警察形象近年大跌，《警訊》受歡迎會唔會有挽救到少少？「警訊之花」 Heily就話：「係兩回事，形象問題唔係一套劇就變番好嘛！雖然唔係話佢哋形象好差，但唔覺得我哋拍好啲佢哋，形象就提升咗囉！」
爆 Like王
《警訊》寸 689好睇過膠劇 警訊之花：想貼近後生仔世界
《警訊》竟然好睇過大台啲膠劇？係真㗎！近期《警訊》啲橋段又玩檸檬茶廣告又玩 689，睇到網友好興奮，其中樣靚身材正有成 34C嘅 Heily（馬溱禧）更被高登巴打封為「警訊之花」，最近一集更不借犧牲色相去色誘當鋪阿伯，巴打們集集追睇都係因為佢咋！
Heily喺《警訊》專演女騙徒，本身係香港電台嘅特約演員，合約好自由，所以演過電影又喺大台拍過劇，不過最大發揮都係《警訊》。唔好以為 Heily騙徒形象深入民心就好穩陣，查實佢喺現實中真係遇過騙徒，又有人開價 5萬陪 1晚，「騙徒」遇上騙徒，究竟後果係點呢？
F：《 FACE》 H： Heily
F：點解最近《警訊》變得咁好笑？
H：我拍咗 6年《警訊》，以前冇咁輕鬆㗎！近期想貼近啲後生仔嘅世界啦、現實啲嘅嘢啦，所以呢年幾兩年開始轉模式。演員都會參與創作，有啲 case發生咗我哋至會拍，通常睇完口供紙再寫故事，再對稿，喺稿入面睇下擦唔擦出到啲火花或者撞到好笑嘢出嚟啦，盡量諗 gag位，剩係講案件好沉悶嘛。
F：你一直演出都幾性感，係咪想令觀眾注意你身材？
H：嗰集當鋪賣金鏈係講用美色，所以係故意嘅，着衫方面係故意，少少性感我 ok嘅！健康囉但唔好暴露囉！再多啲要睇下咩角色同咩程度譬如喺我 fb見我啲 bikini相，其實係嗰集拍出海要注意事項，我冇理由着樽領啦，一定係泳衣；另外有啲生活照，係我平時係咁着嘅。（點樣 keep身材？）冇呀，我好懶，唔做運動；以前肥妹嚟㗎，我 162cm以前 130幾磅， 29吋腰喎，我咁矮咁重磅好似企鵝咁喇！之後慢慢唔食肥膩嘢減到𠵱家咁。個胸就冇刻意去令佢變大或者變細嘅！
F：你拍過大台劇覺得點呢？
H：我都係演啲冇乜對白嘅角色，拍過《愛．回家》，喺健身室有一、兩句對白，嚟緊有《實習天使》、《潮流教主》，陳豪有型又高大，好專業！一個人講成版紙可以唔食螺絲，好犀利！嗰場戲我做佢對手公司嘅秘書，佢冇同我傾過偈呀，見佢一唔使 row機已經係咁睇稿，你都唔會騷擾人哋喺大台份人工夠搭車食飯嘅……嗰日，為興趣啫，可以試多啲唔同嘅嘢嘛！
F：《警訊》出現 94135354689（九死一生唔三唔四 689）咁大膽？
H：嗰集想話畀大家知，呢組數字肯定唔係信用卡嘛！就算另一個 case講白牌車，又話我哋用 apps嚟 call車，網民真係精靈眼，（話）邊有呢啲車用嚟做白牌車㗎？點會畀 cash唔係畀信用卡㗎？其實我哋係知嘅，只不過唔可以喺劇情上直接反映邊間公司做呢啲行為啫；信用卡號碼令大家有聯想我就控制唔到，播出街之後冇事喎，我哋會繼續嘗試爭取更大嘅空間，睇下拍唔拍到啲嘢畀大家睇
F：有冇遇過真正騙徒呢？
H：有，中聯辦嗰啲，同埋前兩日有速遞公司打嚟，話上海有件嘢寄嚟又講唔出地址，又係咁問我地址，我話自己同寄件人聯絡就收佢線。當然做得《警訊》多係醒目啲，會叫屋企人小心啲，我媽媽六十幾歲有時懵懵地，我屋企都驗出受鉛水影響，有日有人上嚟話政府𠵱家立例要裝濾水器成千幾蚊，阿媽應門後叫醒我，我出去問係邊個部門呀？你個證件呢？嗰個人話係政府轄下部門，我話政府要裝梗係政府畀錢啦，你唔叫政府幫我換番啲喉？梗係唔畀佢入屋
攝影：林迅景
|
鍾意就快D Share啦！
|
|
|