9/10 過往老公有緋聞， YoYo總有第一時間撲火。今舖她沉默多時才配合老公拆彈，但兩公婆表現生硬。
探熱針
點止蔡思貝 王浩信暗撻爆乳咪神陳偉琪
婚前花弗爛玩的王浩信， 11年跟拍拖三年的 YoYo（陳自瑤）奉子成婚。婚後做埋人父的他一度修心養性，但好快故態復萌，近日傳因搭上蔡思貝而跟老婆分居。
但獵女無間斷的王浩信，一個蔡思貝點夠！有傳他暗撻大台新一代爆乳咪神陳偉琪，識食之餘，做玩家亦要玩得高明。據悉他在將軍澳寓所同座大廈，租多個單位做私竇，方便掩人耳目。
後悔娶妻生女
婚後的王浩信，縱然偶爾拖老婆 YoYo做下恩愛騷，但其實爛玩愛蒲本色未改。有指當了人夫的他，不時向朋友狂呻未玩夠，後悔奉子成婚，夫妻關係絕非表面的和諧。近日更傳婚變，導火線是搭上《踩過界》的對手「新一代姣精」蔡思貝。有知情人爆，在劇組面前扮唔熟的他們，私下約會打邊爐兼 lock門 gathering，又有報導指王浩信曾駕車到蔡思貝香閨短聚。據悉二人的關係，早已是劇組圈子的公開秘密，早已傳到老婆 YoYo耳中。
與咪神同劇撻着
據了解，去年開始事業起飛的王浩信，比之前玩得更狼。一個發電廠蔡思貝未夠喉，今年初拍台慶劇《溏心風暴 3》時，劇組已傳他跟同劇配角，選過港姐的「暴乳類」陳偉琪過從甚密。曾在處境劇《八時入席》飾演「 CoCo姐」而入屋的陳偉琪，雖在《溏心 3》跟另一男主角黃宗澤有肉搏場面，但暗撻的卻是無寶不樂的王浩信。
「佢兩個喺《溏心》冇乜同場， Vincent（王浩信）同 Vicky（陳偉琪）熟，係經啲蒲腳介紹，之後佢兩個玩得好埋，班蒲腳都知咩事。 Vicky本身有男友，王浩信係人夫，佢兩個有共識，短期貨仔。」知情者爆。
屋企同幢租私竇
由《撒嬌》的「 Saving」，殺落《踩過界》的人氣，今年有望攞視帝的王浩信，更加玩得高明。知情者續說：「聽講 Vincent喺屋企（日出康城）同一幢大廈，租多咗個單位，話係做 workshop方便開會，因為佢想搞製作同埋籌備開 coffee shop，不過講到尾咪即係私竇。所以同乜人喺私竇玩，都唔驚俾人跟，佢點都係返日出康城啫。」
為個女不聞不問
王浩信心不在家，枕邊人 YoYo為此情緒一度低落，近年常找朋友訴苦。「結婚頭一年，佢哋關係都 OK，之後 Vincent工作愈做愈順，身邊又多女埋身，收工鍾意去蒲，兩公婆成日為呢啲事嘈。有次凌晨五點幾， Vincent仲未埋位，監製打俾 YoYo，點知 YoYo話老公成晚冇返過嚟，乜都唔知，咁大家都心照。婚前 Vincent個底已經好花， YoYo心裡當然有條刺，不過個女細，自己搵錢能力亦唔高， YoYo依家選擇放輕啲段感情，將注意力轉移晒喺個女身上，等自己開心啲。」知情者說。
Ig暗寸王浩信 蔡思貝前度麥秋成：呢個人我唔想提
王浩信同蔡思貝暗撻新聞一出，陳自瑤選擇配合老公拆彈，而蔡思貝前度麥秋成則選擇 Ig開 post留言，曲線寸王浩信。「將來我結婚，一家會對老婆好好，只會愛佢一個人。」更在 Hashtag寫下「有因必有果」、「不想講太多，有辦你睇。」明眼人一睇知佢寸邊個。
麥秋成咁肉緊，有指他因年初發現女友蔡思貝同王浩信的關係，一怒之下跟底花的女友斬纜，並要她搬離同居愛巢。
本刊致電麥秋成，問他何謂一個好老公、好男人，他說：「結咗婚就應該專一。」對於近日王浩信偷食他前度蔡思貝的傳聞，麥秋成一聽到王浩信個名，即不屑的說：「呢個人（王浩信），我唔想提！」
36E爆乳陳偉琪 同蔡思貝同屆
現年 26歲的陳偉琪， 13年落選港姐，參選期間被指有「神秘契爺」為她拉票。擁 E級導彈的她經常在綜藝節目及 Ig不時大騷身材，就連曾經合作過的阿 Bob都忍唔住在節目中望多兩眼而被老婆詐型。之後在處境劇《愛•回家之八時入席》飾演的電視台姐仔 CoCo姐彈出，又接拍了大劇《誇世代》和《溏心風暴 3》，都係靠 body出位。
偷食 Cammi
11年，未婚王浩信被指偷食跟陳冠希一啜成名的𡃁模謝芷蕙（ Cammi），事後 Cammi承認曾上王浩信位於調景嶺寓所開 party，陳自瑤（ YoYo）亦坦言「我係有嬲佢哋」，但選擇相信老公王浩信。有指 Cammi當日在蔚雨芯的生日派對認識王浩信後，翌日即上男方家短聚，數月後，二人趁 YoYo返內地開工，又相約在他家見面，不過卻被提早回家的 YoYo撞破，即時提出分手。但 YoYo後來發現自己懷孕，而王浩信亦指不會再犯，故最後二人和好兼奉子成婚。
撰文：娛樂組
攝影：何子洋、蕭敬漁
|
鍾意就快D Share啦！
|
|
|