唔錯人選。

黃秋生同小豬羅志祥有過牙齒印，所以如果由小豬來飾演秋生嘅年輕版，相信一定有好多網民爭住睇。

出櫃何韻詩，同秋生一向有偈傾，加上個樣咁 man，扮男人啱晒！

黃秋生大仔黃一一，話晒虎父無犬子，由囝囝嚟做自己年輕版最好不過啦。

鍾意就快D Share啦！

下一篇 》