Ann（左）主要負責諗橋， Iris（右）就負責搵客，二人合作十多年，賣的產品都貼近潮流，今次普通派傳單 Ann亦有加入新元素，宣傳板以外還加有電視。
壹盤生意
為保飯碗 傳單「人肉」變身
因為四個字：土地問題，四十三歲的梁淑霞（ Ann）與三十七歲的陳嘉敏（ Iris），才有重新來過的機會。
兩個單身女人，因為一次生意失敗要賣樓賣車。沒有專業技能，她們走去上短期排版課程，學做宣傳單張。過去曾在觀塘區做生意，她們知道不少創業新手為慳租，在這區開樓上鋪，故去年開設 Jetsomore，幫小商戶設計及派傳單。
入行後，她們卻被八十後用賤價搶飯碗。不過，經歷過人生低谷的女人，絕非省油的燈，她們破舊立新，把傳統的一張張傳單化成「人肉」流動電視！
觀塘樓上鋪多的是，行出港鐵站，一直向碼頭方向走，三步一阿姐、四步一阿姨，都在派傳單宣傳工廈樓上鋪。這班戴着口罩的阿姐不時聚在一起吹水，有途人時，她們雙手就像摩打一樣，伸出、收回，伸出再收回。有的更一邊派，一邊吃蘋果。
彎身微笑伸手
在隔籬街的開源道，這裡較寬闊，途人沒有前推後擁，步速較緩。那裡有個高度如大半個人一樣的「活動」廣告膠板，膠板上有煮蛋神器、岩盤浴及玩具開倉等宣傳。背着這塊膠板的後生仔，化身「人肉流動膠板」，每次見有途人行過時，都會把上半身微微傾前，雙眼盯着途人，再微微一笑，把手伸到最遠，說：「有份優惠可以拎去睇吓。」記者比較過阿姐與後生仔的派發速度，五分鐘內，阿姐只派到三份；而這個後生仔則派到：二十份﹗
這個後生仔叫阿廣，是 Jetsomore的傳單員，他比阿姐派得落力，因為 Iris和 Ann在他入職後，由眼神、站立的姿態，到說話的語氣，都親自教授，加上銀彈政策，「我哋傳單員人工比出面班阿姐高兩成㗎。我哋請後生仔派，因為佢要背住塊板好重，而且笑容又多啲。」 Iris指，她們曾要求員工背着燈箱，「雖然吸引，不過一個都有八公斤重，要同事背兩、三小時都有難度，後生仔就算頂到咁耐，笑容都好快收起。」故她演化為輕巧的膠板，又幫員工在膠板旁 set好「風扇仔」，令員工做得舒服一點。
斥對手偷相
連一個小小傳單員都要執到正，皆因這行競爭極大，更有對手「頂爛市」。其中一個對手，是八十後的阿豪，他一腳踢經營的廣告雜誌「 UGuides」，亦是專替觀塘區樓上鋪宣傳。它以廣告雜誌的形式，介紹鋪頭之餘，亦附有優惠券。 Jetsomore亦有做廣告雜誌，但 UGuides的價錢卻平一截，只收九百五十元，包一個月派五千份， Jetsomore則四千元一大格、二千元一小格，包兩個月內派二萬份，故亦有小本經營的樓上鋪寧搵「 UGuides」，搶走了她們幾個客。這令 Ann及 Iris火起。
「佢根本就係跟住我哋做！我一出郵政服務（派上樓），佢跟；我哋搵咗邊個客，佢又跟，連相都照抄我，呢張相係我幫個客影㗎！」不過，能夠搶走 Jetso幾個客，阿豪向記者堅稱自己的性價比高，開業七個月，已淨賺萬多元，更打算把業務擴展到堅尼地城：「佢哋淨係得優惠，無介紹人哋間鋪頭，宣傳效果梗係差啦，仲要收得貴﹗」 Ann為「對付」他，亦要推出優惠予新客，及可免費使用活動廣告板。
此行入行門檻低，阿豪由 call客、排版、印刷一腳踢。沒有讀過設計的他，指當初純粹睇書「無師自通」，而 Iris就曾到工聯會上了兩個短期課程。記者比較過 Jetsomore及 UGuides兩本小冊子，認為 Ann及 Iris設計的宣傳單張較會突出價錢、「送」及「折」等字眼，產品相片亦較大，相反由阿豪設計的宣傳單張則細字太多，令人不想閱讀。 Iris和 Ann曾從事廣告推銷，故從設計上較明白讀者的需要。不過有競爭，有「着數」的始終是客仔，食肆老闆丘小姐就兩間都幫襯，她說：「當初都係靠 Jetsomore，我哋先有人識，佢用流動布景板幫我哋宣傳效果大啲，但既然有間 UGuides我哋都試吓。」她指會再看看反應，再決定日後用哪一間公司。
亂招救生意
Ann及 Iris入行前，曾在觀塘區賣充電器、手機套，開腳底按摩店，賺過不少錢，是有車有樓一族。後來信奉基督教後，轉賣印有《聖經》金句的基督教服飾，藉此宣教，卻因為客路太窄，蝕了不少錢，最終賣車賣樓。現在兩人重新開始搵錢，面對激烈的競爭， Ann曾有很多新想法，想增加收入。她試過把播着宣傳短片的電視，裝在滑板車車頭，不過因為電視太重，很容易反車，所以只能將來有機會在室內大型展覽中慢駛。她又試過從外地引入一個有 LED顯示屏的透明陳列櫃轉售，不過屬於新產品，知名度不足，半年只賣出二十多部。
最近又與朋友合作，寫了兩個程式，第一個是客人在 WhatsApp輸入指定編號，就會有自動回覆顯示優惠券，客人不用把宣傳單張帶在身邊。第二個是統計商品的銷售、庫存的系統（ POS）。讓新開鋪的記錄一清二楚，老闆隨時在手機都查到存貨量、生意額。今期新推出又送收銀機、影印機，重做半價優惠，每月只收七百九十元。希望客人用這個服務時都在 Jetsomore落廣告。由於公司只有她兩人，根本分身不暇去宣傳新業務，故現在新程式所帶來的收入，仍是微不足道。「好多分配人手、與現有客戶溝通的工作我都要做，我無多餘時間搵更多大客，好難增加收入！」
轉搵公司客
兩人於是還原基本步，希望做好目前的工作，收入增加後才有錢請人拓展業務。她們想到向連鎖店入手，「小商鋪有幾多錢可以宣傳？」 Iris說。她指一間連鎖店收費與小店不同，對方每月買百多小時的派發時間，收費一小時約一百四十元。為了開闢這個新客源，兩人在亞洲零售展擺攤位，「我叫員工背起薄薄的燈箱在場外，成功引起卓悅市場推廣部成員留意，佢哋主動搵我哋傾合作機會。」兩人之後就安排人手在旺角、尖沙咀、銅鑼灣背着燈箱牌，為卓悅派傳單。這個手法引來途人注意，亦帶來更多客人。有先施員工在街上發現 Jetsomore，再與二人接洽。 Iris和 Ann近期又想到把傳統的傳單廣告，化成流動電視，即讓客人拍攝的短片在電視播，再叫傳單員在觀塘區游走，希望藉此做到「客如輪轉」。
開業資料（ 14年 8月）
開發程式：$200,000
器材：$100,000
印刷：$20,000
總投資：$320,000
營業資料（ 15年 5月）
營業額：$100,000
租金：$12,000
印刷：$16,000
薪金＃：$35,000
盈利：$37,000
＃六名兼職
|
鍾意就快D Share啦！
|
|
|
