《蘋果》獨家專訪 首嘗屈辱激勵遇神殺神
大劉24歲割膽 冇錢出院痛哭
【劉鑾雄講大劉】
現年65歲的大劉劉鑾雄坐擁逾2,000億財富，名列香港十大富豪榜第四位，有股壇狙擊手之稱的大劉，在商場上叱咤風雲，以為大劉的人生一帆風順，原來，24歲時他接受割膽手術，因沒錢出院痛哭，首嘗屈辱的大劉自此遇神殺神：「嗰時邊個擋我就殺邊個！」
大劉日前在中環接受《蘋果》獨家專訪，親口細數曾被迫害的歲月，激發他起革命：「嗰時邊個擋我就殺邊個！」
香港富豪劉鑾雄的一生充滿傳奇，低調的他絕少接受傳媒訪問，日前在中環華置接受《蘋果》連載專訪「劉鑾雄講大劉」，首度披露自己過去60年，鮮為人知的流金歲月，由孩童時代、打造事業王國到最後一個女人，大劉親口剖白事實真相，真的假不了，假的真不了。
大劉自爆24歲割膽無錢出院，要問工人借錢，受屈辱令他在病房痛哭。
大劉自小獲母親疼錫，故長大後侍母至孝。
大劉公開童年舊照，十分珍貴。
「槍桿子裏出政權」
霸氣大劉甫開腔即駁斥錯誤傳聞：「第一，報道話我向同學仔借錢入電油，我再講多次冇咁嘅事，我一生人第一次同人借錢，你估都估唔到我同邊個借，就係我屋企個工人，借咗五、六千蚊出院，因為我喺醫院做咗手術，冇錢出院，冇人肯同我找呢條醫院數，我又冇積蓄。因為以前我係使阿媽錢，我都唔需要有積蓄，阿媽買隻錶畀我二十幾萬，已經可以買到一層豪宅。」
原來，大劉於24歲時入院割膽，怎知卻沒錢出院，一個大男人在病房悲涼痛哭！問到疼錫他的母親呢？大劉說：「咁佢唔喺香港嘛！有時睇電視劇，古裝現代都好多呢啲慘變，當一個人叻嘅時候，就會有好多人圍攻你，我阿媽間工廠以前好豆泥，一年生意額做三百幾萬，第二年我已經變千幾萬，而且我係阿媽公司嘅大股份，所以啲人咪郁你囉。冇人同我找數，先逼我起革命。」
問到出院後是否好嬲？大劉霸氣地說：「乜嘢嬲吖，嗰時邊個擋我就殺邊個，我唔怕同你講，首先，同工人借咗五、六千蚊出院後，知道唔係『槍桿子裏出政權』唔得，所以一定要自己出嚟起革命。」大劉發迹後想報答工人恩情，可惜工人在87年股災後中風離世，令大劉十分抱憾。而對於大劉自爆24歲接受割膽手術，家庭醫生方玉輝昨在電話表示，如果生膽石不處理會有很多後遺症，包括膽囊發炎，甚至個膽會穿。割膽後初期身體會有輕瀉問題，之後慢慢會適應。
大劉18歲時在加拿大買第一架車，價值5,000加幣。
大劉自言從沒買過二手車，他在外國讀書時，母親送全唐人街最靚的車給他代步。
「唔使用錢追女仔」
至於當年傳大劉在外國讀書，要問同學借錢追女仔，他堅決否認：「一定、完全、絕對冇，第一，我喺多倫多住嗰陣時，家姐細佬妹喺度，如果我手緊隨時可以同佢哋借；第二，當時個個學生都好窮，租房係二十幾蚊加拿大紙，邊個借到畀我？如果唔係報道作出嚟，而係有人講，嗰個人就係有心抹黑，而且我喺溫莎大學時驚畢唔到業，好畀心機讀書，嗰時已經有固定女朋友，冇話四圍追女朋友，我肯定同你講，我喺多倫多嗰幾年同溫莎嗰兩年，完全冇試過問任何一個同學借錢，同埋我阿媽好錫我，當我啲錢仲有十日八日用完，我已經打電話畀佢。」
笑問大劉使唔使用錢追女仔？他說：「唔需要，因為我架車好靚，全多倫多唐人仔最靚架車，所以啲人話我買二手車，借錢追女仔，呢啲唔係誣衊，係夾硬作出嚟，專登詆毀我抹黑我！肯定呀，百分之一千呀，如果有借錢追女仔，絕子絕孫！」
採訪：陳月媚
攝影：陳俊強
後生時的大劉不時周遊列國，享受世界。
大劉五兄弟姊妹都十分孝順母親。
大劉否認有借錢追女仔，否則絕子絕孫。
【Timeline】手機用戶請按此，瀏覽「傳奇狙擊手劉鑾雄 」: http://bit.ly/LAU-timeline
【話你知】同大劉有關係嘅名人、美女有幾多? 即睇「大劉人物關係圖 」: http://bit.ly/JosephLau
|
鍾意就快D Share啦！
|
|
|
