熱爆娛樂: 為賺錢乜都撈　黃又南賣生果大閘蟹 [壹週刊

2015年10月29日星期四

為賺錢乜都撈　黃又南賣生果大閘蟹 [壹週刊 - 1338] 又南,黃又南,M1,

探熱針

為賺錢乜都撈　黃又南賣生果大閘蟹

組合「 Shine」 07年拆夥後，成員之一黃又南轉戰內地，直至 12年在黃偉文演唱會中，「 Shine」再次復合反應好好，同年還有機會在紅館首度開演唱會，黃又南開始在本地回復人氣，拍戲為主的他更由配角變主角。密做賺到卻因要代父還債，冇錢剩！為賺多一蚊得一蚊，據知黃又南半年前開始，與金剛、喬寶寶等人在果欄開檔做生果批發，最近蟹季就連大閘蟹都做埋，任何𢱑銀機會都唔放過！

唔玩車儲錢買樓

去年，以網絡小說改編成電影的《那夜凌晨，我坐上了旺角開往大埔的紅 VAN》，票房口碑都見得人，帶挈有份孭飛的黃又南連接幾套戲，剛上映的《王家欣》，身為男主角的他，更獲加州一個獨立電影節頒發最佳男主角獎，是入行以來第一次。因為代父還債搞到周身街數的黃又南，近年就算搵得到，都唔敢亂 fing。

「老豆條財務數早喺五、六年前又南已經還晒，近呢幾年係還緊錢俾親戚，都清得七七八八，佢好開心，因為就嚟可以還清啲舊債，膊頭輕鬆番。自從孭咗老豆啲債上身，又南開始明白錢係要用得其所，以前佢鍾意玩車換車，而家有錢佢儲嚟買樓。」又南身邊友人說。

每當果欄有特別的水果，又南都會影張相放在果店的 facebook專頁，宣傳一下。

又南除了賣水果，食住時令賣埋大閘蟹，搏命搵錢！

陳敏之愛吃水果，難得好友金剛有份做水果批發，所以亦有抽空現身果欄，支持一下。

《城寨英雄》近期在果欄取景，陳展鵬開工亦不忘到三兄弟果欄撐場。

蝦頭、邵子風與黃建東特別到果欄幫襯，支持又南做老闆。

果欄明星店

只要有錢賺，黃又南再辛苦也沒問題。半年前，他與金剛、喬寶寶等人合作搞了檔「三兄弟果欄」做生果批發，靠圈中人脈，生意做得相當不錯。

「檔生果其實唔只佢哋三個人，仲有個圈外大股東。金剛、喬寶寶喺 TVB雖然唔多嘢做，但勝在多街坊識，大股東就係睇中呢一點，所以俾股份佢兩個一齊做，係小股東亦係代言人；又南嗰份就大份啲，因為佢真金白銀投資，本身亦同個大股東較熟。」知情者說。

力不到不為財，據知黃又南每星期都會抽出時間，親自到油麻地果欄巡檔。「佢哋主要做日本生果批發，夜晚十一點先開，做到朝早十點，又南佢哋多數半夜先會過去，有時啲圈中朋友落嚟揀生果，搞到好似明星店咁，真係幾好生意！」

除了批發生果，近期亦做埋大閘蟹，金剛會親自送貨，好落力。

「生果都有季節性，好似前幾個月啱食貓山王，佢哋就會擺多啲力喺榴槤度，嗰段時間喬寶寶做主力；到呢排啱食大閘蟹，佢哋就做代理，批發去其他鋪頭賣，而家好多 TVB人都搵金剛訂蟹。」

洪天明與老婆周家蔚是金剛賣蟹的第一位客人，得到好友力撐，金剛親自送貨以示感謝。

除了又南與金剛外，喬寶寶都是老闆之一，最近更與金剛為時令大閘蟹影宣傳海報。

電影《王家欣》講述一個關於「尋找」的故事，小品式製作竟令又南及吳千語奪得「美國加州獨立電影節」的「最傑出男、女演員」獎，令二人興奮不已。

搞埋眼鏡手錶

生果批發外，還有其他生意正在籌備中，包括黃又南即將推出的自家品牌眼鏡，還有和萬希泉（ Memorigin）合作搞鐘錶。

「眼鏡設計搞咗好耐，係同個朋友合作，年底前就可以推出市面；而萬希泉係香港陀飛輪腕錶品牌，創辦人沈慧林係又南好朋友，對方覺得又南係個充滿正能量嘅人，所以搵佢合作，設計手錶。」知情者說。