網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年11月25日 星期三

念念不忘必有迴響 世界級廣告精選  What Makes a Good Ad? [FACE - 444 - 數碼科技] MF,

Major 念念不忘必有迴響 世界級廣告精選  What Makes a Good Ad? 做人冇 PR、唔得;做生意冇廣告、唔掂。世上第一則現代廣告,可以追溯至 17世紀的英國,用以登報賣書。時至今日,不論報章雜誌、電視手機定互聯網,只要有載體就有廣告,所以呢幾百年嚟,能夠登上世界級嘅廣告不計其數,而當中唯一共通點係 ...


Major

念念不忘必有迴響 世界級廣告精選  What Makes a Good Ad?

做人冇 PR、唔得;做生意冇廣告、唔掂。

世上第一則現代廣告,可以追溯至 17世紀的英國,用以登報賣書。

時至今日,不論報章雜誌、電視手機定互聯網,只要有載體就有廣告,所以呢幾百年嚟,能夠登上世界級嘅廣告不計其數,而當中唯一共通點係要夠到位,就如《一代宗師》裡面嘅葉問所提:「念念不忘,必有迴響。」

今次《 FACE》精選唔同界別嘅世界級廣告,仲有本地廣告人製作分享,並雲集世界出色廣告-《極品廣告片》放映推介。

當中會否令你哋念念不忘,記者唔敢 100%保證,但肯定嘅係必有迴響,好似近日 MasterCard搵嚟「負皮王」梁烈唯做代言人,大收「宣傳之效」!

世界級「負皮」 Masterpass by Mastercard( 2015)

MasterCard搵得「負皮王」梁烈唯幫手宣傳 MasterPass新支付平台,預咗被網民公審!不過,真心想問市場部同事,「狼人」曉治積曼號召力及唔上唯唯咩?何必要搵自己份工較飛?

世界級「有聲」 KFC點醬雞棒( 2014)

呢個廣告點拍、點 sell雞棒有幾正,已經唔重要,因為結尾「 21800000, call我吖」已經夠入腦。唔駛開聲,齋睇 slogan都已經 feel到鄭嘉穎把聲,印象難忘度遠勝任何一個快餐外賣 campaign。

世界級「惡搞」 Chanel N° 5香水( 2012)

搵男神畢彼特 sell香水已經夠 noise,再加上結尾以深情表情講句 inevitable(無可取代),不論男女 fans都暈得一陣陣!難怪日後盧海鵬惡搞版、豆腐火腩飯加強版,都毫無懸念地紅遍網絡。

世界級「劇力萬鈞」和記廣告系列( 1993-2005)

除咗「阿 May」、「 Can I have your number?」等對白,呢個系列仲見證本港電訊服務業發展、開拓楊采妮、全智賢嘅女神之路,亦令本地廣告前所未有地具故事性及追看性!各位 90後或者未睇過黎明原版,但總會睇過張家輝喺《黑馬王子》、《千王之王 2000》嘅誠意二次創作版吧!

世界級「代表作」 Apple ipod+ iTunes( 2003-2004)

Apple教主 Steve Jobs表示, 2003年 iPod「 1,000 songs in your pocket」係品牌最經典廣告之一,但喺唔少樂迷眼中, 2004年 U2用〈 Vertigo〉做廣告歌嘅版本先係代表作,事關當時聽到「 Hello, Hello」歌詞,唔駛問阿貴都知係講緊 iPod。

拆解本地社交平台大注目

(左起)

Ada Lee( Uth Creative Group數碼媒體總監)

Desmond So( Uth Creative Group執行合夥人)

一個成功嘅廣告,唔係單靠橋段有幾創新,表達手法有幾與眾不同,客戶最後 buy唔 buy先係最重要。呢個定律喺香港一樣適用,今次請來近年冒起最快嘅廣告團隊 Uth Creative Group主腦 Desmond So同 Ada Lee拆解本地製作,二人表示近日社交平台宣傳效用愈受重視,例如 AIA《愛在當下》廣告,郭富城同小女兒之間嘅故事原來係真人真事改編,感動 370萬 fb友!

F: FACE  D: Desmond So  A: Ada Lee

F:你哋之前製作過太興《 My Hero》、 AIA《愛在當下》廣告都得到唔少正評。喺你哋眼中,會點定義「成功廣告」?

D:廣告某程度上代表大眾文化,能夠將消費者喜好、生活習慣融入創作,引起正面話題,觀眾樂於轉載,都能夠稱上成功,所以近日 MasterCard梁烈唯廣告,絕對唔係成功例子!除咗我哋製作嘅太興、 AIA廣告,另外萬寧貓可愛又夠 iconic形象,都係其他競爭對手不能媲美。

Ada表示本地客戶對 fb宣傳效用仍有保留,但《愛在當下》嘅 370萬觀看人次,相信會影響日後唔少客戶對數碼平台嘅資源投放。

F:香港製作廣告成本一定不及外國,所以對你哋嚟講,要製作「成功廣告」有咩優勢及難處?

萬寧貓嘅可愛形象,加上力 sell健康、生活資訊,難怪跑贏大市!

D:我覺得係難處大於優勢。畢竟香港市場細,而且講求即食文化,所以唔會好似外國有咁長時間做廣告,而當然成本也低得多。加上香港人做廣告多係直接表達,唔會好似英國廣告耍幽默感,又或者泰國作品會笑料、感性並重。不過優勢都有嘅,例如客戶對廣告敏感度高,會樂於試新 idea、新平台以得到更多反應;佢哋開通與否,會直接影響廣告效果嘅好壞,另外因為資訊流通快,所以容許多產,構思唔同類型嘅廣告,例如本身冇預計 AIA《愛在當下》廣告會於社交平台有咁高 view數咁多人 like。

F:其實唔少外國品牌開始放更多廣告資源喺社交平台,喺香港嘅情況又如何?

太興《 My Hero》廣告唔只備受讚賞,仲奠定 Eric Kwok「港版 Iron Man」嘅世界級形象。

A:我哋見到傳統報章、電視廣告嘅影響力愈來愈細,網上、社交平台會日漸重要。即使香港客戶對社交平台 budget決策仍較審慎,但畢竟傳統平台唔會及得上社交平台、網上發布來得咁大互動,一上 fb即刻見到幾多人 like、幾多人 share,好似電影票房見到實時反應。

D:以前電視廣告買 air time播放成本甚高,𠵱家的確冇咁多品牌咁有錢做廣告,但其實平有平做,放 social media宣傳成本冇錯較低,不過勝在可以騰出更多資源做好內容,好似《愛在當下》搵到郭富城拍攝,又做到近 10分鐘微電影版本。

F:製作預算低咗,對你哋廣告人而言會否更難做?有咩建議畀有志入行的新人?

D:其實冇太大分別。以前廣告公司同客戶有伙伴關係,會一條龍承接所有相關事項,唔同近年會分拍片、 social media有唔同 party負責。不過呢行人工、工時唔會及得上做金融、地產咁好,但當中由創作至完成一個工作嘅滿足感係無可代替,如果新人想入行,當然要有心,同埋衡量自己係咪適應能力高,可以同唔同人共事嘅 team player。因為廣告行業講求團隊精神,如果開幾次會都發覺自己融入唔到,應該唔會喺呢個圈子逗留得耐。

A:我主力負責 digital部門嘅工作,反而會覺得年青人入行較適合。畢竟佢哋生活同網上世界不可分割,會比年長同事較易 pickup。但當然冇心入行係唔會做得長,同埋要多留意唔同類型嘅資訊、市場調查、報告,了解更多時下人嘅喜好及生活習慣,先會做到更出色嘅作品。

資訊 update 新手必睇推介

http://PSFK.com

了解潮流大勢、市場報告並融入作品,令其更具說服力。

http://Wired.com

睇盡科技、設計新鮮事,隨時有 idea可以融入廣告創作。

http://Adsoftheworld.com

最 top廣告集中營,兼有 blog有 forum留言討論,來個外國、本地創作交流。

http://Adcritic.com

緊貼廣告界最新現況,新手取經必備。

世界精華遊 泰韓拉丁異軍突起

不論世界唔同地方,廣告同日常生活已經不可分割,所以拍攝題材不忘取材自現行時勢及潮流元素。想一次過以光影探索全地球不同文化,不妨一睇於 agnes b電影院放映之《極品廣告片》。活動策劃人 Teresa Kwong及 Roxane Tsui表示, 5個放映節目集結英美日泰韓西葡等地之傑出廣告片,選材唔只要商業及藝術價值並重,仲要一擊即中一見難忘。

2015西班牙及葡萄牙語系廣告節精選+ 2015亞太廣告節精選[Part 2]

拉丁語系作品結合魔幻與現實,只此一家。另備港日澳創意精品,睇到會心微笑。

2015美國 AICP廣告大獎精選

話晒得獎作,無論表達內容、技術,以至代言人都係走在潮流尖端吧。

《 2015亞太廣告節精選[Part 1]》

亞洲廣告強國-日韓泰印作品全面睇!

2015 CLIO廣告大獎精選+ 2015英國金箭廣告大獎精選

CLIO稱得上「廣告界奧斯卡」,點燈之作絕非浪得虛名。同場另有英式幽默代表選,不論係咪懷殖民嘅舊都值得留名學嘢。

2014韓國影像廣告節精選

要識韓流,梗要睇埋當地廣告,深入了解「韓」情。

F: FACE  T: Terese  R: Roxane Tsui

F:喺你哋眼中,怎樣才算是「極品廣告片」?

T:廣告片畀人嘅感覺好多時只作節目同節目之間嘅間場,但其實當中體現得到當地商業、藝術文化發展。我覺得「極品廣告片」必須一擊即中,喺 30秒廣告時間裡面帶出產品,令人一見難忘。例如唔少 Guinness廣告都唔只 sell啤酒咁簡單,仲包括唔同符合品牌身份嘅 campaign,令形象更鮮明。

R:我覺得必要有令觀眾難忘、睇完會 loop住嘅成份,例如當我想飲茶,就自然會諗起某個 branding。

F:你哋會以邊啲準則,挑選今年《極品廣告片》放映嘅短片?

(左起)

Teresa Kwong(香港藝術中心助理節目總監)

Roxane Tsui(香港藝術中心項目經理)

T:《極品廣告片》節目名為「 Art of Commerical」,所以當中會包含產品及藝術層面嘅探討。因此當中挑選嘅作品,唔只單由商業性出發,具有娛樂性、創意,包括有趣電影語言嘅作品都係考慮因素,務求繼續獲觀眾歡迎,以及吸引業界朋友取經。

R:當中除包含世界各地得獎廣告片,如《 2015 CLIO廣告大獎精選+2015英國金箭廣告大獎精選》,我哋認為能夠改變世代嘅溝通方式,帶畀觀眾唔同觀影感受嘅作品,都有挑選在內。畢竟香港無咁多途徑可一次過接觸世界廣告精華,能夠畀觀眾咁樣嘅體驗,都係一件特別事。

F:你哋覺得有邊啲國家嘅廣告片製作及構思係愈做愈好呢?

以為關《阿甘正傳》事?實情係《 2015英國金箭廣告大獎精選》作品。

R:亞洲地區,好似泰國、印度、韓國嘅製作,喺近年有較大嘅進步,我哋除設有《 2015亞太廣告節精選[Part 1]》節目外,更為韓國影片特設《 2014韓國影像廣告節精選》,可見該地製作嘅關注度。

T:我同意 Roxane所提,泰、韓兩地嘅廣告係值得留意。泰國有唔少有趣人才,而廣告本身着重故事性,好像早前當地 FB有一個保險廣告,以狗仔忠心幫助路人,代表該公司能盡心盡力為客戶服務,係貼近生活嘅例證。至於韓國廣告多用明星代言,而又會好似英國廣告鍾意玩食字,有意思得嚟,又容易引起當地人共鳴。除此之外,拉丁語系廣告都喺近年備受注目,佢哋本身市場大,有更多資源玩唔同元素,而且當中魔幻加現實交錯嘅表達手法係當地獨有,其他地區較難搵到。

F:何以今次節目只有少數本地作品放映?你們又點睇香港廣告呢?

幸福傷風素系列廣告仲結合嶄新動畫創作,成為 Teresa及 Roxane近年最印象難忘嘅本地廣告。

T:以往都有香港作品精選,但出於時間問題,未必夾到合適數次放映,所以作出取捨。至於香港廣告,我會睇到近年雖然唔少廣告公司北移,令製作經費冇以前咁多,不過同時亦容許 localize,如維他奶「搭訕」潮語廣告,又或者幸福傷風素「幸福要行多步」等作品。

R:畢竟只有 5個放映節目,但又想盡覽世界各地唔同影片,所以只有《 2015亞太廣告節精選[Part 2]》裡面,有少量香港作品放映。我覺得近年香港廣告發布平台唔只傳統電視或報章,對網上平台都相當重視,所以造就當中有唔同版本出現喺電視、 FB、手機 app。好似 Teresa所提幸福傷風素廣告唔只 sell產品咁簡單,仲配合成個 campaign推出,同觀眾之間有更大互動,例如畀觀眾 share自己幸福一刻, sell埋品牌地道形象。

《極品廣告片》

日期:即日至 12月 6日

地址:灣仔港灣道 2號香港藝術中心 agnes b電影院

票價:$65、$45(全日制學生、六十歲或以上長者及殘疾人士票價)

查詢:http://www.hkac.org.hk/tc/calendar.php?t=u&p=2&id=1837

撰文:蘇家華

攝影:傅新發

鍾意就快D Share啦!