娛樂偵訊
想早收工 龔嘉欣扮暈
播出接近四年的處境劇《愛•回家》，做到四月一日就正式收檔！近日新舊《愛•回家》成員聚首一堂趕埋尾，點知在新一輯做女主角的龔嘉欣，自以為由姐仔變阿姐，竟然擺大牌款，對基層工作人員黑口黑面冇禮貌，但見到導演監製又另一個樣。上星期在電視城拍大堆頭結婚場面時，龔嘉欣更加玩嘢扮暈，使計逼劇組跳拍自己戲份。
可惜，奸計不得逞，醜死！
自以為是
投無綫已經八年的龔嘉欣，一直游走於三、四線，角色不是做妹仔就是「阿邊個」細妹，直到去年，有機會在新一輯《愛•回家》由閒人變主角，拍住新人張振朗同坤哥（吳業坤），初嘗孭正滋味。
一朝得志！就算劇集口碑超差，收視被拖累跌到歷史性新低，只得二十點邊緣，一樣無阻自以為上了一線的龔嘉欣氣焰。
「自從做咗女主角後，佢（龔嘉欣）對啲 PA同服裝阿姐就黑口黑面，又成日埋怨服裝間啲阿姐唔留啲好嘅衫俾佢，郁啲就走去同導演監製投訴；不過見到導演級以上嘅人，佢就另一副面口，仲成日放晒電咁，但佢做得太明顯太肉酸，大家都喺背後笑佢。」一名幕後人員說。
上星期四（二月二十五日），劇組拍煞科婚禮大場面，新舊《愛•回家》演員到齊。劇情講馬子妮（蔣家旻）同利樂兒（龔嘉欣）一齊出嫁，但戲份依然以劉丹的馬家為主，加埋律師樓一班演員人多勢眾，所以劇組一早 plan好，先拍馬家成員的戲份。至於龔嘉欣、坤哥同張振朗一班新演員，就要等！
詐暈打尖
點知龔嘉欣「人急智生」，竟然同導演訛稱自己唔舒服，可以早點收工休息為理由，要求先跳拍她的戲份。
「梗係唔會理佢導演按計劃進行，拍晒丹爺（劉丹）同馬家好（徐榮 B女）啲戲先，放咗老人家同小朋友走先。佢話自己唔舒服，導演咪叫佢休息吓先，點知隔冇幾耐，佢突然當住大棚人，慢慢咁跣咗落地下，暈到無晒知覺咁！當時企喺龔嘉欣隔籬嘅張振朗叫佢都冇反應，跟住導演就好大聲話：『有人暈咗，要 call白車同埋通知上面（高層）。』
「一聽到 call白車，佢就即刻彈番起身，話冇事可以繼續，啲戲屎到呢……」工作人員說。
發燒七日入院
對於想打尖，搞到詐暈的龔嘉欣，依然理直氣壯。
「其實之前我發燒一個禮拜都唔好，（開工）嗰朝先出院，醫生都唔 suggest（出院）……同監製講好咗請半日假，下晝先返去拍嘢；我只係需要同監製、導演交代囉，好難同所有台前幕後嘅人都交代……（有人覺得你對唔同人就唔同態度，好分階級！）是非一定會有，都預咗有呢啲新聞，笑吓就算囉！」龔嘉欣說。
打回原形
Model出身的龔嘉欣現年 26歲，曾做過有線電視體育台及財經資訊台主持， 08年簽約 TVB，拍過多套電視劇，但只做閒角；直至 14年，先後在《金枝慾孽貳》及《師父，明白了》獲安排較重角色，其後更被欽點在新一輯《愛•回家》孭正，可惜好快已經打回原形。感情方面，龔嘉欣經常被指向拍檔放生電，更先後與鄧健泓、吳業坤、袁偉豪等小生傳緋聞，是非多多。
撰文、攝影、攝錄：娛樂組
|
鍾意就快D Share啦！
|
|
|
