九十後港女 Macy表示，做礦工比炒賣風險小得多：「只要計好電壓，一個插頭只可以插一部機，最多只係試過跳 fuse，同埋啲零件最少有兩年保養，以依家要掘十三個月回本，仲賺咗一半時間。」（關永浩攝）
壹號頭條
內地禁 Bitcoin 北水湧港「掘礦」
今年恒指累計升幅五成，跑贏物業市場。但要數到今年升幅最大的資產，不得不提虛擬貨幣「 Bitcoin」（比特幣），由年初的一千美元爆升到五千美元，現時處於四千八百美元左右，升幅四倍多，再挑戰歷史高位。
炒得火紅，內地人民銀行為此叫停所有虛擬貨幣交易，更在微信下「封殺令」，一唱好、即刪帖！內地散戶眼見「阿爺」封殺，但 Bitcoin價格長升長有，最近北水已大舉南下，轉戰香港繼續炒賣。除了「虛擬貨幣大會」由北京移師香港，近日香港 Bitcoin交易平台更收到大量內地人申請，最多過百萬元上落。情況就如人仔貶值下、內地人想盡方法走資海外；上有政策下有對策，關係到「人民」利益，事實禁之不絕。
今年九月開始，內地連番出招加強監管虛擬貨幣，先是打擊 ICO，將之定性為非法集資，再叫停內地三大比特幣交易平台，禁止任何交易。相關網站負責人更被限制出境，不得離開北京。而原本由主力經營比特幣買賣的 BitKan主辦的「全球區塊鏈大會」，被迫由北京移師至香港舉行，更有原本答允出席的嘉賓，受限制影響而未能出席。在大會上，內地 Bitcoin交易平台「幣看網」首席執行官劉洋，斷言國內私人的虛擬貨幣「基本上已經結束」：「目前來看，由於中國政府監管，（價格）會下跌，雖然長遠來看還是會上升！」
內地用家急升
有錢搵，內地人開始轉戰最就近、最方便的香港。在香港搞虛擬貨幣交易平台的泰德陽光集團營運總監曾俊傑（ Terence），就指自內地九月打壓比特幣後，到他平台的內地用戶開始急升：「本身平台有百分之五係內地用戶，但依家已升至百分之二十。想買想賣嘅都有，亦都有係諗緊點將資金搬到香港，亦都有用家考慮點樣將喺香港賣出嘅比特幣、或者係買賣虛擬貨幣得到嘅人民幣，變番做港幣。」畢竟比特幣交易，都曾經被指是走資新途徑。 Terence續指，內地用戶每次交易都數以萬元計：「平均都係五萬到二十萬元左右，最誇張見過百萬元。」
他更爆出，現時微信已開始對 Bitcoin留言有嚴密監控：「如果喺微信發布消息，就會有懲罰，群組嘅管理人都會受到牽連。之前見過有文章，就指比特幣係唔會滅亡，作者將比特幣寫得好美好，過咗幾日搵番個 post就已經唔見咗。」
中央嚴打言論，令內地網民噤若寒蟬，部分炒家「轉戰」外國通訊軟體 Telegram：「因為 Telegram介面主要係英文，好多大陸網友都喺度學習點用，依家微信就有很多點樣用 Telegram嘅教學。」他向記者展示 Telegram群組，發現不少由交易平台及私人組成，最多的一個近七千人。當中不少網友要求 Bitcoin交易，更有網友明言：「我現在擔心是能不能賺錢。」但即被網友指罵：「怕的就是你，問這種低級問題。」討論十分熱烈。本身亦有炒賣 Bitcoin的 Terence，就不覺得虛擬貨幣是一個騙局，「我就覺得唔一定係，因為到依家我見到愈來愈多機構投資者都開始接觸，之後可能會有更加多人入場，呢個都會係推動價格上升嘅動力。」
後美女辭職 瞓身做「礦工」
Bitcoin炒風除了吸引內地大媽，不少港青都加入「礦工」行列。由於一般虛擬貨幣的原理，是可以運算電腦程式，開採「新幣」，就如銀行開機印銀紙。九十後的 Macy，今年受男友 Lawrence薰陶開始接觸虛擬貨幣，花約七萬元砌了一部掘礦機，「掛機」（開着電腦不動）半年已經回本，現時扣除電費，只開電腦一個月已有數千元收入，她更決定辭職全力發展砌掘礦機市場，她直言：「我覺得呢方面好有前途，因為依家係（賺錢）最好時機！」
Macy原本擔任程式員，對 IT有一定認識：「因為之前 Bitcoin升咗好多，好多人都留意呢件事，令更加多人想加入。」她解釋，由於已有內地人研發專「掘」 Bitcoin的芯片，散戶參與難度大大提高，因此她已轉到「掘」另一種虛擬貨幣「以太幣」（ Ethereum）：「其實愈來愈多人掘，以太幣依家難度都提升咗，因為虛擬貨幣可以一夜間爆升，掘嘅錢就可以升好幾倍。」
她現時主力以十二張顯示卡的機器進行「掘礦」，由於每一張都以超頻運行，即使配上強力抽風，溫度都達七十度，有報導指台灣曾有住戶因長開電腦釀成火災。現場所見，即使冷氣長開， Macy仍難免「身水身汗」，而且機器運行的聲音都不小：「因為底板都有保護機制，太熱嘅時候佢自己會熄，所以都唔驚火燭。我自己覺得暖暖哋，都唔太熱……冬天可以做暖爐！」
每月「掛機」賺四千
今年不少虛擬貨幣都受到 Bitcoin價格影響，以太幣今年都獲得明顯升幅，她投資的掘礦機，半年內已回本：「之前掘嘅難度比較低，到依家開始多人掘，回本期就起碼要十三至十四個月。」她指，最複雜不是如何「掘」，反而是交易有一定風險：「如果經交易平台，要身份認證、提供好多個人資料，未必人人都想咁做，但個人交收嘅話，就好似網上交易咁，有機會俾人呃。」
由於現時掘礦難度大增，她與男友就決定開設「 MINERS HK」，轉戰「砌礦機」行列，幫客人做「礦工」：「朋友見我喺度掘，都有興趣，就開始幫朋友手。之後有投資者想開比較大嘅場，就搵我哋幫手。其實好多客人都唔識，我哋就裝好晒啲機，確保部機一開就喺度掘，之後計到賺幾多錢，佢哋就覺得 OK。」她現時主力接「砌機」訂單，加上「掛機」，平均月入以萬元計。
對於近日中央嚴打虛擬貨幣，會否有「爆煲」的一日？她直言不太擔心：「其實部機所有嘢都係值錢，你話爆煲嘅話，你就最多拎嚟當電腦用，或者變賣，因為本身部機係值錢嘅。」但她就不建議用真錢去炒賣：「虛擬貨幣價格波幅大、變化快，你真係唔知自己幾時贏幾時輸，反而你買一部機，輸晒至少都有部實物喺手。」
撰文：梁延宇
攝影、攝錄：梁正平、關永浩
news@nextdigital.com.hk
|
鍾意就快D Share啦！
|
|
|