醉到雙眼成一線的 Paco，由梁烈唯拖實離開。
娛樂偵訊
無綫人扮太陽友 梁烈唯傍實 Paco搵出路
演藝一般、外表平庸、人緣差、評價負分……唔緊要，只要識擦，就冇死！
最佳人辦梁烈唯！榮登負皮王，大台嫌棄冇劇拍，加上發歌星夢，伺機而出，攝位埋身傍實金牌經理人黃柏高。上月太陽娛樂春茗，梁烈唯當正自己是旗下自己人，由頭坐到尾又上台影大合照，再跟住 Paco尾同洗米華等一眾太陽娛樂高層去消夜，公公般服侍周到，換來在即將開拍的電影中，演出一角，得來全不費功夫！
鬧爆無綫
自視過高的梁烈唯，去年向網友挑機承認自己擦鞋，令負皮指數不跌反升，結果惹來廣告商嫌棄，連無綫內部的監製都怕被拖垮，開劇唔用！即使氹得掂余詠珊，可以留低主持《男人食堂》，但一切已大不如前。梁烈唯於是開始四圍唱大台不顧藝人生計，同時亦四出探路，為自己謀福利。
「唯唯喺外面四圍𢱑撈，又係咁鬧無綫，話自己俾網友圍剿，公司冇幫佢解圍，仲暫停安排佢拍劇，極之現實。」知情人士透露。
傍實 Paco
梁烈唯自求多福，睇準太陽娛樂水頭足，開戲出碟又招兵買馬，於是鎖定黃柏高做目標，擦擦擦！近幾個月，已經取代沈震軒，傍實 Paco出席飯局。就連太陽娛樂藝人飯局，負皮王也是座上客，令大家滿頭問號。
「公司 gathering無端端有個無綫人响度，但冇人敢問，只係見佢成晚同 Paco係咁飲，好似好 friend。」一名太陽娛樂員工說。
據知，曾參加《星夢傳奇》的梁烈唯一直發夢想做鄭俊弘第二，出碟開演唱會，可惜公司冇反應，他便咬實 Paco，搏個機會。但除了酒醉，平日 Paco勁清醒，做歌星，梁烈唯大可死咗條心，但負皮王仍有啱使之處，太陽娛樂開戲， Paco答應預埋佢。
跟尾陪玩
雖然未正式做太陽人，但梁烈唯已經當正係自己友。上月太陽娛樂春茗，他一早到場坐足全晚，吹雞公司藝人上台影大合照時，梁烈唯亦衝埋上台一齊影，完全當無綫冇到。
「大家都知梁烈唯係無綫 management，公司亦無交代過佢嘅身份，只知道近排同 Paco玩得好埋，但冇諗過可以咁厚面皮，公司自己人影大合照都黐埋嚟。」一名太陽娛樂職員說。
春茗散席後， Paco同洗米華，以及一眾太陽娛樂高層拉隊去佐敦食消夜，冇公司藝人跟去，偏偏只有外人梁烈唯。凌晨兩點， PacoG步離開，負皮王發揮公公本領，落手挾「新老細」出門口送上車，可以有戲拍，梁烈唯冇白費功夫！
擦鞋精
千穿萬穿，馬屁不穿！入行 17年的梁烈唯，擦功絕對比演技高強，多年來，擦掂唔少名人明星，黐做菠蘿雞搵着數！
余詠珊高抬貴手
愛將梁烈唯因負評太多，余詠珊被迫腰斬《男人經》真人騷，之後梁烈唯為信用卡拍廣告，亦旋即被網民發起剪卡行動。梁烈唯為求自保，向高層余詠珊落足鞋油，令他有份參與的《 Do姐去 Shopping》得到「全屍」出街，幫手挽救谷底形象。
撰文、攝影、攝錄：娛樂組
|
鍾意就快D Share啦！
|
|
|
