掃呢頁CODE去手機

2015年4月30日 星期四

群星拱照勝和坐館 [壹週刊 - 1312] M1,



沙田 Me:想做明星?搵我﹙設計對白﹚

Me哥,我都想拍戲,請唔請人?﹙設計對白﹚

爆壹爆

群星拱照勝和坐館

澳門洗米華,集齊江湖人、娛樂圈明星、賭場和大婆二奶鬥爭等各種元素,成為長期新聞熱爆人物。香港黑幫人物眼見此路可行,都來跟一跟風。

上星期二晚,爆哥去咗尖東港晶中心二樓一間酒樓食飯,同朋友飲酒吹水之際,突然見到一名黑衫黑褲、樣子兇神惡煞嘅男人行過,酒樓經理仲笑笑口、必恭必敬咁傍住佢入咗貴賓房。望真啲,先發現佢係和勝和現任坐館沙田 Me。原來當日沙田 Me喺酒樓搞咗個生日 party。

勝和坐館搞 party,爆哥以為會有好多江湖猛人出席,點知剛好相反,一個古惑仔都冇,反而見到一大堆娛樂圈藝人,好似啱啱開完演唱會嘅吳國敬、長駐大陸拍劇嘅陳浩民、范振鋒夫婦、喬寶寶、李雨陽同仙樂都等,場面都好熱鬧,唔講仲以為係演藝人協會聚會添。之後仲見到沙田 Me親自走到櫃枱,叫職員幫佢點餸,「鮑魚喇,蒸條靚魚添。」坐館生日,當然要有面子。有職員話當晚十二點時,沙田 Me切生日蛋糕吹蠟燭,班明星仲唱晒生日歌,之後隊咗幾十支紅酒,玩到凌晨兩點幾至散 band,非常盡興。

爆哥當然知沙田 Me交遊廣闊,同好多娛樂圈嘅人都好熟,藝人食四方飯,亦都個個俾面江湖大幫派首領。朋友更估計,當晚 party應該唔單只食餐飯咁簡單,應該坐埋有大嘢傾。爆哥都覺得唔出奇,江湖一向盛傳,沙田 Me想做第二個洗米華,佢早前投資八百多萬搞咗間娛樂公司,都係想踩入娛樂圈。勝和坐館明年就要交棒,唔知到時沙田 Me會唔會全職發展佢嘅娛樂事業呢?做娛樂大亨,點都高層次過江湖人。

吳國敬

喬寶寶

范振鋒

仙樂都

美國佬咬實大鼻

好頭痕,好頭痕!﹙設計對白﹚

澳門永利集團嘅「永利皇宮」,預計二○一七年就會落成,但呢排俾人咬住唔放,火頭仲燒埋上屆特首何厚鏵,事件關乎多年前一宗批地風波。話說位於美國嘅「國際執業工程師協會」( International Union of Operating Engineers),發現永利喺二○○六年獲得路氹地皮,竟然要另外俾五千萬美金,向大陸一間叫「天橋」嘅公司買地皮,而介紹天橋俾永利嘅中間人,竟然係花名大鼻嘅何厚鏵,中間搞乜鬼呀?

協會嘅發言人 Jeffrey Fiedler上個禮拜同爆哥都傾過電話,佢話奇就奇在,協會向澳門政府查詢天橋買入路氹地皮嘅記錄,澳門政府竟然俾唔到相關文件,佢質疑咁大單交易,點解澳門政府可以冇賣地記錄咁奇怪,永利又夠膽以五千萬美元,向所謂「地主」天橋公司買地,咁何厚鏵當中又係咩角色呢?對於呢件事,佢話會一直追查到底,嗯,睇嚟澳門好多人都有排頭痕!

六萬蚊自訂私家鹹片

正所謂鹹濕冇分國界,有香港鹹蟲去東洋尋歡,亦都有日本嫖客轉戰香港,鹹魚青菜各有各愛,都冇乜特別吖。點知呢排香港股市升,突然有批貴價日本妹來港搵食,真係貴到嚇屎你嗰隻。

爆哥日前收到老尖陀地細強嘅 WhatsApp,話有批日本 AV女來港,其中一個名叫唔知乜嘢禮子,都有啲名氣。中間人話收三萬,禮子又收三萬,爆哥即話,哇收六萬,你夠膽不如直接去搶啦笨。細強就話六萬唔係白俾,原來有新玩法,就係客人可以拍埋 AV片,自己一嘗做 AV男,趁青春留勁影咁話。細強講開日本 AV女,扮晒有同情心咁話戥佢哋唔抵,一般唔紅嘅 AV女,即使埋身肉搏拍片,都只係收折合萬幾蚊港幣咋,所以佢哋要出外「兼職」,香港仔情迷日本妹,又俾得起錢,自然過來同港男交流演戲心得啦。但爆哥都係嗰句,不如去搶啦笨。

日本妹身形不俗,但收費六萬實在驚人。

中間人以 WhatsApp傳來日本妹收費詳情。

開價六萬的賣點是,客人可自拍 AV片。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

鍾意就快D Share啦!