在外國，貨櫃屋富型格又多設計，但在香港畸形的樓市下，淪為低下階層的蝸居。
壹號頭條
劏房都租唔起 貨櫃屋邨湧現
林鄭月娥當選第五屆行政長官，表示解決房屋問題是重任之一。但市民眼見多屆政府都無力控制樓市，樓價升到失控，連劏房都租唔起。「自己住屋自己諗」，新的民間智慧，因此應運而生。
本刊發現，有貨櫃公司公然在 Facebook賣廣告，大賣「貨櫃屋」，聲稱只需九萬元，就可擁有一間二百多呎貨櫃屋，內裡間出睡房、浴室。公司兼且提供「一條龍」服務，由事前搵地、事後裝修、建化糞池，甚至出問題要吊走，都能包辦。而記者在元朗的偏僻村落，已發現「貨櫃屋邨」的蹤影，其中山咀村有一排排的貨櫃屋隱藏在外圍鐵板內，住着各色人種。在崇山新村，有業主被揭發非法搞「貨櫃屋邨」，仍「不遷不拆」，希冀能豁免重生。在年輕人普遍買不起樓下，這類「貨櫃屋邨」，禁之不絕。
記者在 Facebook，找到貨櫃公司老闆 Ivan， Ivan以往專做貨櫃屋寫字樓，但近月見到貨櫃屋有大量另類需要，開始轉型。「我遲啲會學吓喺 facebook呃 like，好多客都係睇 facebook過嚟，希望今年去到一萬個 like。依家每個月起碼做四、五個住家，試過用四個櫃合併做一間屋，收咗三十幾萬，個價錢我好滿意。」
一條龍服務
Ivan的公司在元朗十八鄉，他將兩個貨櫃打通，再將貨櫃三面裝上落地玻璃，非常美觀，旁邊有一個約二百呎的示範單位「盒子酒店」，內裡裝潢儼如一間酒店房，有一張雙人大床加兩張座椅，旁邊設獨立浴室，有花灑及抽水馬桶。 Ivan對記者落力推銷貨櫃屋好處，「搞石屋要貴成倍，但買貨櫃屋只要三百蚊一呎，維修保養又少。住幾十年都無問題！」
他以盒子酒店為例，優惠價九萬元，包浴室、內部牆身裝修及鋪地板，並指非常抵買。其間他手機響個不停，說生意很好，「新年積落啲單，所以好忙。」記者要求參觀他正進行的工程、作實地考察時，他拒絕得很直接，「唔係好方便，到時你篤我咪死！」放蛇當日，有一行四人的家庭正參觀完盒子酒店，他們本來住附近的組合屋，想加建一個單位，故要求 Ivan將貨櫃屋做矮一點，減低被鄰居投訴的風險。
介紹埋農地
Ivan透露，貨櫃屋的另一好處，是方便被投訴時能隨時吊走，「你吊入倉放低，個租金你照俾番，政府啲人影完相就走。影完又可以放返原位。」他着記者安心，講得頭頭是道指貨櫃屋很安全，現時未有法律規管，他亦未曾見過政府正式出手，「貨櫃屋唔同鐵皮屋，新鐵皮屋馬上有寮仔部嚟拆。貨櫃屋呢？依家咩都唔係，只係當你係雜物。港英年代嘅法律都無改過，嗱，舊時貨櫃只係地盤寫字樓會用，無人用嚟做屋，佢淨係要界定你係固定還是非固定建築物，已經係好大問題。」 Ivan斬釘截鐵說：「如果放農地最好有寮屋牌。而綠化地一定唔得，綠化地你放嚿磚都死，你買地時要睇清楚。」
有屋都要有地放， Ivan介紹了相熟經紀馮小姐給記者，她教路當然不用買昂貴的村屋地，「最好買塊農地，你申請個耕寮就安全，因為朱凱廸所以近排好嚴呀。我哋收你三、四萬，會有規劃師幫你搞，呢塊三千呎地，申請二百幾呎耕寮應該無問題。」她解釋政府勘察的方法，一般是於直升機上拍攝整個區域，然後比較與測量圖上的不同，「邊有咁得閒逐間睇呀。」睇地當日記者想請 Ivan一同視察，經紀馮小姐馬上致電 Ivan過來，兩人相談細節時，各有分工，經紀馮小姐表示可找外判師傅挖化糞池，而 Ivan則處理貨櫃屋的裝修工作，大家不會搶對方生意。
鬼叫你窮頂硬上
其實「貨櫃屋」的合法性，並不在其本質，而是其用途。如果貨櫃屋是放在商業地經營寫字樓，又或放在工業地放雜物，自然是合法，但如果放在農地，就算是有「農舍」牌，但作為住宅用途，也是非法。因為「農舍」只是用作擺放農具；至於「牌照屋/寮屋」則早已沒有再批出。至於在「鄉村用地」（即 V zone地），則在七百呎丁屋範圍，外建住人貨櫃屋亦是非法。記者連日在元朗鄉郊一帶穿梭，發現很多地盤外圍着一、兩層樓高的鐵板，內裡放着多個貨櫃，根本難以知曉那些「貨櫃」是真定假。記者轉向多間元朗的小型地產鋪打聽，發現上述部分地方，其實正神秘地經營「貨櫃屋邨」。地膽經紀安小姐指，貨櫃屋價錢平，非常搶手，「佢哋唔會經地產放盤，主要由朋友介紹，我個女識個老細我先知，喺大棠路山咀村。」雖然有盤，但安小姐都奉勸記者找其他平房，「嗰度好恐怖㗎。」
記者於是前往山咀村察看，但打開 google map，竟然沒有山咀村的位置。於大棠路問過幾個村民，只有一人知道，「見到有個黃色牌寫住狗場就係啦。」記者摸黑入村，親身感受貨櫃村村民的不便。沿着「狗場」的指示牌走，轉彎離開大馬路一直往上走，馬路日久失修，非常崎嶇，刺鼻的豬糞味道鑽入鼻裡，狗吠聲從未間斷。左右兩旁是叢林，立着巨型山墳及多個金塔。部分轉角街燈照不到的地方，會突然有野狗或被關着的惡犬向記者咆哮，嚇得記者倒退兩步。走了十多分鐘，終於見到被鐵皮圍着的貨櫃屋邨。
劏房扮狗場
第二天在經紀帶路下，終於看到貨櫃屋邨的面貌。相信該貨櫃屋邨與旁邊狗場是同一業主，負責人黃太帶記者打開閘門、進入圍板內參觀，沿途未見有成年人，只有幾個本地、南亞裔小孩四處亂竄。此處放有七間貨櫃屋或石屋，黃太推銷她的貨櫃屋很搶手，「依家得番呢兩間，之前嗰家人輪候到公屋，上咗樓先有空位，我都係尋日先清垃圾。」
放租的是一個已劏成兩個單位的長形貨櫃，該貨櫃放在一間石屋上，走廊以鐵籠包着。鮮黃色貨櫃被污漬染成暗黃，約二百呎的單位內，鋪上的木板已經拱起，上面沒有放置任何傢俬。在兩個單位中間，有一個包上鐵皮，狹小的廁所與鄰居共用。每月租金三千元，包水不包電。黃太暗示在夏天電費不會便宜，「個冷氣機我會幫你裝番，唔裝會好熱㗎。之前個租客自己裝咗個分體式，走就拆番。」另外一間質素較好的貨櫃屋，黃太是為自己工人搭建，一樣可以同樣價錢放租。這間貨櫃屋較整潔，有以白色階磚鋪成的地板，潔白的膠板為牆身，還有一個獨立洗手間。
查封貨櫃邨
記者翻查規劃署網頁，顯示該地是農業用地，不能作住人。故若非放租，在圍板下，外人絕不能察覺到內裡有住人的跡象。土地註冊處資料顯示，業主黃國強於九八年以十萬元買入該山咀村地皮。他早年持有四間公司，但所有公司已經倒閉。記者曾到過他報住的元朗好旺洋樓及長沙灣祥利大廈，看更及住客均指他已搬走。
貨櫃屋邨在樓價高企下，有價有市，就在元朗大旗嶺後的崇山新村，負責人 Norman便「早着先機」，三年前已放置了至少二十個貨櫃屋出租，而且統一全為兩層高，髹上不同顏色，猶如度假村。由於當時被傳媒踢爆屬非法經營，結果這個貨櫃屋邨難產。事隔三年，記者再到現場查看，貨櫃屋邨雖未住人，但依然存在。
業主 Norman邀請記者入內，他指被政府圍封的貨櫃屋邨達九千呎，應該會在今年四月拆卸。他說三年來不斷與政府以書信來往，溝通如何善後，「政府罰咗我廿萬，之後要我拆晒所有櫃。」他並不甘心就此拆去所有貨櫃屋，「你睇我所有嘢都係全新，好似冷氣機咁，下面個化糞池又整咗廿萬，都無用過。」 Norman又振振有詞指：「我本身係想做土地重生，順便幫吓後生仔，俾佢哋短租。我再教佢哋種嘢，希望佢哋有成功感，建立自信！」其實記者找到的只是冰山一角，雖然居住環境惡劣，但住屋問題一日未解決，貨櫃屋邨只會禁之不絕。
住貨櫃屋優劣
中港貨運聯會主席蔣志偉稱，用作裝貨的貨櫃，為要承重會比較厚，價錢亦比較貴。至於用作寫字樓的貨櫃，一個二十呎乘十呎的貨櫃，大概要三萬元，已包窗口位、電位、有電燈。貨櫃通常在內地二線城市製造，再由陸路口岸逐個運來港。至於有隔熱功能的貨櫃，一般會在夾層加上發泡膠。
但貨櫃屋始終是金屬，在夏日猛烈的陽光照射下非常炎熱，住客多數要在貨櫃內外再加上隔熱物料，及要開冷氣。優點則是不用打地基，價錢比較平，能夠隨時搬走。
撰文：孫樂祈
攝影：財經組
news@nextdigital.com.hk
|
鍾意就快D Share啦！
|
|
|
