網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年10月28日 星期三

終極放閃 張智霖:我同阿靚好到唔使氹 [FACE - 440 - 專訪] 張智霖,MF,



真人騷

終極放閃 張智霖:我同阿靚好到唔使氹

上星期才訪問過撈極都上唔到位、演得再好都苦無機會嘅陳國邦,今個星期輪到一出道就行男主角運、第一套電影就遇着老婆袁詠儀、經典劇《十月初五的月光》 15年後都仲可以翻炒做大電影的張智霖,呢個反差,實在係大……事實擺在眼前,你的樣子如何,你的命運也必相差很遠。

左思右想,除了初出道飛起許秋怡戀上袁詠儀叫做情路有小水花,張智霖這一路走來也未免太順暢,他承認幸運,同時也表示即使係張智霖,都有啲嘢得唔到。

講事業:「人會老,受歡迎會減退,始終有一日冇人想睇我,我都會 fade out,所以我成日提住自己,有得做就盡做,唔好太高姿態。」

講玩具:「我呢幾年鍾意買畫,最貴嗰幅幾百萬……但係都有買唔起嘅,朱德群嗰啲賣千幾萬,買唔起咪 download嚟做 wallpaper囉!」

講老婆:「我唔會氹袁詠儀㗎!我哋兩個都好到咁囉,仲使乜氹啫?但係再好都有完嘅一日,我珍惜呢段關係,係因為我成日提住自己,有一日會完。」

呢個時候,我又醒起陳國邦話,有啲修為有啲得着係要不停經歷挫折至會學得到……其實不見得。

最感動唔係流咗幾多眼淚,而係我忍過幾多眼淚

相隔 15年再演初哥哥,有冇諗過隔咗咁耐竟然可以再延續自己一個經典?

估唔到會隔咁耐……當時劇集以後洐生咗電影《跑馬地的月光》出嚟,但未成氣候,唔係嗰回事,但正係時間嘅釀令到《十月初月的月光》成為經典,我哋呢班演員就係一個橋樑,幫助大家懷緬下青葱歲月。

你自己拍,又幫唔幫到你自己想番起 15年前、 29歲時嘅青葱歲月?

會呀,就算係阿佘,都起碼十年八載冇合作,大家見番面,都幾陌生嘅講真……好難扮 friend。但係當一 action、一讀對白,即刻走出嚟好多回憶,呢種陌生嘅熟悉感覺好特別!尤其係佢叫「初哥哥」三個字……有啲嘢年代久遠咗,到底佢係做戲、係發夢、定真係喺我身上發生過會混淆㗎,我直頭覺得嗰個電視劇係唔係發生過、係唔係我嘅回憶。

套戲話君好走咗十幾年,你同陳喬恩有啲嘢時,佢又走咗返嚟?最後聽講仲要唔係 happy ending?好彩啲咁曲折離奇嘅嘢冇喺你現實生活發生啫!

真係好彩冇,因為好折磨,咁多年嘅感情百轉千迴,都係喺戲劇裡面嘗試好,現實我可能會頂唔順。太慘……相隔十五年再拍,我覺得好似段感情真係折磨緊我一樣,呢套戲最感動嘅位唔係我流咗幾多眼淚,而係有幾多次我要忍住唔好流眼淚……

你嘅現實生活未免太幸福、太順輰,你明唔明㗎?嗰種又要愛又唔可以一齊,十幾年後好似放低咗,對方又返轉頭嘅感覺?

我嘅現實生活好幸運,係真嘅。我哋係演員,想像力要豐富,就算係睇一本書,個影像都可以好立體,所以呢樣嘢係演技一部份。

無論事業定感情,你一早有代表作,一早遇到啱嘅人,係唔係真係好彩到咁?

當然唔係啦,每日都會經歷小成功小失敗,人生就係咁㗎啦。報導見到我嘅嘢都係好嘅多,唔好嗰啲我又唔係好講,亦都好識承受……挫折其實冇乜嘢,每次挫折我每次都學到嘢。

有得做就要做多啲,好快輪到我 fade out

比如話呢?上次經歷過嘅挫折係?

梗係有!你記唔記得七月嗰嗰小股災……直情係會輸到問自己:好哋哋做乜投資呀?諗諗下又冇乜所謂,全港啲人一齊經歷,有人陪好似冇咁嬲、好似會舒服番啲……我覺得除咗生死之外,其他都可以過到,冇乜嘢大事。工作上我自己認為比較順利,但身邊總有朋友會覺得我有一個階段好靜、如果唔係咁又會好啲……

你頭先話太太鍾意買衫、買相機同電子產品,你呢?一個成功男士嘅大玩具係乜嘢?

畫!我當買樓咁囉,啲樓買唔起我就買畫,畫都有佢升值能力。

我前幾年買咗一幅草間彌生,當時係三十萬美金,最近啱啱拍賣咗一幅同期畫差唔多大嘅作品,係九十萬美金……不過我唔會賣,自從呢個成功例子,老婆都好贊成我買畫。我又鍾意朱德群,鍾意抽像畫,但千幾萬買唔起嗰啲,咪攞嚟做 wallpaper囉!

最貴嗰幅買幾多錢?

幾百萬囉……(擺喺屋企?)唔敢啦……我驚阿仔攞個波省中佢,返到屋企幅畫多咗個窿。我有個地方專係收埋啲畫,溫度、濕度全部有控制。我最鍾意啲畫家,係每個人都有 signature,一睇就知係佢畫,我覺得演員都應該係咁,非佢莫屬嗰樣嘢,係成就嚟㗎:「呢個角色要係佢做至好睇!」

Cool魔是如何長成的

你係唔係呢種演員?

我反而想自己多啲變化,我係畫家都係咁話,水彩又得,素描又得,油畫都得……

但係太靚仔,係一個公認嘅男神,會唔會係負擔,令你角色冇得變化?有冇角色,你想做,但人哋唔敢搵你,嫌你靚仔得滯?

呀……冇喎,我接觸嘅好多角色都好好,做人又唔好咁貪心。我又唔敢好巴閉咁話自己靚仔得滯變成阻力,但我對自己做戲嘅功力會令人感動,呢樣嘢比外形更重要。

講真嗰句,旁人睇你,真係好羨慕:靚仔、受歡迎、有個好老婆有個乖仔、想要嘅嘢垂手可得,仲要喺呢行咁多年形象好,好少負面新聞……

但我有我嘅擔憂,你哋睇唔到啫……人會老㗎,受歡迎會減退,花無百日紅,終有一日我會 fade out……仲有辛勞,仲有日夜顛倒呢……成日辛苦到唔想做,但係都同自己講盡做啦,有機會嘅時候要做多啲,好快冇人想睇你,唔好太高姿態。

有冇嘢你想要,冇辦法得到?

冇!我需要嘅同想要嘅分得好清楚。想得到嘅嘢並唔係需要,而我需要嘅實質又唔係太多,好似畫咁,得唔到我個人都唔會辛苦。

人哋俾錢買快樂求安心 但我嘅快樂唔需要錢

教仔嗰套你又係點?

冇,完全冇寄望。佢過嘅係佢嘅人生,我哋能夠做嘅就係見證佢成長,喺側邊扶一扶佢,唔好指使佢做任何嘢,唔好將自己童年夢想擺喺佢身上……係唔係要學咁多嘢呢?會唔會扭曲咗呢?童年我覺得唔應該係咁……

袁詠儀同唔同意你嗰套?

當然有矛盾,媽咪同媽咪傾偈,好自然比較下,點解人哋咁多嘢做咁多嘢學,我個仔冇嘅。我唔知我係縱容,定還是睇得更清楚,硬係覺得學咁多嘢冇意思。因為我知道一樣嘢叫做「不迷不成家」,一家要專注先會係專家。有邊個又炒菜又彈琴又拉 violin會做得好㗎?馬友友淨係識拉大提琴,但佢係國際大師, Gordon Ramsay炒菜咪炒菜囉,唔會樣樣叻。我個仔叻邊樣,唔係我哋發掘,要靠自己……最慘就係啲父母叫佢讀 law讀醫,到佢讀完三十幾歲先話想夾 band,我身邊太多呢啲例子。

怕唔怕你個仔太幸福?受唔起挫折?

物質上佢唔係太豐盛,幸福,我覺得佢最幸福係得到爸爸媽媽嘅愛,我哋真係,一唔使做嘢就會陪佢。快樂嚟講,我唔覺係物質,你當我買架跑車,最快樂咪就係交條匙俾我嗰下……咪又係咁……

咁你個 friend郭富城買十幾架車,難道就係買交匙嗰下嘅快樂?

咁我又冇問佢點解,每個人都有自己一套方法,求快樂,同埋買一種心安。

你呢,最快樂係?

同屋企人一齊,同父母、同老婆仔女……女就未有啦,呢個快樂唔需要錢,但係無價。

點解嘅?你好似好少行差踏錯,係特登檢點?

我覺得因為好早有女朋友,好早公開,無形中佢就變咗我嘅金鐘罩……冇咗佢,我可能好放蕩都唔定……哈哈……邊個知呢,可能好寂寞都唔定呢?

袁詠儀唔使氹,因為我哋已經夠開心

父母喺你 13歲離婚,好多人都話父母離異會影響一世,有冇影響你對婚姻嘅睇法呢?

絕對有,阿靚喺警察世家長大,好嚴厲,我就喺大家庭生活,所以適應能力好強,好易開心好樂觀。你話婚姻,我諗潛意識可能有,都想家庭完整,但係我從來冇話一定要點、一定唔可以分開。

13歲都叫大個仔,接唔接受到父母離婚?

會㗎,手足無措,有時要去到老竇屋企至可以見到佢,媽咪再結婚,又要適應一個新嘅 step father,其實都唔到我感受,惟有係煮到嚟就食,所以我話我適應能力好強,好彩對呢啲改變冇乜不良反應。我同阿靚有交都會嗌,我覺得兩個人一齊咩都有啲嘅……但係點嗌都好,我唔會講分手、唔會講離婚,阿靚性格咁烈,都從來唔會講呢啲,我哋兩個都好珍惜呢段關係。

除咗呢樣,仲有咩成日提醒自己?

會成日提住自己呢段關係總有完嘅一日,一世係得咁多時間,好快就完結……𠵱家有得見、有得拖住,就好好去感愛體會。我哋會老,青春就只得一次,珍惜啦,唔好搞亂檔攤……第三者嗰啲搞到鑊泡咁,為咩呢?

2000年的初哥哥

2015年的初哥哥

想唔想像到……有冇諗過,你哋有一個有朝一日會唔喺身邊?

當然有,時常都會咁諗,死亡係修行嚟……

你同靚靚,你覺得邊個更有能力承受失去另一半?

我諗會係我,我處理得會比佢好啲……

竟然係你?外表上明明佢睇落硬淨啲喎!

係㗎……有時我去拍戲,都會感受下佢唔係身邊嘅感覺,呢樣嘢要預咗會好啲。我哋近排都傾過,佢話:「你真係唔好死先過我……」,佢會覺得冇咗個依靠。當然我都依靠緊佢,兩公婆就係互相依靠。

佢唔喺身邊時,最掛住佢乜嘢?

當然,我又唔太鍾意佢囉嗦、叮嚀,但有時有咗呢啲嘢,個人係會定啲……有時佢話去行街,我一聽就驚:「吓?又去!」但諗落,都係福氣喎,佢一去就拍幾個月戲,嗰陣時就會覺得好想陪佢行下街……

掛起上嚟,有冇山長水遠 send個 message同佢講?

咁又冇喎,咁肉麻!

點會肉麻?氹下都要㗎?

使乜呢?已經夠開心啦……

好閃囉!幸福到!

咁真係吖嘛,同佢一齊已經好開心,仲使乜做咁多嘢?好多人都以為啲嘢唔會完,我唔係,成日提住自己有完嘅一日,有嘅時候就要珍惜。即使係一個仇人,都有完嘅一日,咁憎佢做咩啫?

上代愛情故事

現代愛情故事 網上圖片

「集」近平

為咗套戲,張智霖呢個月一日閒閒哋走三場,排三五個訪問。

這天輪到本刊,已經是一個下午的第三壇,佢話自己俾閃光燈閃到精神恍惚走咗樣……

sorry囉,我唔覺,都係咁靚仔,都係要集郵……

試想像,一天下來張智霖要擺多少次笑臉?要被集郵幾多次?而他依然沒有露出半分難色,一換完衫自己笑笑口彈出嚟交人,仲要攬頭攬頸喎:「梗係要集唔集點得吖?我係集近平嚟㗎嘛!」

另一邊廂,我聽說有個又係做緊宣傳嘅阿姐,唔俾集郵唔俾埋身唧都唔笑全程啞嘅,全靠經理人傳話……我想話,抵 Chilam係 Chilam,抵佢路路暢通。

撰文:朱小博

攝影:范仲良

化妝: Ketty Kwong

髮型: Vic Kwan@ii hair& nail

形象: Bryan@the flaming

服裝: Dolce& Gabbana, Valentino

鍾意就快D Share啦!