爆壹爆
崩牙駒摩頂平手拖手
真係估你唔到，世仇都可變老友。話說呢個星期日（七月廿七日）崩牙駒六十大壽，佢喺澳門君悅酒店筵開一百二十席，爆哥都收到請帖，咁當然要去賀一賀啦。話說當晚氣氛熱鬧，崩牙駒例牌興奮高歌，但當晚重頭戲，竟然係崩牙駒嘅死敵「摩頂平」踩場！好多年輕一輩唔知，兩個人係多年死敵，廿五年前，傳聞崩牙駒喺一單謀殺案，曾以證人身份頂證摩頂平，搞到摩頂平著草他鄉廿年，四年前才回到濠江，照計摩頂平理應憎崩牙駒憎到入骨啩，當時仲傳佢返來係為復仇。
點知爆哥當晚見到摩頂平在場飲到啤啤夫，仲要兩個大漢攙扶，當崩牙駒上台獻唱嗰陣，摩頂平突然衝上台，爆哥即刻打醒精神攞出手機，以為會爆大鑊啦，點知原來摩頂平想攞咪唱歌，仲同崩牙駒、澳門「大家姐」司徒玉蓮、九江街 14K話事人「立章」合唱《有誰共鳴》。最震撼係摩頂平唱歌時拖實崩牙駒，又嚟江湖式豪邁擁抱，大家姐睇到眼濕濕。真係時代變，依家澳門搞賭廳都係搵錢至上，鬥氣仇殺冇着數，乜嘢新仇舊怨都一筆勾銷啦。
女星淫照鼻祖搵食招
呢排最紅當然係馬賽，爆哥同警界老友飲開茶時， CID黃 sir突然爆料，馬賽嘅艷舞片同陳冠希嘅淫照，都比不上當年鼻祖級女星殺手錢志明嘅「作品」。黃 sir指受害女星眾多，當然唔只上庭嘅 A、 B、 C、 D、 E及 X六位女證人咁少啦，最令佢傷心係，佢竟然睇到幾位電視及電影玉女偶像在相簿內出現。調查期間，黃 sir曾經問過錢生，用乜嘢手法冒充有錢人，錢當時輕描淡寫咁講：「唓，唔係好難啫，只要去高級食肆食嘢時，有理無理，見人就派大手筆貼士。普通人俾十蚊，我就俾夠一百至五百，個樣仲好似唔志在咁，自自然然有人唱你係有錢佬，之後嘅嘢就容易搞啦。」
另外，錢還向黃 sir呻，食盡咁多女星，唯獨當時嘅金牌經理人手上幾件女星食唔到，原來唔係嗰幾位女星清高，而係金牌經理人堅持要先收錢，女星才送「外賣」，錢唯有打其他女星主意，事成後他不但白食，仲利用裸照反過來勒索眾女星，錢最終於 91年被判入獄 3年 11個月。
賭船大亨追老星
爆哥有時都會去舊式夜總會跳老舞，好多𡃁仔唔明，點解班大哥唔去蘭桂坊溝𡃁模，鍾意同嬸嬸級夜總會公關 gathering。原來江湖大哥都做過𡃁仔，都有那些年追唔到的女神，一直係心願。
早排同 14K賭船大亨番薯鑑食飯，佢好得戚咁話，終於約到恨咗半世人，好正好正嘅女神食飯，講的時候，神情似足一個買到絕版古董 LEGO的宅男，或者張智霖買到林寶堅尼個冧樣。爆哥都未趕得切開聲，佢手下班𡃁已經七嘴八舌，猛問係邊個𡃁模，「女神喎，一定係周秀娜啦，大佬好嘢！」、「我話係心穎 BB，天使面孔，魔鬼身材，大佬有眼光呀。」
說時遲，那時快，番薯鑑的手機響起， Note 3上面張來電相片，竟然係一位超級熟女、曾經嫁入豪門的息影花旦，呢位花旦後生時風情萬種，仲憑電影《金大班的最後一夜》走紅，當年擅長做顛倒眾生的角色，即使個女結咗婚，佢依然風韻猶存。咁反高潮，班八十後𡃁仔都 O晒嘴，但番薯鑑就笑瞇瞇，正所謂品味呢家嘢，𡃁仔識咩呀。
|
鍾意就快D Share啦！
|
|
|
