屋漏偏逢連夜雨，啟晴邨槍殺一案疑兇原來係 Liddy父親，扶完靈盡孝道後，有傳 Liddy一直匿喺大陸，行蹤成謎。《蘋果日報》圖片
真面目
咁都肯拍 美化慘案 護女開槍 Liddy為錢出賣家事
背住李心潔偷食𡃁模李悅彤（ Liddy）嘅彭順，死𦧲爛𦧲終於氹番老婆，李心潔亦復工，拍王維基網台重頭劇《風雲》。
至於 Liddy行蹤依舊神秘，不過有線即將開拍的新節目《大凶捕》中，梁思浩就話搵咗 Liddy重演啟晴邨槍殺案，擺明車馬抽水，竟將原本嘅慘案，改成父親護女而殺人嘅溫情版本。節目將於 11月 8日出街，梁思浩仲話現階段只差 Liddy嘅答覆，不過成事的話， Liddy就變相為錢而出賣家事，繼孭上「小三」罪名後，又加條多「不孝」罪名喎！
Liddy自孭上「小三」罪名，同時被揭父親就係啟程邨槍殺案主角，心情雙重打擊下，搞到要返大陸避風頭。
「酬勞唔會待薄！」
有線將開拍的《大凶捕》標榜香港奇案，啟晴邨槍殺案就係其中一單元，為搶收視，角色人選都係精心挑選，好似 Liddy主演，廖啟智演其父親角色，連「殘厠 gathering」主人翁 Coffee都有份演一角，未開拍已經成功引來話題。萬事俱備，只欠東風，梁思浩回覆本刊說：「一路用短訊同 Liddy聯絡，佢有開條件，我都將佢要求傳咗畀有線高層決定。」而監製嘉華表示：「劇組暫時 mark咗 Liddy 4日拍攝時間，酬勞都唔會待薄佢，𠵱家等緊回覆，預計 8月尾開鏡。智叔就係因為睇完故事大綱覺得角色吸引而答應演出，到時仲會有突破性演出。」
Coffee：未睇劇本
而 Coffee承認有人搵佢參演，但就冇同 Liddy聯絡過，她說︰「我未肯定接唔接，亦未睇過劇本，只知道要拍 5日。」
自家中發生慘劇後， Liddy減少網上活動，除之前悼念父親外，最近只因為馬航事件出 post抒發感受，心情逐漸回復平穩。 Liddy會否出演啟程邨槍殺案一角仍係未知之數，不過孝字當頭， Liddy今鋪真係要三思而後行𠵱家慘劇變溫情小品，被殺者家屬澄清過受害者從不看娛樂新聞，絕冇可能因提及 Liddy被殺，好唔尊重喎！
案件一
原：啟晴邨槍殺案
啟晴邨槍殺案主人翁李德仁，先係樂晴樓 21樓公用走廊，槍殺居民廖啓忠，之後被居民認出後，被重重包圍的李德仁一度與警方駁火，最後吞槍自殺。
新：溫情父女劇
故事講一個位愛錫女兒嘅好爸爸，為咗保護個女而去殺人。
案件二
1980年發生嘅荔景邨情殺案都係《大凶捕》其中一個單元，而陳彥行同有線主播劉明軒，將分別飾演案中被殺的姊妹花，故事大綱大致上與真實故事相同。
案件三
上年初轟動一時嘅藍可兒事件，亦成為《大凶捕》其中一單元的藍本，故事都有所修改，講述王喜飾演電影導演鋪排一單完美殺人事件，而鍾慧冰個女林靜莉（最新星二代喎！）就飾演藍可兒角色。
案件四
上年 11月係九龍城發生的女嬰疑似被大陸男女擄走，實情係案中媽媽殺完親生女後自編自導自演嘅慘案，由周家怡（由港視過檔咗！）扮演媽媽一角，男主角係轉行賣雞嘅李雨陽（都係港視人喎！），不過就變成亡嬰報仇嘅情節。
|
鍾意就快D Share啦！
|
