2015年7月2日 星期四

冇得留低 瘟仔曠工激嬲 Paco  As One花花出局 [壹週刊 - 1321] Paco,花花,Elfa,As One,M1,黃柏高



(《 Face》圖片)

探熱針

冇得留低 瘟仔曠工激嬲 Paco  As One花花出局

Paco(黃柏高)力捧的女子組合 As One最近大換血,加入新成員 Chloe同嘉茵,與此同時,骨幹成員 Elfa(花花)就因腰傷腳傷退出。

但實情是花花搭上建築公司有米太子後,多次甩底失場,又詐病去旅行瘟仔,屢勸不改最終激嬲 Paco,將她叮走無限期雪藏。

姣過沈震軒

Paco要將 Elfa(花花)踢出 As One,並非事出突然。據了解,花花恃住自己在隊中粉絲人數最多,過去一年,經常踩上公司要求離組單飛發展,又不時同其他成員爭排位、爭歌唱,搞出唔少是非,未紅先驕的態度,早已令公司不滿;加上曾經姣溝 Paco頭號愛將沈震軒,二人拍拖睇騷再直落斷正,最終被召回公司照肺,怕她行為唔好連累沈震軒。

之後花花曾一度聽話和變得積極,但自從搭上建築公司太子爺 Mad(何世傑)後,又故態復萌。

「最初識阿 Mad嘅時候,花花只係知佢做髮型師,所以都唔騷人,後來知道 Mad屋企原來做建築生意,都幾有錢吓,先即刻翻兜人!阿 Mad又真係好冧佢,為咗花花最近仲特登換咗架 Benz車出車入,阿 Mad而家要幫屋企手打理生意,已經好少再幫人剪髮。」花花身邊人說。

Paco花了大量金錢去力捧 As One,早前就安排她們到韓國受訓,又用百萬搵韓國團隊幫她們拍 MV。

因為姣溝沈震軒,已經試過激嬲 Paco一次。

飛走花花後, As One加入了兩位新成員 Chloe(左二)同嘉茵(右二)。

詐病失場

釣到金龜後,原本住石硤尾屋邨的花花已搬到美孚與男友同居,因為掛住拍拖,花花同公司講話腰痛同腳痛唔開得工,又臨時甩底咗幾個公開活動,有兩次商台搞 As One招募新成員活動,佢都缺席,仲試過為咗陪男友去台灣,唔蒲頭排舞練歌。

見花花「病情」一直無好轉,公司於是主動安排名醫並包埋醫藥,但她堅持唔睇公司提供的醫生,一直以「未好番」做藉口選擇性工作。

忍無可忍! Paco最終決定叮走花花,尚有超過五年合約的她,將被無限期雪藏。

冇嘢做嘅花花,黐住男友喺美孚同居,一心諗住嫁有錢人脫貧。

九十後少女組

12年出道的跳唱組合 As One,成員 Shin、 Elfa、 Oli和 Nata全是九十後,更是天王郭富城御用排舞師 Sunny的入室弟子, Elfa及 Oli已先後退出,並透過「 As One Plus One」活動招募了兩位新成員 Chloe及嘉茵,接受特訓。

現任成員

陳苑澄( Nata)

年齡: 20歲

身高: 166cm

加入年份: 2012年 6月

崗位:第一領舞及副唱

入行經過:曾是香港體操代表隊成員,是不少演唱會的舞蹈員。

吳思佳( Shin)

年齡: 21歲

身高: 165cm

加入年份: 2012年 6月

崗位:隊長、領舞、 rapper

入行經過:中韓混血兒,精通多國語言,並於網上自學跳舞。

蘇皓兒( Chloe)

年齡: 21歲

身高: 167cm

加入年份: 2015年 4月

崗位:第一主唱

入行經過:模特兒出身, 08年曾參與《 Yes!》全港校花校草選舉。

陳嘉茵( Ka Yan)

年齡: 19歲

身高: 163cm

加入年份: 2015年 4月

崗位:第二主唱

入行經過:精通多種舞蹈,亦曾參加多個歌唱比賽。

退出成員

黃佳宜( Oli)

年齡: 21歲

身高: 163cm

加入年份: 2012年 6月

崗位:第一主唱

入行經過:北京藝術學校畢業

退出原因: 2014年 8月,因學業及健康問題正式退出。

邱念恩( Elfa)

年齡: 22歲

身高: 168cm

加入年份: 2012年 1月

崗位:第二主唱

入行經過:精通中西樂器包括小提琴、古箏、鋼琴等

退出原因: 2015年 5月,因傷患未能配合工作及行程而退出。

鍾意就快D Share啦!
Related Posts Plugin for WordPress, Blogger...