2016年3月3日 星期四

火爆姐狂插小人黨 [壹週刊 - 1356] M1,

爆壹爆火爆姐狂插小人黨爆哥其中一個紅顏知己,人稱火爆姐。上星期,佢去深水埗富昌邨唔知搞乜時,離遠見到公園位置冒出濃煙,心諗唔通又發生騷亂,佢咁八當然行近啲睇吓有冇水抽啦,原來係有個師奶喺草地上打小人。火爆姐即時着火,打小人,做乜唔去鵝頸橋呀?做乜喺草地搞搞震?而呢個神婆連燒冥鏹嘅聚寶盆都冇個,直接喺草地上燒,搞到一片嫩綠嘅草地變成黑蚊蚊,仲遺下一大堆灰燼,真係叉燒你個鉸剪呀,咁冇公德心。火爆姐即刻 ...


爆壹爆

火爆姐狂插小人黨

爆哥其中一個紅顏知己,人稱火爆姐。上星期,佢去深水埗富昌邨唔知搞乜時,離遠見到公園位置冒出濃煙,心諗唔通又發生騷亂,佢咁八當然行近啲睇吓有冇水抽啦,原來係有個師奶喺草地上打小人。火爆姐即時着火,打小人,做乜唔去鵝頸橋呀?做乜喺草地搞搞震?而呢個神婆連燒冥鏹嘅聚寶盆都冇個,直接喺草地上燒,搞到一片嫩綠嘅草地變成黑蚊蚊,仲遺下一大堆灰燼,真係叉燒你個鉸剪呀,咁冇公德心。

火爆姐即刻上前鬧爆佢,點知神婆睬你都傻,繼續做法事,仲用唔鹹唔淡嘅廣東話大聲反駁:「打你個小人頭,打到你有氣冇得抖!打你隻小人腳,打到你冇鞋挽屐走。」得戚到佢吖,火爆姐話要即刻報警,個神婆先至識驚笠水,話下次唔敢,懇求火爆姐俾次機會,旁邊疑似客人嘅女人,就猛咁解釋立場,話自己出於好奇先嚟陪佢乜乜乜,搵鬼信咩。

之後火爆姐大聲警告佢哋,真係咁得閒冇嘢做,無端端一大片草地燒晒,激死人!

點解中國人咁愚昧,為咗迷信搞到亂七八糟。

和尚爆粗問候人全家

定慧寺個大陸來港嘅女住持釋智定,自從去年被踢爆兩度下嫁大陸和尚,搞到出家人形象一鋪清袋,事件過咗冇幾耐,爆哥行街又見到佛門臭事,有個和尚居然周街爆粗鬧人。話說九龍東潮人聯會早排喺藍田配水庫遊樂場,舉行新春祈福法會,爆哥見到一個師奶同和尚對鬧,個師奶高八度尖叫:「你班×街!喺度搵食,好臭呀!」

估唔到個和尚抵唔住頸,居然爆粗大鬧番轉頭:「咁多人死唔見你死!你個杏加橙!」嘩!和尚叫人杏加橙,仲爛口過爆哥條女爆姐,喂,出家人斷絕塵緣,做乜無端端問候人全家,真係參禪參到你懵咗。睇番資料,法會由釋立幻大師同一班僧人誦經祈福,當日有中聯辦官員同民政局副局長去做嘉賓,明解明解,對住呢班騎呢怪,近墨者黑,自然和尚都變妖魔。

暴力男遊行反暴力

呢單嘢真係夠晒黑色幽默,上星期鄉議局喺中環遮打花園,舉行乜鬼「反暴力 撐警察」集會,大鑼大鼓譴責年初一晚旺角嘅示威者。又係新界佬吹雞撐政府搵着數,聽見已經想嘔,但都出動咗一百架旅遊巴,接載村民出中環。大會聲稱有六千人參加集會,認真聲勢浩大。唔少新界猛人都有出現,好似鄉議局主席劉業強、兩個副主席張學明同林偉強、十八鄉嘅梁福元、上水嘅侯志強同埋八鄉嘅四眼民。

爆哥都有受邀出席,仲見到網上紅人排骨哥(箭嘴)添。邊個排骨哥,你咁快唔記得?呢,咪就係早幾個月前,玩謝一個入圍村追債嘅金毛收數佬,仲要逼人飲香爐灰可樂嗰個排骨哥呀,條片加埋過百萬點擊。當日佢同成班圍村兄弟出去中環參加集會,仲好落力大聲叫:「反對暴力。」扮晒正義凜然。咦,排骨哥,你老哥以暴力響朵喎,家陣你出來撐警反暴力,即係暴力黑社會都係愛國愛港撐警察反暴力,頂,好亂呀。

爆哥乜料

金融界撈家,穿梭黑白政商界,朋友遍布旺角至中環,每星期都八到

唔同料,同《壹》仔讀者過吓癮!


鍾意就快D Share啦!
Related Posts Plugin for WordPress, Blogger...