「悲哀，黃安大陸沒搞頭，只會來亂，遲早會被共產黨處理。」吳宗憲一早幫黃安批咗命。結果今日？黃安已經「被消失」——微博上面。總統選舉當日，陳淨心已經急急喺微博同黃安劃清界線，強調自己冇份檢舉周子瑜，又話自己因為咁無情情俾好多網民鬧。Sosad，之前陳大媽同黃安又話港台合作檢舉，大難臨頭，真相咪現晒形囉。關係脆弱過強國玻璃(心)。之前檢舉人檢到上晒腦、當正自己係死亡筆記嘅陳大媽，依家？唔敢檢舉喇，改策略，叫做「高度讚揚」，包括讚「因為我們都是中國人」嘅小豬羅志祥，陳大媽仲話見到小豬咁講，令佢感動流淚……陳大媽另一個要讚揚嘅，係被翻出三年前講合拍片時爆出一句「不該分中國、香港，本來就是一家人」嘅謝霆鋒。(新聞連結: http://bit.ly/1ZJGuco )仲喺微博post咗一張謝霆鋒fb page嘅cap圖，寫上「支持愛國藝人謝霆鋒」。陳大媽為個page加持，阿彌陀佛。但係個page，只係由大陸fans所開，唔係official，但因為like數太多，令人以為係官方嘅page，兼夾以為霆鋒自己貼嘅添。老老實實，霆鋒嘅官方page，喺2015年9月已經冇再更新過。一眾大陸網民不斷翻牆去嗰個fans專頁「支援」、係咁留言狂鬧香港人，又港獨又dog又滾出香港(佢哋嘅神邏輯係「香港係屬於中國」=「香港係中國嘅土地」=「你唔鍾意中國請你滾出香港」)等等等等。但亦都有啲大陸網民遲咗翻牆，去咗霆鋒個「真‧專頁」，咦，冇嗰張「不該分中國、香港，本來就是一家人」嘅cap圖嘅？水靜鵝飛冇人留言嘅？說好的開火呢？有大陸網民留言:「說好的戰場呢…」、「聽說戰場轉到了這裏，特來支援！」、「同志們戰場不在這裏」、「剛從何韻詩ins(ig)轉戰前來支援！！！！」、「莫名的觀望…來錯地方了？」、「聽說有港獨狗，在哪呢？爺叫你一聲，敢答應嗎？？」望住佢哋，真係要唱返句：「最寬廣的公園遊樂過 為何認真？」
|
鍾意就快D Share啦！
|
|
|
