一九九二年出生的郭頌賢，曾在芝加哥大學修讀，讀完一年後寧願申請停學創業，認為創業三個月好比讀一個 MBA。
中環人語
Start up明星 有個猛料銀行爸
一班年輕 Start up創業者，都以 Handy Phone創辦人郭頌賢（ Terence）為偶像，今年才廿五歲的他創辦 Handy，在全港三至五星酒店內出租手機服務，生意愈做愈大拓展至新加坡和泰國，公司又獲得 TCL（ 1070）及富智康（ 2038）垂青投資入股，未上市都已經募集到三千五百萬美金，成兩億七港銀。
雖然 Terence都係叻仔，入讀芝加哥大學，為創業寧願停學，佢啲同學仔都投以艷羨目光，但其實虎父無犬子就真，其父就是前高盛星級私人銀行家——郭德勝（ Kenneth Kwok），曾經係佢嘅大客包括四叔李兆基和郭鶴年等大孖沙，兩父子餅印一樣； 2013年 Handy在香港率先獲得四叔旗下美麗華酒店採用，所以話呢啲人脈唔係個個老豆有㗎！自從金融海嘯郭德勝離開了高盛，先後轉投德銀及瑞銀，聽講與馬雲相熟，囝囝呢盤生意分分鐘可以有大發圍。
投票不忘修行
週日在會展的小圈子選舉，見證俗世為權為利之鬥爭，點票期間，有位選委雙手合十，閉上雙眼，口中唸唸有詞在誦經，其舉止恍如在點票中心的一道清泉，他就是旭日集團楊氏家族兄弟之一——做製衣起家的楊勳，他與兄長楊釗皆是虔誠佛教徒，不時都支持在大嶼山昂坪的「梅村亞洲應用佛學中心」活動，等香港人有機會遠離俗世有個禪修之地修行修行。
中環寸嘴：終於明白「某君」的真愛．真味
在富豪飯局中，啲友仔總是有個疑問解唔通，就是城中的「某君」，無論「食」嘢嘅口味同「玩」嘅口味都愈來愈返璞歸真，去過九龍灣工廠區新開嗰間法國餐廳「 Le Pan」，終於參透到箇中玄機，開始明白城中「某君」如何試到一如「真愛」嘅「真味」呀。
呢間餐廳樓底夠晒高，誇張過旺角朗豪坊，嚇鬼死人，幾乎威過你坐喺中環食咁滯，全間餐廳都用白色雲石裝修，不過就唔知邊個國家貨色？ Serve我個妹頭以前喺四季個 Lounge做過，又喺金鐘 Upper House做過，問我認唔認得佢，我話：「你轉咗髮型咯！」一見到我就打招呼，晏晝食 lunch都俾間房我，張枱冇 pepper又冇鹽，上菜時問吓有冇 freshly grinded pepper，吖，個妹頭話：「對唔住，我哋個廚唔 recommend，希望客人食到真味！」哈「真味」喎，咁啲味又幾濃郁嘅！我睇呢間餐廳志在攞星，冇乜幾多枱客都日日自製麵包，香草都係由法國運嚟，個老細諗住銀行搬過嚟東九龍呢邊，做大銀行、廠佬等食客生意，不過咁，搬得去嗰度都只係後勤寫字樓，所以呢個世界講派頭講氣勢，個老闆養馬又要攞盃賽冠軍，搞餐廳又要摘星，咁啲銀行家先繼續支持！須知道呢個世界附旺不附衰，邊有人會雪中送炭㗎！
楊國佳
工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。
林鄭唔夠「牙力」
恤咗個靚髮，掛番串珍珠頸鏈嘅林鄭在特首選舉當日悉心打扮，惟在鎂光燈照射下加上 close up鏡頭，發現林鄭下面棚牙都幾疏吓，雖然林鄭早前脫癦有運行，為着港人嘅福祉，都係問吓玄學家周漢明師傅，周師傅說：「如果下面啲牙比較疏，怕佢說話有時容易講漏咗，或者唔夠牙力。佢今年六十一歲，亦行正下庭運，即由人中到下巴，未來十幾年都會影響住佢言語，講嘢各方面影響力。」特首冇牙力，港人幾難有運行，而補救方法係——箍牙！
|
鍾意就快D Share啦！
|
|
|
