圓圓餵母乳 孖仔似足加讚
「玩具大王」蔡志明兒子蔡加讚與太太汪圓圓婚後努力為蔡家開枝散葉，前年誕下女兒後，圓圓前日誕下孖仔Christian及Kameron，並指孖仔似足加讚。由於加讚是蔡家唯一男丁，如今圓圓為蔡家誕下男孫，而且是孖胎，故再度榮升爺爺的蔡志明已經明言會送大禮給圓圓作獎勵！
圓圓剖腹誕下孖仔，蔡加讚入產房全程陪伴左右。
再做爺爺的蔡志明，一提到孖孫仔即顯得開心。
蔡加讚被家姐踢爆抱孖仔抱到唔願放手。
蔡李惠莉（左）與汪詩詩
蔡志明之子蔡加讚2013年與汪圓圓結婚，當時奶奶蔡李惠莉「下令」要圓圓生夠6個，圓圓於2014年9月即為蔡家誕下首名內孫女Celine，當時令蔡家上下十分雀躍！早前宣布懷孖仔的圓圓，懷孕期間因肚皮漸大甚為辛苦，前晚她於Instagram公布喜訊：「我們的雙胞胎兒子Christian Choi和Kameron Choi，今天終於順利來到了這個世界（6.5磅＆6磅）。現在媽媽和兩個兒子的健康狀態良好，母子平安！」圓圓兩年抱三，先後為蔡家誕下一女兩子，可喜可賀！
圓圓與加讚昨日發放照片分享喜悅，相中與一對新生孖B及加讚合照的圓圓眼紅紅，似乎十分感動。而於圓圓待產期間，家姐汪詩詩及姐夫甄子丹、奶奶蔡李惠莉及加讚家姐蔡加怡等亦有前來探望。
C、K為名保獨特個性
再為人父母的加讚與圓圓表示，見證孖仔順利誕生非常開心及感動，加讚說：「母子平安健康良好！自己同家人亦感到無比喜悅，希望佢哋健康快樂地成長！」圓圓則開心得不敢相信，現階段會在醫院好好休息：「依家好安心，因為見到兩個BB都好健康，啱啱生完覺得好攰，暫時喺家人同老公照顧下喺醫院好好休息。」圓圓及奶奶都覺得孖仔似足加讚，圓圓說：「兩個BB都好似爸爸，佢哋暫時未開眼，但見到鼻同嘴輪廓，同爸爸好似樣！」問到如何分辨二人，圓圓笑言「未識分」，但加讚表示已懂得分辨，更指孖仔樣子大不同。
談到孖仔英文名，加讚說：「圓圓上一胎時已經諗好，生男叫Christian，生女就叫Celine，所以今次大仔用咗Christian呢個名。而Kameron字頭由『C』改為『K』，因為佢哋係孖胎，個名唔想太相近，希望保持佢哋獨特個性。」他又表示中文名字很重要，故要慎重思考。
圓圓表示今次是剖腹誕Ｂ，並會堅持餵母乳，問到孖仔是否同卵雙胞胎，她說：「兩個BB好似樣，至於係唔係同卵雙胞胎，醫生話要遲啲先確定到。」加讚則透露有陪圓圓入產房及為BB剪臍帶，目前會抽多點時間陪伴圓圓。圓圓又指大女Celine已見過兩位弟弟，並雀躍大叫Baby。至於會否舉行百日宴？加讚表示一切待圓圓專心養好身體為先。
蔡李惠莉孖汪詩詩探望
而奶奶蔡李惠莉與圓圓家姐汪詩詩昨日到醫院探望，並於中午12時一同離開，蔡李惠莉表示十分開心，又指BB似足加讚：「似Karson（蔡加讚）多啲，兩個都好似樣。（中文名改咗未？）諗緊。（獎勵圓圓？）要，佢都辛苦，要養好身體先。（有咩補品？）遲啲先，傷口未埋口，未食得住。（幾時出院？）要遲啲，因為生孖胎。（佢餵人奶？）未知，詩詩都特登嚟拎嘢畀圓圓。」
至於再度榮升爺爺的蔡志明昨晚亦有到醫院探望孖孫，而昨日他接受本報電話訪問時開心表示會送大禮給新抱：「再做爺爺好開心，今次有兩個孫仔，一定會送份大禮畀圓圓，等BB滿月先，畀時間我諗，同埋睇吓圓圓鍾意咩。」而他到醫院時被問到是否想圓圓生夠6個？他笑說：「四個夠喇！有仔就得，我鍾意熱鬧。（係咪再追多個仔？）唔使，仔女都得。（要換大屋？）已經有一間，裝修緊。（結婚送嗰間？）係，Karson唔鍾意間屋原本設計，所以要再裝修過。」另外問到會否豪搞百日宴？他說：「要，兩個嘛，喜事重重。」
採：名人組
文：專案組
圓圓剖腹誕下孖仔，蔡加讚入產房全程陪伴左右。
再做爺爺的蔡志明，一提到孖孫仔即顯得開心。
蔡加讚被家姐踢爆抱孖仔抱到唔願放手。
蔡李惠莉（左）與汪詩詩
|
鍾意就快D Share啦！
|
|
|
