《愛．回家》尖晒
曾守明瘦到塊面見晒角，上週現身《愛．回家》 941集，仲瘦過麥包，唔少綱友都發現，他說：「上年年尾拍㗎喇，嗰陣開始肥番喇。」（電視畫面）
真面目
大步檻過 激瘦 20磅 停工 3個月 大台綠葉王曾守明：做過心臟大手術
家陣巴打睇劇唔只留意主角做緊乜，連啲綠葉大家都關心。
好似今年 55歲，喺無綫前後捱咗 28年嘅無綫綠葉王曾守明，一向肥嘟嘟嘅佢，上週喺 941集《愛•回家》客串車行老闆一角，塊面竟然瘦到起晒角。原來呢位無綫甘草上年做過大手術，他說：「上年心臟做咗過大啲嘅手術，唔係就咁通波仔。」保重呀！
曾守明上週喺《愛•回家》 941集飾演車行老闆，但一向肥仔嘜嘅佢，突然暴瘦登場，比同場對手麥包瘦成個碼，側面睇仲成個劉華咁款，令唔少巴打都關心呢位無綫綠葉王嘅健康情況。其實早前喺《實習天使》，已有網友留意到曾守明離奇瘦身，但今次明顯更加嚴重。
住院 2星期
原來曾守明上年 10月做過心臟手術，更喺公立醫院住咗兩星期，期間都有唔少藝員同事探望，休息 3個月已即刻復工，他說：「《愛•回家》係上年年尾拍，已經開始肥番㗎喇，大家放心。」
曾守明入行前做過義勇軍及輔警，一向有肉地，而且揸得一手好電單車，今週首播嘅《鐵馬戰車》監製陳耀全亦係睇中佢呢點，專登俾個連戲角色佢，他說：「我哋《鐵馬戰車》台前幕後都有個 WhatsApp群組，佢哋都好關心我，我好番大家都有出嚟食下飯、吹下水。」
雖然曾守明停咗工 3個月，但佢原來喺泰國都有開保安公司兼有教人玩真槍射擊，所以生活不成問題，他說：「上年 10月喺醫院做咗個心臟大啲嘅手術，唔係就咁通波仔，瞓咗兩星期啦，醫生話我完全康復喇！由原本 170幾磅跌到 150磅左右，醫生叫我肥到 160磅度就正常喇！多謝網友關心，我冇事喇！」
《凌凌漆》湖南仔最經典
守明哥做過唔少電視劇，喺電影亦老是常出現，最經典當然係《國產凌凌漆》，戲中飾演湖南仔，同星爺有唔少對手戲， 11年仲拍西片《世紀戰疫》飾演中國衞生官員，仲同奧斯卡影后 Marion Cotillard有對手戲㗎，威呢？
撰文、攝影：娛樂組
|
鍾意就快D Share啦！
|
|
|
