真人騷
暴瘦縮胸 娶硬楊怡 羅仲謙：男人家庭好事業就更專注！
上一次專訪羅仲謙已經是五年多前。
五年前的他，還沒有因為被傅穎投訴毒打而登上封面開記招，還沒有做過電影電視男主角，還沒有搭上當家花旦楊怡，更沒有因為疑似車震斷正上頭版，相比現在，兩個人。
最大分別，肯定係對波！當年 44吋胸肌件件恤衫都被撐爆，今天卻又乾又瘦平板過鄭秀文，說好的大波謙去了哪？
「係嘅，比起全盛時期瘦咗十幾磅，因為拍呢套《西遊記之孫悟空三打白骨精》對得多郭富城，我好羨慕吖……上鏡係要瘦啲乾啲至會好睇啲、立體啲！」
另一個不一樣，當然是腦袋。五年前直不甩，現在九曲十三彎，不管問到甚麼，都不肯直接回答，他說最好的自己就是現在這個狀態：「更識得做人同處理感情，最緊要就係過得到自己，又唔會得罪人！」
看出來了，眼前這個改良版的羅仲謙，在外深受偶像郭富城影響，竭盡所能追求外表完美；在內則得到拍拖五年、同樣年長五年的女友楊怡薰陶，小心說話但求萬無一失……他笑了：「又講呢啲？你可唔可以話係我自己識諗呢？好多嘢相對嘅，男人不外乎事業同家庭兩樣嘢，事業好家庭就好，家庭好事業亦更專注，息息相關。」
外傳 31歲的羅仲謙今年三月就會迎娶女友楊怡，原來未過門，已經開口埋口當對方是家庭中的一份子。我思疑，謙謙這麼說，問過楊怡未？
我好羨慕郭富城......
比起全盛時期瘦咗幾多？點解要減呢？
十幾磅！因為……貪靚囉！想上鏡好睇囉！都想鍛鍊身體，不過唔係以前（大波）嗰種，想瘦啲，乾啲。尤其係拍電影，乾啲真係上鏡立體啲、好睇啲，城城（郭富城）嗰種我好羨慕呀，呢排我成日同佢做訪問，睇落仲係爭佢好遠，仲要追趕。
幾時開始當咗郭富城係你目標？
其實我好細個開始，不嬲已經係郭富城粉絲，我家姐都係，佢攞第一次最受歡迎男歌手時我都不知幾開心！……嗰年係〈愛的呼喚〉。
係唔係第一次同偶像合作？
第一集《大鬧天宮》佢都喺度，不過我唔係做沙僧，同佢冇對手戲，冇交流過。
羨唔羨慕佢去到呢個年紀，仲可以搵到咁後生嘅女朋友吖？
唉！唔講呢啲！我羨慕佢事業成就多啲！佢好努力，超級勤力，作為藝人，你又見到佢可以唱歌可以跳舞又可以做戲，首先我唱歌跳舞已經唔得喇！
佢係孫悟空你係沙僧，合作完一套戲，你見到城城乜嘢過人之處？
工作態度囉！譬如話我都想瘦，但我冇咁多恆心。一到冬天，我就會不停咁食，諗住化咁厚妝着咁多戲服，就算肥咗都冇人知，但係佢唔係喎，佢見唔到嘅位，都唔會俾自己懶，佢唔會呃自己。
係唔係你嘅選擇呢？入行 11年，你嘅目標都想係呢一種，一絲不苟地完美一世？
呢一刻答呢個問題又唔準，我仲拼搏緊，我唔知自己可以搏到上去一個咩位。但係我覺得自己性格，去到某一個位、某一個年紀，我想放慢腳步，想留番多啲時間做自己鍾意做嘅嘢。不過做呢行身不由己，唔通到時有得我做都唔做咩！我嘅理想係想停嘅時候可以停，但呢個理想仲好遠，有排都未行到去。
相比上次訪問你係五年前，你俾我嘅感覺的確成熟咗。
我諗係因為多咗返大陸，所以更加知道自己不足。因為大陸呢個地方太過卧虎藏龍，無論唱歌做戲，厲害嘅人太多。其實不嬲都知人哋勁，但係要合作過至知有幾厲害，先至知自己嘅程度爭咗幾遠。淨係拍呢套戲，我打又唔夠人打，身手又唔夠人靈活，阿王都有個跳舞底！另外係普通話，成日都話增值自己、早幾年已經有人叫我練好啲普通話，但係我懶懶閒，到真係要用喇，就見到自己爭幾遠。實質交過手喇，今次返到香港，我知自己就算未來一年冇工開，都大把嘢要學大把嘢要練。今次唔同以往，講完就真係要做，明知自己不足，係唔係諗住唔做呢行呢？唔係吖嘛！
付出幾多，有苦自己知。
你又點會一年冇工開？嚟緊有咩工作安排？
會拍電影版嘅《泡沫之夏》，仲有 TVB嘅劇傾緊。
頭先你講到厲害嘅人好多，但更厲害，都要好彩。好似你咁，有大台錫住有經理人公司開戲，係唔係好彩過好多人？
我都唔係平地一聲雷嗰種，我都係由茄喱啡做起，我都係一步一步行到𠵱家……你話快唔快……有苦自己知啫……我覺得每個藝人都係，佢擁有幾多，相對地就付出咗幾多，大家未必見得到咁解。
你有咩苦處係大家見唔到？
呢個留喺我心中當個秘密啦……
做咩呢？俾人潛規則咗？
梗係唔係啦……唔好諗埋呢一面先，我講緊努力同輿論壓力啫。反而最苦唔係頭嗰幾年，做電影路人甲同入電視台頭幾年，我覺得好有趣。因為我唔知自己做緊乜，方向係咩，又唔懂同傳媒溝通，講真，你咩都唔識咩都唔知，有幾大壓力？壓力係來自對自己開始有要求，知道做藝人唔係拍好戲咁簡單。
同 TVB仲有好多年約？唔覺得拍劇好困身咩？
又唔好咁講，喺 TVB拍劇真係好好嘅訓練，唔係 TVB，你當我係一個新人去拍電影《三打白骨精》，可能係會俾劇組縱壞。有專人送飯煮飯、住靚酒店、包接包送，如果新人會以為呢啲係老奉……其實唔係㗎，喺 TVB咩都係自己嚟。首先唔係應份呢樣嘢，係 TVB教我。仲有節奏， TVB出名快，喺 TVB出嚟，去其他地方都得心應手啲。講真有幾辛苦啫，好多人辛苦得嚟仲搵唔到食添！
其實你有努力，但係會唔會同咗楊怡一齊之後，俾人忽略咗你都有努力呢？
我唔會咁諗，好簡單吖，諗咁多又控制唔到，不如唔好諗。呢啲嘢好睇個人心態，諗唔開就好易鑽入死胡同。大家都見到啲報章雜誌點寫， ok，我知人哋咁睇我，但係我唔會咁睇我自己。睇完有壓力，我咪做運動買嘢搵個辦法釋放囉……如果唔係，積得多都真係會爆！
當初追佢，有冇諗過佢大過你、佢紅過你？
我處理感情會低調啲，會隨緣啲，去到呢一刻我哋都冇澄清冇承認，冇話過我哋係定唔係（情侶），都係想要啲空間。
唔係楊怡管得嚴，係我自己識諗咗！
五年成熟咁多，當然因為你經歷過幾次大事。同對上個女朋友分手（傅穎），你覺得自己嘅得着係？
唔可以淨係話上一段，我嘅人生中都唔只兩、三段，之前都有拍拖，過去嘅愛情，分手梗係因為有問題發生啦……我好難講到俾你聽我學到啲咩，不過人處理感情會隨着年資年齡有改變。我覺得我過咗三十歲以後，處理感情開始識得顧及別人感受……處理感情其實同做人一樣，一齊增長。你唔可以要求一個十幾歲嘅人處理得好似三十歲一樣。
講真，年少不更事時，有冇試過一腳踏兩船呢？
其實我冇試過年少不更事，我冇試過荒唐，冇試過你所講過嘅事，我係比較簡單啲。我淨係知道我覺得最快樂係𠵱家，識得處理感情識得處理事，過得到自己，亦都唔會得罪人。
咁即係有冇試過有女朋友，又鍾意第二個去追第二個？
唉……個個後生……啲感情都會短啲㗎啦……過咗去就唔好講，最緊要係呢一刻，我知道所有嘢都得來不易。
得來不易講得啱，所以第一次面對大新聞（打女友傅穎事件），有冇驚自己就咁玩完？
唔好話嗰單新聞，任何負面新聞，尤其我嗰陣時仲係幼苗，當然好大影響……好多嘢擔心，唔知點算好……惟有係交俾公司處理。
怪唔怪自己？
怪唔怪自己？自己有責任，係真嘅，事前事後都知道自己有責任，希望唔好再發生。
到第二次大新聞呢？（楊怡瞓大髀食雲吞麵事件）個感覺又係點？
我介意㗎，我會覺得點解會咁呢？點解會咁報導呢？第一下有人閃出嚟影相，梗係驚我問番你，換着你嗰下，可以點？真係冇咩可以做到。我希望我哋同傳媒之間搵到個平衡，盡量唔好互相冒犯，我當然希望你哋寫還寫，可唔可以留一線？嗰刻嬲唔嬲，我嬲，但係嗰一刻我淨係想處理好當下環境。
老老實實，換着你係觀眾，都應該明大眾點解食花生食得好開心，因為單新聞的確有趣味！
我唔會笑，講真，點解要笑呢？我會自己諗一諗，消化一下，事實係唔係就係擺喺你面前嗰樣呢？我唔會怪大眾，但我會要求自己，諗多一步。
講真嗰句，你兩個唔係第一日拍拖，都有頭有面，其實應該冇理由咁大膽咁激清㗎？
唔？吓？咁……自己用腦諗下啦。
係唔係真係三月結婚？
你信唔信雜誌講呢？我冇俾一個時間自己，我都想儲多啲錢，都想第時養到家㗎，我答你一個字，就係「會」。
自從你遇上楊怡，的確成熟穩重，緋聞都少咗，會唔會因為女朋友管得嚴？
又講呢啲？哈哈……你可唔可以話係因為我自己識諗呢？好多嘢相對嘅，男人不外乎事業同事庭兩樣嘢，事業好家庭就好，家庭好事業亦更專注，息息相關。
仲要努力幾耐先至養得起楊怡？
努力中……又唔係要買飛機郵輪，我哋係要正常生活嘅啫。
唐僧與沙僧
我是真的覺得五年前，和那個還很童顏巨乳的羅仲謙對話有趣得多。
這次在電影裡扮演沙和尚，我想起來五年前他說起當時的女友傅穎時，曾經形容自己是唐僧：「佢（傅穎）係佛祖嚟㗎，鍾意考驗唐僧！」
係好笑嘅，尤其係最後「佛祖」會被人打得渾身瘀青。
撰文：朱小博
攝影：范仲良
化妝： Leo Tam@Annie G.Chan
髮型： Jan Chiu@iL Colpo
形象： Bryan@the Flaming
服裝： Anges b.
場地提供： Crowne Plaza Hotel Causeway Bay
|
鍾意就快D Share啦！
|
|
|
