掃呢頁CODE去手機

2015年4月30日 星期四

爆煲論到期 湯文亮潛水 [壹週刊 - 1312 - 財經] M1,湯文亮



插圖:詹震寰

中環人語

爆煲論到期 湯文亮潛水

湯文亮近日爆紅,先是二月發表了細價樓爆煲論,引起全城熱話,三月時睇淡滙豐,睇好「生發發」港交所,立時被封為「新股神」。

湯文亮出示醫生紙,證明睇過心臟科。股海搵食,唔係唔坐得過山車呀?

賺一大筆應該大事慶祝,不過湯文亮出席完一早約好嘅浸大講座之後,除咗繼續寫文章就無聲無氣。佢同《壹》仔講,佢俾「股神」稱號嚇親,叫做「估神」好啦。事關封咗做「股神」之後一日,佢就收到五十幾個電話,佢年紀大覺得太刺激,心臟頂唔順,要專程去養和睇心臟科醫生。

計計吓,仲有兩個星期就到三個月爆煲論限期,想訪問番湯文亮點睇嚟緊樓市。佢話醫生建議佢應該多休息、少應酬,三個月內不能接受訪問。之後仲特登影張醫生紙俾《壹》仔,證明真係睇咗心臟科醫生。睇嚟佢去玩潛水適合過坐過山車。

21影業不日上畫

高振順最叻趁勢,拉埋各方名人,以阿里影業為藍本,倒模 21影業。(于港民攝)

細價股 21控股( 1003)早前宣布易主,引入多名「星級股東」。單刁由蔡東豪舊老細、精電主席高振順及阿里影業前主席董平牽頭,二人乃金魚缸常客,最奇怪是,連「公職王」、貿發局主席蘇澤光都大拿拿攞咗近二千萬入股,另外仲有拍過《人在囧途之泰囧》的影星徐崢、《瘋狂的石頭》導演寧浩等,噱頭十足。小宗第一時間打俾高振順索料,佢話佢既是股東,亦是單刁的財務顧問,唔方便講嘢。不過,心情靚靚嘅佢,不忘提醒小宗,蘇澤光做過幾年電影發展局主席,好熟媒體,而徐崢等人都是內地票房過十億的電影人。畫公仔唔使畫出腸,而家做緊地產代理及投資業務的 21控股,睇來好快變 21影業。

中環寸嘴

楊國佳

工廈大王楊耀松長子,是各大有名食肆之 VIP,喜歡研究已故及城中有錢佬對食之喜好,強調「貴」唔等如識食,自詡分享食經乃是提升讀者之水平。

揸滙豐當攬新女

嘩,禮拜六走去上環衣紙鋪買金銀衣紙,幾鬼多名車喺門口排晒隊,一路買衣紙一路噏股票,我睇啲人心虛,個市升得咁急;我係睇住一、兩隻心水股,平保喺$141、$144做兩轉 decumulator,分多幾轉做等個銀行佬日日有得向上頭交數嘛,唉,滙豐吹話遷離英國股價反彈吓,我啲棺材本都仲有滙豐,呢隻股即係等如年老色衰嘅老婆,有 downside,無 upside,咪整吓呢度,搞吓嗰度,披件靚衫,咁做老公嘅攬住咪當係條新女囉!但走勢始終向下。之前我見滙豐同中石化兩隻嘢鬥殘咁,就押注落去中石化,起碼都有古講吓嘛,家陣都有啲斬獲。

呢排有啲金融界老友,約我去 happy hour,你慌唔係想索我啲料呀。 Happy hour唔去啦,日日睇住個市,你估唔攰呀?搵到錢,點你去食又抵又威嘅嘢,嗱,平日喺中環食個晏,唔好講錢住,訂唔訂到位都唔知,喺遮打大廈間 Armani Aqua,週六、日 brunch抵食㗎,唔使同人逼,啲任食嘅日式刺身、壽司幾靚㗎,仲有意式主菜,臨尾上客甜品,最盞鬼係香檳、白酒、紅酒任飲,而家冇乜高級餐廳咁做,大人五百幾蚊位,唔飲酒四百幾,細路仔半價添。嗱,週六少人,週日好多細路仔。齋飲酒都抵番啦。

早排週六去,成場得兩、三枱客,夠晒清靜,更冇人同你爭食。

甜品另外上,有 Gelato、 Macaron、 Sorbet、檸檬撻,係成個 brunch亮點。

死人股

七三年已上市嘅安全貨倉( 237),肯定係老股,公司資產豐厚。最正係位於荃灣嘅安全貨倉,十幾年前本來話向城規會改為住宅,但董事局忽然褪軚;咁筍嘅建議都唔做,梗有阻力啦。剛過身嘅主席、年屆九十五的呂辛本來同個仔呂自龍(年屆六十三)拍住上坐喺董事局,後來細仔呂榮義加入集團任經理,論年紀,阿哥呂自龍大細佬廿幾年,生得出佢喎,細佬入局,阿哥亦因病退任董事;今年四十歲嘅呂榮義會計師出身,數口精,照計唔會睇唔到公司資產同股價大折讓;董事局無晒雜音,做嘢應該暢順啲,有小股東揸住安全貨倉多年,講到明同主席鬥長命;家陣卒之等到了,相信股價有所發圍。

剛過身嘅安全貨倉創辦人呂辛,享九十五歲高壽,與其上市公司同樣長命。(歐陽江攝)

(林志謙攝)

金牙大狀講嘢

沈校長唔喜歡報警,姑息養奸,有乜辦法唔闖禍呢。(黃雲慶攝)

和稀泥闖禍

一葉知秋。先前我哋憑中大嘅英文水平,判定呢間大學江河日下。果然,佢哋深圳研究院爆出「穿櫃桶底」、為人要脅嘅醜聞。沈祖堯為此辯護,話冇就此報公安,皆因唔熟悉上邊情況云云。然而出事唔報警,沈校長早有前科。

冇耐前,中大發生咗單刑事毀壞案。事緣八大學院連同學生會同意加宿費,但有個別學生唔順超,非但反對大學上下嘅集體決定,更衝擊校長室、打爛保安監察系統。結果?沈校長罔顧大學最高當局加宿費嘅決定,反而以和為貴,冇報警追究責任。摸清校長之底細,難怪深圳有人「穿櫃桶底」亦冇有怕矣。

校長處事唔講原則,萬一出事亦和稀泥、努力冚實,咁啲人有乜辦法唔膽生毛呢。做好人容易,但姑息養奸,到有一日紙包不住火,揚晒出嚟啦,但一切為時已晚。睇怕深圳都只係個開頭而已。

中環人語迷你版

“香港冇以前咁受歡迎,一鋪清袋”

估中邊個中環人講呢句說話,送你 plantronics Voyager Legend Signature Black藍牙耳機一個

有意參加者,請於四月二十九日(星期三)下午一時後,將答案、姓名及聯絡電話電郵至centralman@nextmedia.com

小宗只接受電郵,郵寄免問。

本刊員工及直系親屬不得參加。

為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。

超過一位讀者估中,先到先得,恕不接受上訴。

答案及中獎者姓名將於下期本欄揭曉。

上週人語揭曉

“香港股票市場和政治已進入大時代。”

答案:曾俊華

得獎者: Patrick TF

中獎時間: 1:00pm 22/4/15

廣告時間

你有某財團嘅黑幕想爆?你知邊間上市公司造假?

你仲想舉報地產霸權嘅不公?

歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!

爆料熱線/whatsapp:6829 5929

鍾意就快D Share啦!