2015年7月2日 星期四

囡囡爆粗 鄭中基俾 like [壹週刊 - 1321] 中基,M1,鄭中基



探熱針

囡囡爆粗 鄭中基俾 like

擅長拍喜劇的鄭中基,在即將上映的新作《猛龍特囧》中大玩英文粗口,點知愛女 Emma居然有樣學樣,鄭中基自知責無旁貸,但教女有另一套的他,都係先讚後罰!

為仔女保命

做咗老豆,由貪玩男急掟彎變成黐家男的鄭中基,大女 Emma已經四歲,今年二月添多個慈姑椗,話題更加離不開仔女經。

「以前冇諗過做爸爸係咁 enjoy,未生唔知,以為好煩,點知望住個女瞓覺瞓到咕咕聲,我可以望好耐好滿足;而家所有嘢都係小朋友行先,我唔後生,為咗佢哋我開始 keep fit,希望可以拖(壽命)耐啲,哈哈!到時佢哋十幾歲,至少我仲可以同仔女打吓波,唔係震住咁追佢哋。」鄭中基說。

大女 Emma將貪玩的鄭中基徹底征服,變成廿四孝老豆。

今年二月幼子出世,老婆余詩敏為他湊成「好」字,令鄭中基更黐家。

私人控煙辦

養兒一百歲,長憂九十九,為人父後,鄭中基始體會到父親鄭東漢的煩惱。

「望住對仔女,我真係會諗:『如果佢哋好似我細個咁,就慘!』爸爸都話:『你而家先知呀!』細個成日諗自己,而家終於明白父母一直嘅提醒;以前覺得父母好煩嘅嘢,而家自己做番晒。」

一物治一物,尤其四歲大的 Emma,簡直是爸爸的私人「控煙辦」,令有廿幾年煙齡的鄭中基肯的起心肝戒。雖然革命尚未完全成功,但至少可以由煙鏟降為一日食唔到一包的基本煙民。

將上映的《猛龍特囧》大玩男神招募,由演員到電影老闆蕭定一,齊齊上陣拍宣傳片。

導演阿 Mark早前上載一段爆笑朗誦片段,贏唔少點擊,連鄭中基都話今鋪又導又演嘅阿 Mark去到好盡。「佢犧牲好大,做導演要做到咁,我做唔嚟!」

有樣學樣

除了戒煙,亦因為一次 Emma在家人面前爆粗,令鄭中基下定決心,戒埋粗口。

「個女歲幾時,聖誕帶佢去澳門玩,坐車睇燈飾,睇睇吓俾個地盤圍板遮住咗,個女忽然講:『咦,冇嘅,仆街!』嗰刻全車人靜晒,我 O晒嘴,然後所有人望住我;我話得嘞,以後講電話我會行開講。可能同人講電話爆粗俾佢聽到,而家啲細路吸收力好強。」鄭中基說。

囡囡活學活用,鄭中基教女亦自有一套。「聽完佢爆粗,我細細聲讚佢:『呢個位用得啱,都幾叻,但之後最好唔好』所以我做嘅戲,佢全部都未睇得,除咗我配音嘅卡通片,因為太多粗口,照學就慘!」做父母,最緊要身教。

鄭中基坦言當人父後,令他深切體會爸爸鄭東漢昔日的操心。

戒蒲多時的鄭中基,閒時只有家庭樂。 Emma幫爸爸油指甲的溫馨相,陪囡囡學畫及旅行照等,鄭中基放上網開心些牙!

小六輸股票

鄭中基兒時反叛,仲好有膽識,十一歲讀小六已經攞利是錢投資買股票。「阿媽幫我投資,仲記得買港燈,五個幾入,試過升到上十七蚊,所以嗰時已經放棄睇卡通片,改睇財經新聞。點知一個金融風暴跌到兩個幾,小六輸身家,從此發誓唔再買股票。」

鍾意就快D Share啦!
Related Posts Plugin for WordPress, Blogger...