掃呢頁CODE去手機

2015年7月2日 星期四

一線阿哥 拒做宣傳 劉愷威當大台冇到 [壹週刊 - 1321] 劉愷威,M1,



唔憂做的劉愷威,同一時間在中、港、台三地有四劇出街,為免得失任何一方,拒絕出席所有宣傳,包括《風雲天地》,大台一樣冇面俾。

探熱針

一線阿哥 拒做宣傳 劉愷威當大台冇到

同國產一線花旦老婆楊冪志趣相投,久不久就執吓個樣嘅劉愷威,上月再度入市,夫婦聯名買入西半山寶城大廈一個二千四百呎連車位單位,市值 5,980萬;連同一二年以 3,000萬買入的中半山蔚皇居,物業資產接近一億。

樓債不輕,但同楊冪婚後身價有升無跌,劉愷威劇接劇,正在橫店拍新劇《寂寞空庭春欲晚》的他,同時間有四個劇在中、港、台三地播,包括大台八點半黃金時段的《風雲天地》,搵錢行先,分身不暇的劉愷威,拒絕出席大台所有宣傳活動,話之你!

同楊冪結婚後,劉愷威的身價有升冇跌。

中港合拍劇《風雲天地》被網民插爆膠味濃,劇情同主角的面口一樣膠。

劉愷威正身在橫店拍攝新劇《寂寞空庭春欲晚》,劇中做男一的他剃頭飾演康熙。

王晶都冇符

合拍劇向來不受香港觀眾歡迎,由○七年的《歲月風雲》到一○年的《摘星之旅》,即使有一哥林峯、一姐佘詩曼撐實,收視都是差強人意;而劉愷威衣錦還鄉擔正的《風雲天地》更加破紀錄,播出兩集已被指演員、配音和劇情同樣膠!有網民更笑稱:「幾乎可以從熒光幕聞到 Botox味!」插爆!

同馬雲旗下阿里巴巴合作拍劇在即,大台高層以《風雲天地》試水溫,但見《武則天》收視有升無跌(過去三星期平均收視接近三十點),為免《風》劇收視太樣衰,惹來廣告商詐型,大台特別安排連串宣傳,力挽狂瀾。

明知男主角劉愷威不是自己親生仔,又長期留守國內,大台主動提早個多月同對方攞期,甚至搵埋該劇監製王晶幫手,希望劉愷威配合做宣傳,但最後得到的回覆是「拍劇太忙,一個宣傳都不能出席。」推得一乾二淨。

「劉愷威嗰邊話同一時間喺中、港、台有四套劇上緊,喺橫店拍緊嗰套做男一,要日日開工,如果攞假落嚟做宣傳,其他三套劇一定嘈,所以全部唔做,免煩。」一名無綫人說。

楊冪出席活動時大爆老公為一歲的小糯米搵了 60間 playgroup,早前劉愷威就被網民拍得親自帶女兒上堂。

四劇同步播放,劉愷威被內地網民封為「劇霸」。

上月底,劉愷威同老婆聯名以 5980萬購入西半山寶城大廈單位,兩公婆在港孭住近億樓債。

去年劉愷威在上海拍攝《千金大賊》時,大住肚的楊冪跟場做跟得夫人。

二千萬包薪

貴為內地四大花旦之一,楊冪一樣做到冇停手,同黃曉明主演的電影《何以笙簫默》在內地上映三日已破 2億票房。

其實自同楊冪拍拖後,劉愷威的劇酬已由六至八萬一集跳到十六萬一集,加上唔會擇肥而噬,主角配角反派客串都唔放過,豬籠入水。一三年同楊冪拉埋天窗後,更加一發不可收拾,身價升到三十四萬至三十八萬一集,去年中開始,更採用內地劇一線演員制式,二千萬(人仔)包薪(即有限制拍攝月數,但不限定集數),舉例俾期四個月,任拍,你有本事剪到一百集,亦不會有任何異議。

「劉愷威而家真係好吃香,舊年有製作公司為咗搶佢啲期,出二千萬包薪搵佢做男主角,佢呢個價錢拍咗四套劇,所以買寶城大廈個單位要成六千萬,都話買就買。」劉愷威身邊人說。

鍾意就快D Share啦!