Sammi辭演，古仔碌人情咭搵另一位緋聞女友楊千嬅補上。
探熱針
Sammi怕老公避古仔 楊千嬅執手尾
古天樂有份出錢投資的電影《 5個小孩的校長》，搵來合作無間的陳木勝監製、關信輝執導，自己友班底，女主角人選，古仔更鎖定與他做過無數次熒幕情侶的 Sammi鄭秀文，對方原本一口答應，直到電影開拍前一個月，擔心陳年緋聞再次成為坊間熱話，撻着「老公」許志安醋意的 Sammi才決定辭演，最終由同樣與古仔傳過緋聞的楊千嬅執手尾。
吳鎮宇吸引
電影公司早於二月為《 5個小孩的校長》公開招聘童星時，通告上已寫明女主角是 Sammi。據知，當初收到劇本， Sammi對由真人真事改編的《 5個小孩的校長》相當有興趣，並馬上騰出四月至七月的檔期，隨時開工；同一時間，鄒凱光亦不斷游說她接拍《衝上雲霄》電影版，左秤右秤後， Sammi最終選擇後者。
「 Sammi好鍾意《 5個小孩》個劇本，好多細節嘢都傾好晒，點知《衝上雲霄》嗰邊又話想搵佢，以新鮮感嚟講，拍吳鎮宇火花一定多過同古仔，同埋《衝上》群戲多， Sammi唔使咁大壓力，可以留番多啲時間準備年尾個唱。」知情者說。
怕翻炒緋聞
《 5個小孩的校長》故事以「四千五百元月薪校長」呂麗虹的真人真事做藍本，身為校長的她，要兼任教書、行政及清潔雜務，出錢出力保住僅得五個學生的學校，至於出錢埋班的古仔，在戲中飾演與女校長結婚十多年的丈夫。
「套戲真係有好大發揮， Sammi私底下都有問安仔意見，究竟接邊套好，點知安仔揀咗《衝上》。之前 Sammi同古仔拍《高海拔之戀 II》，又俾傳媒再翻炒緋聞，但當時佢未同安仔正式復合，而家情況唔同， Sammi點都要尊重安仔意願。」
開拍前一個月才辭演，要搵人頂替 Sammi的校長角色，古仔唯有碌人情咭，搵已為人母的楊千嬅幫手，難得千嬅唔介意，即使撞正新專輯宣傳期，仍一樣捱義氣，執手尾。
曬傷手臂
早前，劇組一連兩日在元朗大棠荔枝園開工，同場還有劉玉翠、吳耀漢等人，電影公司老闆林小強更專程前往探班，臨時受命的女主角楊千嬅，試完位便急不及待拉住一班小演員練對白，又準備定朱古力餅氹小朋友。
是日拍攝千嬅與家長帶學生到郊外旅行，在三十五度高溫下埋位，要玩傳氣球又要跑草地，未有做好防曬的千嬅，雙手曬到紅卜卜，大汗疊細汗，一停機，便攞住風扇降溫，化妝師在旁要不停補妝。
現場所見，已為人母的千嬅甚受小演員歡迎，不時拉住拍照、傾偈，照顧囝囝 Torres兩年經驗，大派用場。
易角風雲
電影男女主角卡士夠分量，是吸引投資者的關鍵，但一日未簽約，都有變數，開拍前易角，家常便飯。
《雪花秘扇》
10年，有傳章子怡擔正荷李活電影《雪花秘扇》女主角，最後因為《一代宗師》遲遲拍唔完，被迫放棄，角色改由李冰冰頂上。
|
鍾意就快D Share啦！
|
|
|
