訪問當日，天池穿上「 Need me? Call me!」求職 tee，跳出一潭死水的大台，為自己尋找有尊嚴的天地。
娛樂偵訊
擺酒別大台 羅天池拚死攤牌
大台兵荒馬亂！逃亡潮由小生花旦「傳染」至三四線層面，包括有份演出《張保仔》的羅天池。花了幾年時間儲夠錢下月補擺婚宴，人生正式步入另一階段的同時，也決定離開無綫。沒有陳國邦的懷才不遇，只想為自己尋覓更合適的立足之地。臨別大台，羅天池大無畏！踏入從未到過的高層房，攤牌申訴！
結婚冇錢擺酒
三年又三年！等咗五個三年的羅天池，最為人熟悉的角色只有《愛•回家》的律師樓同事阿登！定好四條一光棍節（十一月十一日），跟兩年前已註冊的大連妻子在港補擺婚宴，同時亦選擇離開工作十五年的無綫，結婚與劈炮，互有關連。
「我都三十七歲，係時候要有轉變。經濟壓力？咁多年都係 keep住長紅同赤字，過住吊鹽水嘅生活。因為咁，結婚咁耐都要等到依家先儲到錢擺酒。有家庭就有負擔，所以選擇跳出去。」羅天池說。
與大部分離巢同事一樣，傾續約時已不期望大幅加薪，更不敢奢望公司重視，唯一底線是尊嚴，總不能永遠啞忍，無止境被踐踏。
「佢（公司）覺得簽唔簽冇所謂，唔簽大把人等住簽！傾約總係令你 hard feeling，所以過往我都唔係傾（條件），係選擇做定唔做。」
高層召入房
講分手，羅天池被高層召入房「傾心事」！
「我當時同個高層講，好似我哋做咗十幾年，好有心做戲嘅，只為等一個機會，得幾場（戲）都會努力做好。但有啲新人，唔知係唔珍惜抑或掌握唔到，浪費機會。咁點解唔俾做咗十幾年嘅一班人試吓，只係肯俾幾場戲嗰啲新人當磨練。當時個高層都好好，佢話公司嚟緊會改變。」
陳國邦說他所發的公開辭職信，其實也是一封求職信。訪問當日，羅天池身穿「 Need me? Call me!」 tee，同一訊息。四年前，羅天池開始搵路走，主動向內地製作單位敲門，試鏡後往往只收到：「謝謝你，等消息吧！」直至最近，屢敗屢戰的他，終於踏出成功一步，可以北上拍劇。
《喜劇之王》現實版
無論身處幾多線，有幾多場戲，最本想賺到的是「尊重」兩個字。羅天池曾為多套電影做特約演員，其中一次，連飯盒都不獲分配。
真實場口：拍《少年阿虎》埋位第一日，放飯時間。
人物：羅天池與場務阿姐
羅天池伸手攞起一個飯盒……
場務阿姐：（大聲喝住）喂，呢啲你唔攞得！
羅：哦！（以為呢款唔攞得，改攞第二款。）
場務阿姐：呢個都唔係俾你食，係俾演員食。
羅：（心諗）點解呢個場口咁似曾相識！𠵱，咪係《喜劇之王》入面周星馳同吳孟達其中一幕，原來我係現實版。
馬明教路入行
01年，在加拿大讀完書返港的羅天池，見到電影《少林足球》有招募，於是一大早走去銅鑼灣排隊，諗住攞頭籌等面試。晨早七點，羅天池只係排第二。「排第一個係後來喺《少林足球》做趙薇饅頭店老闆娘嗰位（圓圖）。」
臨場先知原來要表演，冇準備的羅天池使出耍家本領：打拳。
「星爺睇完講咗句：『呢啲先至係打拳！』當刻我心諗：『今次有啲機會！』點知最後都係落空。之後我醒起中學時喺加拿大同我一齊做過話劇嘅馬國明，我問佢可以點入行，佢叫我學佢報無綫藝訓班。我係第十七期，同學有李霖恩、黃嘉樂同何綺雲（《愛•回家》秘書）。」
撰文、攝影、攝錄：娛樂組
|
鍾意就快D Share啦！
|
|
|