上月高調宣佈結婚
陳雅倫嫁唔成 數未婚夫攬女講大話
陳雅倫去年結識吳彥祖表哥Martin，上月宣佈今年內拉埋天窗，豈料不到一個月，她昨日公告七個月戀情玩完。結婚不成的陳雅倫，昨向本報透露七個月內曾五度提出分手，每次都因Martin死𦧲而復合，今次總結Martin冇得留低原因是攬女、失蹤、講大話，更指他「唔做戲嘥晒」。
陳雅倫跟Martin的戀情，只維持了七個月便分手收場。資料圖片
現年51歲、被稱為「凍齡女」的陳雅倫（Ellen），上月宣佈跟吳彥祖表哥、45歲的Martin訂婚，並且預告今年結婚。不過昨日卻有報道指上月24日Martin跟陳惠敏的囡囡陳鳳儀夜蒲喝酒到天光，更攬頭攬頸。昨日陳雅倫在facebook留言：「女人一定要自強，這樣才能保護自己，像我50又如何？我還要分身應付那些不停圍繞着我飛的小蜜蜂呢！開心其實好簡單。」
甩拖的陳雅倫近日寄情健身，認為女人要自強才能保護自己。
陳雅倫曾與李思捷因車廂狂啜傳緋聞，她不滿Martin重提此事表現幼稚。資料圖片
陳惠敏的囡囡陳鳳儀（左）被指和Martin早前夜蒲，更攬頭攬頸。資料圖片
扮病玩失蹤
身在香港的陳雅倫昨日接受本報電話訪問，透露拍拖至今先後五次提出過分手：「每次分手佢都會甜言蜜語死𦧲，不過今次真係冇得講。上月24號嗰日我喺北京打畀Martin，佢話同人喺中環飲酒，原來去咗攬女。到25號我返香港，原本佢要接機，點知去到一半佢話驚狗仔隊影到，所以冇嚟到喎。」跟着一個星期Martin都以病跟咳為由，沒有跟她見面，亦拒絕她探病。
兩人分手導火線在大前日發生，原本約好見面的Martin竟失蹤24小時，陳雅倫說：「一早約好咗，點知佢嗰日玩失蹤24小時，電話唔聽搵唔到佢。到噚日（6日）佢打嚟解釋仲好笑，話自己嘔血，驚有事去咗醫院照X光，又話自己失聲所以冇打畀我。我話『黃生，唔好玩啦，大家成年人，你自己做過乜嘢心知肚明』，噚日同佢分咗手。」
陳雅倫透露Martin所用的靚電話號碼，登記人是她，所以翻查電話紀錄時發現一個小秘密：「情人節同我生日都冇嚟北京陪我都算，但估唔到情人節凌晨，佢第一個打出同打入嘅電話唔係打畀我呢個女朋友，而喺另有其人囉！」
吳彥祖上月被問到表哥Martin閃婚時，表示冇回應。資料圖片
幼稚提思捷
拍拖期間，其實陳雅倫先後五度提出分手，原因是覺得對方太幼稚，重提自己跟李思捷的緋聞，她說：「思捷係我朋友，點解要攞一啲唔係事實嘅嘢嚟講。」一面喊分手，可惜最後衰心軟不敵𦧲功，陳雅倫形容男方把口啷過油，經常將「我愛你、冇咗你唔得、你唔好離開我」掛在口邊，她說：「邊個女仔唔鍾意聽，佢仲會好似接吻魚咁不停錫你，拍拖嗰陣真係好enjoy。」
另外，講到之前Martin被舊愛力數不負責任時力撐男友，陳雅倫無奈表示：「嗰時佢係我男朋友，而且熱戀中，我點都要盲撐，到後嚟越睇越唔對路，睇清楚佢為人。」
採訪：何永寧
|
鍾意就快D Share啦！
|
|
|