42歲嘅盛女杜如風，曾跟黃又南、「figure王」EricSo、導演郭子健、余文樂、助手Alvin傳緋聞，不過佢最愛係－－梁朝偉！呢日杜如風喺中環接受 ...
42歲嘅盛女杜如風，曾跟黃又南、「figure王」Eric So、導演郭子健、余文樂、助手Alvin傳緋聞，不過佢最愛係－－梁朝偉！呢日杜如風喺中環接受《蘋果》專訪，緋聞助手Alvin梗喺身邊，由於杜如風腳傷未癒，Alvin仲做人肉柺杖扶出扶入。問到o依家有冇拍拖？杜如風就話：「真係冇，賺錢先，我唔算恨嫁，緣份話嚟就嚟，話唔嚟真係唔嚟，3、4年冇拍拖，但我真係ok，有個男人仲煩，已經有個好煩阿媽管住我，如果多個男人喺度煩我，我真係搞唔掂，寧願一個人自自由由，鍾意食就食瞓就瞓，唔使理人感受。」真係鍾意梁朝偉？佢好大反應：「唔係唔係嘛，起槓㗎，真係深深愛着，絕對係，一生一世，從來冇死心，愛一個人係唔需要理由，我甚至愛埋劉嘉玲，呢個係好難逃脫佢嘅男人，雖然佢怕咗我，見到我就走，又成日寸我：『又係你吖，做乜着到咁閃。』我：『見你囉！』」當朝偉係偶像定暗戀？佢大大聲：「熱戀，激情嗰隻，我講真㗎，以前爸爸做電影宣傳，成日帶我去片場，5歲已經同佢示愛，但佢對我無動於衷，o依家見到佢仲係會緊張到肚痛同（口型：急屎）。」除咗愛情之外，親情對杜如風好重要，父親杜惠東去年病逝，令佢大受打擊！父親節剛過去，如果順風可以送去任何地方，杜如風會上網買乜禮物追送畀爸爸？佢話：「上網買九記牛腩燒畀佢，或者送埋我上去佢更滿足，我唔介意遊一轉天堂，因為我死後一定落地獄，咁不知上去睇下，我咁壞又曳。」今年父親節係咪好失落？佢話：「又冇喎，直情覺得老竇o依家喺天堂樂得逍遙，好過喺醫院插晒喉。」
