早前，阿倫同 Wendy密遊台灣，回程時前後腳分開出閘。
探熱針
孖克勤夫婦遊台灣 阿倫丟低 Wendy各自走
66歲的譚詠麟除咗有元配老婆楊潔薇（沙莉），仲同紅情人知己 Wendy發展婚外情， 96年生埋獨生子譚曉風，呢個已經係公開嘅秘密！
事隔多年，阿倫對 Wendy兩母子依然高度保護。早前阿倫約埋老友李克勤、盧淑儀，拉大隊飛去台灣四日遊， Wendy雖然有份陪玩，但全程要做「隱形人」。回程時 Wendy等大隊出晒閘，一個人笠晒帽鬼祟離開。
全程「隱形」
今年七月，二十一歲的譚曉風在英國牛津碩士畢業，阿倫幾忙都抽時間飛去當地觀禮，更得意忘形，破例將阿仔嘅背脊相放上微博 share。阿仔終於有得見光，不過情人知己就要繼續收埋。
出發去台灣當日（廿五日），臨起飛前一粒鐘，阿倫匆匆忙忙現身機場，更一早吩咐 Wendy從另一邊閘口入閘，成功調虎離山。去到台灣，又不停上載同克勤吃喝玩樂相上網， Wendy繼續「冇影」。
分開出閘
四日三夜玩完返港，落機時阿倫同 Wendy一樣分開走。攞完行李，阿倫一馬當先出閘，急急腳行去停車場。接住克勤兩公婆推住兩大喼行李，施施然步出，相隔唔夠一分鐘， Wendy終於現身。見閘口多人，為怕行蹤曝光， Wendy一直低頭行，出閘前 Wendy更戴番頂漁夫帽包到實，保證萬無一失。沿路 Wendy一直低頭貼住牆行， keep住箭步去到停車場，即刻跳上車走人。
盧淑儀做啦啦隊
早前阿倫孖住歌神 Sam喺紅館開完十二場演唱會，校啱克勤又啱啱開完騷，兩人趁機抖番夠本。上週四（五日）中秋假期，「明星足球隊」搞友誼賽，克勤帶埋老婆同兩個仔出現。克勤落場踢，盧淑儀一直在場邊做啦啦隊，離遠幫老公打氣。至於兩個仔 Rex同 Ryan，一樣大顯身手，人仔細細已經識得扭波，好好腳法。
克勤一家四口晒溫馨，但公開場合 Wendy例牌冇份，阿倫單拖出現，著住件貼身波衫，大肚腩凸晒出嚟。雖然六十有六，但阿倫落到場一樣搏到盡，跑到上氣唔接下氣，真係睇見都戥佢辛苦！
有名冇分
娛樂圈未婚生 B大有人在，即使 BB出世後，亦都攞唔到名分，未有結婚打算。
紀曉波 吳佩慈
已為人母的吳佩慈先後為內地百億富商紀曉波誕下三胎，大女小蕊蕊已經三歲，二仔漢斯亦一歲大，早前再誕下孻仔，可惜二人至今仍未登記結婚，但紀曉波亦相當識做，去年以吳佩慈名義入股值三億的怡益控股，成為億萬富婆。
撰文：娛樂組
攝影、攝錄：陳亦龍、李玄、蕭敬漁、楊紫
|
鍾意就快D Share啦！
|
|
|