要江山又要美人，愛老婆更愛情人！唔係我Nuts哥吹水，呢個的確係唔少男人嘅終極心聲！小三熱勁過禽流感，滲透率高，你睇不時有大婆拉隊捉姦嘅短片瘋傳，當場剝小三光豬，大婆同小三拳拳到肉打到狂扯頭髮衫都甩，呢啲動作片真係好睇過《葉問》！做小三係咪錯晒？呢個議題千古爭辯不休，有人話牛唔飲水唔㩒得牛頭低，有人就話個死佬最大責任！
出軌係戀愛 婚姻係人生
其實好多男人心目中，總會有一個小三位置，唔使一定要有肉體關係，喺意識上點都想有個小三寄託吓。簡單嚟講，小三係包含晒你老婆或女友有嘅優點，同時抹走晒你老婆或女友嘅缺點！呢個小三，可能係老友阿陳個識煮得一手好菜嘅老婆；亦可能係嗲聲嗲氣嘅女同事，又或者可能係你啱啱睇完嗰部愛情動作片嘅主角吉澤明步。關鍵係，好男人會將小三埋藏心底，齋思想出軌；但把守唔住嘅衰公直情行動埋，畀小三介入自己生活。
出軌係戀愛，婚姻係人生。正印係同你一齊面對現實，你會嫌佢成日只係講柴米油鹽，叫你飲多碗湯都嫌煩！小三同你則猶如乾柴碰上烈火，激情浪漫，自以為相逢恨晚。平時孤鬼寒嘅你，會為博佢一笑買紮花、送個袋，講盡「傻豬」、「BB」等幼稚嘅綿綿情話。正印？對得多，你望多眼都嫌費事！
啞忍多年谷爆：冇做過主動
小三心態又係點？早排大美人關之琳接受內地訪問時，就激罕地回應，對於成日被人話係小三，佢話自己冇做過主動，亦都阻擋唔到人哋點做，感情要嚟就嚟，擋都擋唔住！當然都會後悔過，因為始終會傷害人！至於成日孭住拜金呢個標籤，佢就話自己啲男友係成功啲啫，點解唔可以係對方貪佢名氣？言論一出即引起熱論，連當年同佢有過節嘅陳美琪，都話之之有悔意，都唔算係太壞！今時今日，已經係富婆級嘅關之琳，都唔需要做宣傳炒作人氣，答得呢啲問題，唔多唔少因為忍咗好多年！我Nuts哥反而覺得，54歲嘅佢夠薑、夠勇，起碼肯認同承擔之餘，其實大美人呢個朵對佢都冇乜着數！
講拍戲，咁多年嚟大家只記得關之琳經典作，喺《黃飛鴻》入面嘅「十三姨」。關之琳話過，靚又點？拍戲咪又係做配角、做花瓶，導演都唔肯畀機會去做反派或醜角！講拍拖，關之琳話每次都付出真愛，但最後都係分手收場！人人都以為大美人搵男友垂手可得，大把貨選擇，其實有邊個男人唔想有個大美人喺身邊，日對夜對賞心悅目之餘，帶出街又可以耀武揚威！之不過，又要威又要戴頭盔，當有個大美人女友時，個男人又會冇安全感，驚女友隨時被人搶走！關鍵係男方唔夠愛、唔夠勇氣嘅話，大美人拎住一手好牌又點？最後都係食唔到胡！
勇字行頭得個吉
喺愛情面前，人人平等，如果一方係為美色，另一方係為錢，反而簡單得多！關之琳咁多年嚟，每段感情維持咁耐，就知佢真係想搵真愛，但係咪咁易搵呢？就算係大美人，都唔可以寫包單！雖然佢已經係炒樓無敵嘅超級富婆，但係攬住咁多錢又點？都想有人錫吓、攬吓！最難得，係佢經過咁多段感情兼離埋婚，始終心入面仲有個童話，期待緊Mr. Right嘅出現。佢話：「世界那麼大，不會沒有的！」屢敗屢戰，依然心口有個勇字！
N年前即係90年代，個個都會出番隻碟，關之琳都曾經有出過！我最記得佢有首歌《還是要孤單》： 「還是要孤單，等了又等，錯了又錯，傷了又傷，盼了又盼。」原來當年已經唱盡佢感情上嘅寫照。大美人，還是會寂寞。
|
鍾意就快D Share啦！
|
|
|