豪語錄
開夜店 講耶穌 孫耀威
咪睇孫耀威官仔骨骨，又是虔誠基督徒，有時他的說話及想法，都幾令人意想不到。
跟女友陳美詩要婚前禁慾，他唔尷尬同你講，「一開始比較辛苦，久了就還好。如果結婚了，就會覺得結婚『好爽』！」女友著 deep V裙露事業線，他又搞笑話︰「手機冇地方擺時可以攝入去！」今個月初，他又失驚無神在 MV中跟索女激嘴肉搏，更請記者來直擊觀戰。「做音樂都係想有知音，拍 MV都想有人睇。首歌講偷食，身為 Christian，我更加要入去呢啲黑暗位，將訊息帶出來令人反省！」他說得理直氣壯，面不紅耳不赤。
所以，他在上海及台灣開夜場，不是為賺錢，或有個私家鐵竇溝女，而是身負重任用來傳福音。「大家都話我傻，又話教徒唔應該講性，但我哋唔係活在歡樂天地，我想俾大家知，出來蒲不一定有毒品，玩一夜情。人家門前拜關公，我就放一篇主禱文。」
無獨有偶，借來的餐廳，竟然有幅牆掛滿印有引死人肉女圖案的 Tee，又幾配合今次的主題，唔通又是神的指示？
香港無巨星
孫耀威夠膽談情說性未算勁，最令人印象深刻是他夠膽鬧無綫。事緣三年前，他女友陳美詩（ Macy）到日本沖繩為無綫拍攝旅遊節目時發生意外，連人帶車滑落山坡，護女心切的他，夠膽開口鬧無綫刻薄，更打電話搵陳志雲投訴。
「唔滿意就講啦，人命喎，理得你係英女皇。我希望香港娛樂圈唔好再 deteriorate，以前粒粒都係 super star，但目前變咗 local star，（公司）想捧藝人上天，但人工就只係夠搭巴士，仲邊夠錢買化妝品買衫？做乜要佢哋人格分裂，喂，明星全部講包裝，唔該。
「我好慶幸早廿年出道，賺咗第一桶金唔會餓死，但新一輩藝人又點？有幾多個阿 G.E.M.（鄧紫棋）可以上《我是歌手》？一個咁優秀的歌手，點解仲要寫衰佢？陳奕迅唱得咁好，可否唔好寫他咁多花邊新聞？其實大家要幫忙而不是踩低，我覺得好
心寒。」
四十一歲的孫耀威，其實九十年代時都好威水，高才生以 5A入中大電腦系，十九歲代表大學參加台灣舉辦的大學生音樂比賽，被當地公司睇中，是鮮有能征服台灣再紅返香港的港星。最紅時，一張碟閒閒哋賣幾十萬張，大陸劇收十萬元一集，看雜誌見到一百萬元的車，他翌日就買。
廿年過去，今時今日看到本地娛樂圈一潭死水，孫耀威非常無奈，「做歌手愈來愈少平台宣傳音樂，出廣東碟更加唔好想賺錢，但廣東歌是香港人的核心價值，無廣東歌，香港就真係好慘，等於無港式奶茶、西多士、蛋撻，到時就真正係玩完。」
明知山有虎，偏要去露營，現時的孫耀威當然到賺錢買花戴的境界，「我監製自己的唱片無收監製費，寧願將錢用來拉多一組小提琴，搵美國邊個邊個替我做 mix，我同唱片公司老闆講，願意倒貼來做多一首歌。」
上帝旨意
世界從來都是有錢有 say，所以他決定自掏腰包講道理。「我好少同記者講開夜場的原因，我真係想有個地方傳福音，將光帶入黑暗。」
講笑咋啩？孫耀威都明白，這個使命感實在令人難以相信，唔好理，又真讓他成功。他自稱開張半年已成功踢人入會，「做工程的裝修師傅、經理都跟我返教堂。當我講出開夜場的目的，又放埋主禱文，慢慢跟他們 speaking the same language，啱嘴型嘞，佢哋自然會聽你講。」
他講得頭頭是道，似乎是經驗之談，「係得中國人的酒吧先有人在門前嘔，外國人玩得好靚好有型，我拿這個荷李活品牌做生意，是想將一個高尚的文化帶到亞洲。我跟荷李活明星去玩，佢哋在夜場會 behave自己。
「當然佢哋有好多唔見得光的嘢，但夜場唔等於黑社會，唔等於毒品、濫交，你睇我點玩就知。我哋有好正的音樂，同靚人飲靚酒，入到來好健康的，你想要嗰啲， Sorry，我哋無。」然後他拿出手機，將不同大陸明星捧場的合照晒冷，非常硬銷，「 Baby上星期先嚟過。」
孫耀威說，夜店是他跟另一教友合作搞，起初大家心大心細，最怕未打救世人，自己已把持不住誘惑先落地獄，當時兩個大男人即時放下酒杯，在酒吧合十祈禱求指引，點知怪事就此出現。
「朋友同上帝講，希望得到更多肯定，否則就閂晒我所有門，讓我打消念頭避免碰釘。隔咗一陣，有個素未謀面的男人，主動走來跟我講，他在加拿大是傳道，又是擲飛鏢的教練。他話為傳道，幾不情願都到酒吧教𡃁仔擲鏢，然後手指住我，叫我學佢，將一點光帶入黑暗。嘩，我同朋友即時起晒雞皮，心諗使唔使咁快呀。」
無限艷福
夜場開了，孫耀威找來女公關、辣妹駐場，自己更落場玩制服派對，仲唔係方便搵食？入行廿年的老孫，亦懶得再左閃右避，這刻氣定神閒跟我分析，「我做呢行日日都有無限咁多個靚女，仲要非常主動，千方百計想埋我身，你話我心裡有沒有出軌？我細個同依家一樣血氣方剛，要放縱真係好易，但見到呢種情況，我會九秒九走佬。」
搵鬼信咩？我半信半疑，他又繼續補充：「就算我有心動感覺，但想到隨時被人偷影，可能被人寫衰，更可能搞大對方個肚，想到背後有大堆衰問題，恍如一盆冷水兜頭淋，咋！跟住我跟自己說，算罷啦，你玩唔起。」
大家唔信唔緊要，總之孫耀威女友陳美詩 buy就是，說到肉搏 MV其實是女友出的主意，他更沾沾自喜，「探班的報導出街，她比我更興奮，所以話她不是好保守的女友，見到我可以同人錫，佢都好羨慕，話想自己都有呢種機會，哈哈。」
原來攞正牌攬女，難怪他倆能拍拖五年，「我以前都幾大男人。喂，我做呢行，你預咗我有緋聞、演戲會有親熱同床戲，你接受唔到就唔好一齊。同 Macy後，我才明白做好男友，還有一大段距離。」
縱橫情場多年，孫耀威肯公開女友身份近乎零，但死口唔認實為拍拖的，有跟他合作拍台劇《懷玉公主》的台灣女星鄭家榆、應采兒及楊秀惠。
「不同年紀有不同價值觀，以前唔想被人寫我跟誰誰誰搭上，好難聽啫，加上每次媽咪會非常認真去問我，令屋企人擔心就唔好。男仔多女友就多情，女仔多男友，始終像白紙上有污點，我都要顧及對方形象。」
能讓孫耀威公開正印身份，我猜陳美詩應該好忍得。
|
鍾意就快D Share啦！
|
|
|
