掃呢頁CODE去手機

2015年4月30日 星期四

𡃁模整餅 裙拉褲甩 [壹週刊 - 1312 - 財經] M1,



二人原先的部署是 Bambi(左)教做蛋糕、 Ringo(右)教畫班。當初堅持畫班不商業化, Ringo都要向現實低頭,暫停教畫的夢想,並協助 Bambi的蛋糕班運作。

壹盤生意

𡃁模整餅 裙拉褲甩

有「巨胸法拉」之稱、今年二十七歲的模特兒梁筠兒( Bambi),上過不少報紙,曾經當紅。有見「年老色衰」,開始要搵後路。去年十月,她在上環租了個二千呎地方,拉來好友、今年二十八歲的時裝設計師蔡欣宜( Ringo),教整餅及繪畫。二人同場,兩位靚女加精緻蛋糕,畫面自然美不勝收。可惜,缺乏生意經驗,裝修竟使了五十萬; Ringo又因畫班反應不理想,無心戀戰。 Bambi苦笑:「佢有啲藝術家脾氣,而家無心機再開。」𡃁模搞生意,開始裙有點拉褲甩。

擁有一副好身材的 Bambi曾經做過𡃁模,隨年紀漸長開始減產,轉型做生意,試過做網上服裝店、蛋糕店,今次更開實體店。

Bambi有不少威水史,有「巨胸法拉」之稱的她,曾與 Solar一起出席格蘭披治大賽、又為女士時尚雜誌《 Elle》寫 blog。她曾直言自己有青春有身材,不怕與其他人比較,但今年二十七歲,快將「𡃁模」變「老模」,她亦要面對現實搵後路:「而家老啦,唔夠後生女爭!」

記者來到 Bambi開設的 Coolala,教室,曾經以為𡃁模教整餅,客路會以男士為主,但原來顧客還是女士為多。其中也曾是𡃁模的客人彭慧君,就大讚蛋糕精緻可愛,還稱 Bambi是她來上堂的原因之一,「唔一定男仔,我係女仔都鍾意睇靚女。」靚女有優勢,加上曾做 model,認識很多公關, Uniqlo及 Benefit都因此來訂大批曲奇。不過缺少做生意經驗, Bambi不懂在曲奇包裝印上 Coolala標誌,錯失一個宣傳機會,後經朋友提點才識造公司貼紙。

而其好友 Ringo,原想在教室內空餘位置,教授台灣流行的禪繞畫。禪繞畫主要將大自然及建築中的圖像,拆解為簡潔的圓圈、條線、幾何圖形。無須擁有藝術底子,目的是讓人放鬆,進入冥想。可惜反應極差, Ringo失落表示,自己樣貌比 Bambi遜色,少粉絲,加上禪繞畫為小眾藝術,較難推廣,現時畫廊大部分時間都沒有使用,她亦呈半放棄狀態。本刊找來兩位專家,與她們分享生意之進退。

Bambi:「做訂單、時間長」

這個蛋糕是一位男士為女朋友慶祝生日而訂做,為這個價值一千四百八十元的蛋糕, Bambi斷斷續續花了兩天製作。

Bambi現時主力整造型蛋糕出售及教班,現時這個美女廚房有七成收入來自賣餅,其餘三成才是開班。 Bambi的造型蛋糕,主要以糖皮製作蛋糕面的擺設。做法不複雜,但極花時間,先要將蛋糕焗好,用刀切成心目中的形狀,再塗上一層薄薄的忌廉,把預先做好的糖皮蓋上蛋糕。糖皮就是煮溶了的棉花糖加糖搓成,之後就像玩泥膠一樣,把不同顏色的糖皮擠成各種不同形狀,再加一點水黏到蛋糕上。

Bambi對經營的狀況有點迷惘,「接 order睇落好賺,一個糖皮蛋糕九百八十元起,曲奇一塊都二十五元起,毛利有七成多。但接訂單花的時間好多,可能要五至六小時才完成一個蛋糕。但我明天一個蛋糕班,三個鐘頭就收到四千幾蚊,究竟賣餅同教班嘅時間,應該點分配?」

「開班時間難控制」

兩位靚女老闆沒有吸引到男士,報名上堂多是 OL,她們有時只顧講笑,錯過了 Bambi的教學重點都不知道。

正如 Bambi所講,開班需時較少,賺多數倍,「然而開得密就會好趕,總有人做得比較慢,唔想未做好都要趕人走。」以上星期六的蘑菇小屋蛋糕班為例,原定課堂兩點至五點,首先客人遲到一小時,之後氣氛熱烈,客人各自談笑,有些重點沒有留心聽, Bambi都有點勞氣:「剛才我都講過小屋旁邊的草,應該搓成長條再割開,不過你無聽到。你要快啲,人哋遲開始都快過你了!」最後又要花一段時間影相,以致原先五點落堂卻變了七點。「如果夜晚想開多一班,就一定趕不及。故暫時每個月只能開十多班,其餘時間做訂單。我好矛盾,想教多啲班。」

一點意見

雖然丟空這個畫廊空間,只放幾幅畫做畫展有點浪費,不過 Ringo對於藝術有堅持,相信曲高和寡都總會有知音人,不願教商業性的畫班。

本刊為 Bambi找來也是教整蛋糕的 Choco Bakery提供意見,老闆 Tony今個四月就開了二十八班,最多一日開三班,完全無問題。「我都明白開班嘅困難,有啲老師索性夠鐘就趕客。」不過他亦有些技巧可做 tips。首先 Tony設定規矩,遲到逾十五分鐘就不準上堂,因為事先說明,所以客人都接受。另外,教授時都有地方要注意,「有時客人會自己傾偈分心,所以說到重點時要大聲一點,同時眼神要堅定同保持接觸,這樣學生就會知道將要講的是重點,即刻專注番。」

不過總有些客人做得比較慢,或者對設計要求高,以致跟不上進度,「我會講明幾多分鐘後落下一個步驟,到時間差不多就會講一聲,同協助進度慢的學員。」到最後他還提醒課程難度不要太高,第一是減低學員未能及時完成的機會,其次是讓客人覺得舒服而下一次再報名來上堂,增加「翻頭客」。

Ringo:「唔識做宣傳」

Ringo說這一大磚牛油只能做十一個蛋糕,嚇了攝影師一跳,原來是她計少了十倍,應該是一百一十個。

Coolala在上環地鐵站附近,步行十分鐘就到,一入門就是原定用作開畫班的空間,約有一千呎,現只放了幾幅新進藝術家的作品。原本主力教畫的 Ringo,坦言禪繞畫是小眾藝術,「之前都有 facebook宣傳,雖然小眾,但無諗過反應會咁差。」小眾藝術當然要更多宣傳,二人說打算吸引報讀整餅班的學員參加畫班。但畫廊卻一幅禪繞畫都看不到,說了很久才知道問題出自 Ringo身上,「我都覺得好矛盾,因為禪繞畫好個人,我唔太想公開畫作,有心人自然會主動問。」

「轉型開 Party?」

每件曲奇都是全人手製作,逐塊去畫。當接到大客戶幾百塊的訂單時,就好比罰抄。

暫時未遇上有心人,不過始終要做生意, Ringo淡淡然說已經改變心態,「開頭都有唔開心,不過諗通咗,專程去台灣學整蛋糕幫 Bambi,發覺其實整蛋糕都有樂趣,禪繞畫之後再算了。」而空置的畫廊定位,計劃轉為最賺錢的租場開派對生意。因 Ringo的藝術背景,她認識不少藝術界的新進畫家,五月中就邀請了樂隊觸執毛主音阿水,免費在 Coolala開辦畫展。條件是他免費開班,教畫由 Converse贊助的布鞋。 Bambi和 Ringo希望,宣傳活動能提高知名度,吸引更多人來開 party、 event。

一點意見

不要以為是錫紙,在糖皮鮮花下包裹蛋糕的,其實是價值不菲的食用銀。

本刊找來星會館的創辦人 Alfred,為她們把脈。星會館主要租場予不同人士、機構舉辦活動,曾經接待過 Google、歐洲電訊等跨國集團,現時每月營業額接近四十萬。 Alfred曾經上過 Coolala的專頁,發覺沒有宣傳可以開派對:「睇咗一陣,我以為只開班,唔知可以 book場。」

親自到場參觀後,他覺得最緊要是提升格調,「天花板同廁所應該要裝修。原先五十萬的裝修價應該可以包埋,可能師傅蝦佢哋後生女。另外畫廊應該放多幾幅畫,最緊要包裝得高級。之後有兩個方向,一個是 private dinner,另一個是小朋友的生日會。」他指出 The Popsy Room以畫廊包裝後,一份晚餐的價格接近一千五百元,以這裡面積可以做到二十人。而小朋友生日會,賺得更多,「我有接過家長豪花兩、三萬元幫小朋友開生日會。 Coolala可以用畫廊做包裝,在生日會教小朋友畫畫,家長最鍾意,又或者教整馬卡龍,最緊要格調高級。每個月只做兩個生日會都夠,開頭可以搵人做媒,影幾張靚相放上親子網,好易傳開去。」

開業資料( 10/14)

租金:$105,000^

裝修:$500,000

入貨:$10,000

廚具、傢具:$185,000

總投資:$800,000

^兩按一上

營業資料( 03/15)

營業額:$95,000

租金:$35,000

人工:$20,000#

食材:$8,000

盈利:$32,000

#兩名老闆

鍾意就快D Share啦!