娛樂偵訊
心痛夏萍無依 秋生搞娛樂社工隊
七十八歲，獨居多年的甘草演員夏萍日前在家中跌倒受傷，十個鐘一直無人知曉，直至當晚無綫同事致電才驚揭意外。跟對方相熟的黃秋生事後非常感慨，想到不少資深演員晚年無依，他考慮組織娛樂社工隊，希望集合行家力量，為娛樂圈前輩出一把力。
整親尾龍骨
黃秋生一入行已認識夏萍，二人亦時有合作。本週一（十月二十六日），到醫院探望前輩時，秋生說：「夏萍姐好爛口、好有幽默感，我好鍾意佢。佢睇住我大，佢跌親，令我諗咗好多嘢。」
夏萍今次跌倒受傷，但傷勢不嚴重，身體其他地方亦無大礙，是不幸中的大幸。
「佢 OK嘅！跌親梗會有問題，老人家要啲時間。整親尾龍骨，你知老人家『扽』親 pat pat就好濕滯。但佢好硬淨，不過，我覺得佢好需要關心，同其他人嘅幫忙。」黃秋生說。
夏萍是獨居長者，黃秋生承認，圈中有不少獨居前輩，都需要別人關懷。
「我諗除咗佢，仲有其他前輩需要人照顧，我哋後生嘅，應該走埋一齊諗吓做啲乜。林家棟好有心，會搵佢傾吓。希望搵到十幾個人一齊，咁力量就大，大家可以從長計議。」
有工開就好
黃秋生認為在生活上着手，多方面關心老人家，簡單如傾偈、飲茶，或者開工接送。
「獨居嘅，搵人每日打個電話，單對單跟進。我哋又可以夾錢，幫佢買啲屋企嘢；甚至幫佢哋同公司溝通，大家都明，唔係個個同事都有耐性去了解老人家情況，所以有個中間人同佢哋傾，係會好啲。又可以搞講座，將佢哋嘅經驗同年輕人分享。」
不過，黃秋生亦深知在尊嚴下，娛圈前輩不輕易接受別人幫助。
「佢哋唔係一般老人家，做我哋呢行好似隻馬，一出世就企喺度，企到瓜嗰日。就算瞓喺度，一叫埋位我哋就企起身，好有尊嚴，做到最後一刻！所以你話入老人院，佢哋唔會願意入，唔會認老，唔會認唔記得嘢。其實對我哋最有效嘅治療，係開工就得㗎只要記對白、記走位，就有發燒醫發燒，有胃痛醫胃痛，要俾佢哋做嘢。」
希望後生團結
以黃秋生的認知，就算經濟有壓力，一班前輩都不會向人開口，要人幫手。
「我哋初步未必可解決到經濟壓力，但起碼可以付出關懷，等佢哋知有人喺身邊嘅。我唔可以話養起你，但起碼可以請你食餐飯，俾佢哋溫暖感覺好重要。」
由於娛圈社工隊的構思只在初步，黃秋生希望年輕一輩演員，也可以團結起來。
「借呢個機會，我呼籲行家，後生嗰班，多啲關心前輩，大家群策群力，諗吓有乜嘢可以做。」
靠自己
上一代藝人，大部分天生傲骨，認為做人應該自食其力唔靠人，例如琴姐李香琴，一直參與演出至 11年，開始因為腦退化才退下前線，至於現年已八十歲的羅蘭，亦一樣不婚不靠人。
劉家輝
現年六十四歲的劉家輝， 11年中風以致半身不遂，泰籍妻子離他而去，二人所生的一對子女亦要求他賣屋分錢，之後又發現女助手私下扣起過百萬片酬，幸有樊亦敏義助打官司成功追討，近年健康和心情亦逐漸好轉。
有讚有彈
作為台慶劇，《梟雄》備受注目，不少觀眾大讚秋生演技出眾，但亦有人嫌他在劇中的聲線太陰柔。對於收視，秋生抱平常心，認為盡人事順天命。
求王晶唔好再搞我
自去年佔中開始，王晶一直咬住黃秋生唔放，最近又狂插對方當年執導電影《新房客》票房差，又嘲諷他是猙獰影帝，嚇親師奶。
對於王晶的「監察」，他說：「最近有個人好關心我，唔明點解，所以件事好神秘，同百慕達三角一樣咁神秘。」秋生作了一個比喻，「舊年喺中環有個身家十億嘅有錢佬，追住乞丐踢佢，佢話我同你嘅宗教信仰唔同。今年佢又再追個乞丐踢，問佢點解，佢話因為你係乞丐囉！所以，我覺得呢個唔係理由，背後一定另有原因。我求佢唔好再搞我，我係咁衰㗎啦，爛泥扶唔上壁，多謝唔該！對一個荒謬嘅世界，只可以用荒謬嘅方法面對。」
撰文、攝影、攝錄：娛樂組
|
鍾意就快D Share啦！
|
|
|