無人理
爆壹爆
德國童飛躍深水埗
爆哥喺街頭長大，深明咁樣長大心態唔會正常，好彩就只係侵略性強，唔好彩分分鐘變成反社會人格，眼見好多出來行嘅江湖中人，就係因為街頭長大所以特別心狠手辣。講咁遠，無非因為爆哥見到一個德國佬帶住三個小朋友喺尖沙咀行乞，赤腳喺條街食 pizza，一直無人理。
一家四口繼續喺香港四處流浪，好多人都見過仲上網出 post，上個禮拜仲一家人走去深水埗，結果搞到出事！
深水埗一向係十八區最貧窮地區，圍觀食花生嘅人就特別多，真係肯捐錢嘅人不多，幾十個街坊圍住議論紛紛：「外國小朋友好少乞食喎，陰功囉咁咁咁……」可能太多人圍觀，搞到個男童發晒脾氣，每當有途人舉手機影佢哋，男童好嬲追住途人嚟打，佢仲激動到發脾氣推跌垃圾桶，又或者跳上欄杆再飛躍落地。男童喺街上大吵大鬧，有個著住校服嘅女學生忍唔住勸男童，但德國老豆竟然若無其事，仲有心情自彈自唱，最後要警察到場了解情況。睇見咁，爆哥唔知講咩好，只係覺得三個小童好慘，淪落成為街童之餘，個小朋友仲好明顯仇恨圍觀嘅人，長大唔知會變成點。
嚇一跳 露宿者悲歌
呢排都有人手機傳閱，話旺角道行人天橋有自由行霸佔露宿，佢哋四周仲擺滿行李喼，就咁瞓喺條行人天橋上，爆哥了解過，查實拖喼唔一定係自由行，佢哋都係本地露宿者，只不過用五、六個喼做圍欄，欄內放了兩張破爛床褥，當係衣櫃同睡床。
有頭髮邊個想做癩痢？天橋衞生惡劣，地上堆滿垃圾，露宿者阿培話瞓街有苦衷，佢同爆哥講，失業後學人飲咳藥水，搞到有幻覺：「我連露宿者之家都入唔到，（點解呢？）因為我有精神病記錄，佢驚我會傷害到其他人喎，或者係以前吸毒的後遺症，咪唔俾我入住囉，咁我惟有瞓街囉！」政府睇來唔多理，爆哥經過灣仔柯布連道，同樣見到有露宿者用兩把雨傘支撐住一塊綠色帆布，搭建成簡陋帳篷，上半身睡在裡頭，兩隻腳則大字形伸出來，個帳篷只係冚住上半身，對腳就咁伸出來，成個跳樓案發現場咁，嚇人一跳。慘！
黑勢力 入侵區議會選舉
區議會選舉即將進行，今屆可謂奇人盡出，除咗《壹》仔早排踢爆嘅涉嫌自稱三合會中人參選外，網民更踢爆屯門區有涉黑勢力參選，仲有一大班 MK look造型嘅假傘兵加入區選造勢工程，江湖中人一睇就知，成班人都係來自江湖。
有手下向爆哥講，其實一班黑道中人，真係有江湖大哥喺背後出錢出力推動。依家江湖傳得最犀利就係，一個係做賭船嘅名人，另一個係城中知名富豪，因為佢哋想擦阿爺鞋。去年黑幫策動反佔中時，呢班人已經出錢出人加入行動，事後亦都得到阿爺讚叻仔。於是乎今年區選繼續落場玩，搞唔到泛民，都要搞到個選舉烏煙瘴氣，真真假假最終令市民生厭，拉低個投票率都好，咁就又可以立一功。
爆哥乜料
金融界撈家，穿梭黑白政商界，朋友遍布旺角至中環，每星期都八到
唔同料，同《壹》仔讀者過吓癮！
|
鍾意就快D Share啦！
|
|
|