掃呢頁CODE去手機

2014年7月31日 星期四

[壹週刊 1273] 同索女摸黑談情 伍允龍背鍾嘉欣偷食 伍允龍,鍾嘉欣,M1,




探熱針

同索女摸黑談情 伍允龍背鍾嘉欣偷食

鍾嘉欣同伍允龍拍拖七年,情侶關係近年愈來愈公開,不過,女友日日趕拍電視劇《華麗轉身》,冇人管的伍允龍伺機私會過氣藝人短褲索女關之彤,兩人先到中環撐枱腳,再到海邊摸黑談心,更一杯啤酒兩份飲,關係非比尋常。

做晒男主人

雖然把口堅持唔認拍拖,但近年鍾嘉欣與伍允龍的一舉一動,已將戀人關係半公開。去年底,女友舉行音樂會,伍允龍以另一半姿態現身,完騷後更不避嫌入後台探班公開合照,以行動宣示主權。

今年四月,鍾嘉欣生日,伍允龍又以男主人身份,在生日 party中招呼朋友,離開時,他更興奮得向在外守候的記者,展示勝利手勢。

但情侶拍拖,最忌七年之癢。近日忙於同汪明荃、劉松仁及方力申拍攝新劇《華麗轉身》的鍾嘉欣,朝早外景夜接廠景,每日休息瞓覺時間都無;至於伍允龍,雖然有份參演電影《迷城》,但戲份不多,加上不用陪女友「交人」,變相有大把「私人時間」。

對於男友偷食,鍾嘉欣在電話回應:「我都唔知你講緊乜嘢,我淨係知 Philip(伍允龍)成日都有好多朋友,如果係朋友有呢啲行為(一杯啤酒兩份飲)都好正常,我自己都會同朋友影吓相咁」

伍允龍同索女撐枱腳足足兩個鐘,其間索女更不時向伍允龍放電。



兩人情到濃時,更一齊玩自拍。



伍允龍買了杯啤酒,先俾女伴飲啖,然後自己再飲。

兩人在海邊漫步,更停低企埋一邊談心,相當之浪漫。

撐足兩個鐘

樂得清閒,早兩個禮拜(七月十五日),伍允龍約了個短褲索女同到中環撐枱腳,化了個淡妝的索女有幾分似女神陳妍希,無論外貌身形,都不遜於人稱 BB的鍾嘉欣,原來此人是過氣奀星關之彤,是徐楓契女,近年已轉行做生意。

當晚二人在怡和大廈的潮江春食飯,由於正值七點半晚飯黃金時間,被安排坐近門口位的伍允龍被其他食客認出是鍾嘉欣男友,只見他露出尷尬神色,不時低頭迴避他人目光。

成餐飯,兩人大部分時間以英語對話,索女更不時含春甜笑望實伍允龍。叫得三碟餸,但食足兩個鐘,幾近十點才捨得埋單。



伍允龍相當識食,新女樣子甜美,身材好,同鍾嘉欣一樣鍾意著短褲,不過膝頭沒有出現雙

嬰臉。

去年底伍允龍以男友身份出席鍾嘉欣處女音樂會,事後更將合照發放,宣示主權。



今年嘉欣生日,伍允龍都有出現,更幫手招呼賓客。

其實嘉欣之前都有同其他男人傳過緋聞,好似去年就同陳展鵬傳出戲假情真,之前又被撞破同做律師的李傲寰同車到赤柱。

啤酒兩份飲

食飽飯,兩人慢行去中環碼頭方向,附近一帶人少,伍允龍和索女像拍拖情侶般,不時打情罵俏,又玩紅綠燈掣。去到碼頭,二人對海談心,又攞出手機玩自拍。

傾到口水乾,行去小食店買飲品,明明一人一杯,但伍允龍卻將自己杯啤酒遞給索女飲啖,然後自己再飲,唔怕飲對方口水尾,態度親暱,有景轟!

好易出事

演員工作無定時,圈中拖友要面對聚少離多問題,加上外間誘惑多,稍為把持不定,偷食出軌,好易出事。

朱慧敏  Eddie

與 IT界億萬男友分手後,朱慧敏 12年搭上 EO2成員 Eddie(彭懷安),當朱慧敏日夜顛倒拍處境劇《愛•回家》時, Eddie卻趁機「搵食」,偷與長腿嫩口妹 Crush Chan在中環夜蒲斷正,二人又攬又錫,非常煙韌。

蔡依林 錦榮

台灣天后蔡依林( Jolin)與男模錦榮愛得火熱,但男方有鋪偷食癮,每次 Jolin出埠工作,錦榮例牌作反,被踢爆與周秀娜師妹 Hidy同遊泰國,又背住 Jolin暗撻台灣女星賴佩霞女兒謝沛恩,二人通宵夜蒲,當街打情罵俏。

江美儀 吳君祥

與吳君如胞弟吳君祥( Vincent)拍拖八年兼同居,男方被指經常趁女友通宵開劇出外偷食; 12年,江美儀飛巴黎拍《衝上雲霄 II》,吳君祥約會嚴淑明到一間意大利餐廳撐枱腳,更公然餵女方食嘢。今年五月,吳君祥再次斷正,與一名貌似林珊珊的北方佳麗到中環對食。

周秀娜 陳偉成

出名花弗的陳偉成( Avis)趁娜姐出埠工作,偷搭 19歲𡃁模羅彩玲( Vivian),仲帶埋返屋企影床照,娜姐忍無可忍,結束六年情。



鍾意就快D Share啦!