錢國偉跟老婆行花墟，有五個月身孕肚凸凸的陳宛蔚明顯較之前圓潤。
探熱針
陳宛蔚佗女五個月 錢國偉行花墟摸老婆肚
錢國偉跟陳宛蔚結婚兩年，婚後被投訴顧住開工未度蜜月，不過兩人一直努力造人，早前終於成功，原來老婆佗 B女五個月， Wilson日前載大肚老婆行花墟，全程拖實兼忍唔住開心摸肚，父愛爆棚。
如常返工
上週四（十月五日）黃昏，錢國偉開車載大肚老婆陳宛蔚行太子花墟，雖然有五個月身孕，不過陳宛蔚步伐輕盈，着住鬆身大恤衫短褲的她依然靈活，反而即將做人父的 Wilson比較緊張，全程拖到實，其間更一度換位，在後面攬住老婆，邊行邊摸住她的大肚。
據了解，為要成功造人，陳宛蔚婚後一直睇中醫調理身體，戒凍飲以及生冷食物。這兩年在老公公司幫手，幾乎全線退居幕後的她不用日夜顛倒拍劇，佗 B後更是活力十足，繼續如常返工：「 Wilson做監製嗰部網絡電影《王牌霸王花》，啱啱先拍晒，之前 Calinda（陳宛蔚）都有去開會，仲要落手落腳做嘢，一啲都唔似有咗。」知情者說。
第一個通知志偉
老婆大肚五個月， Wilson本有意低調不公開，不過還是忍不住跟一班圈中朋友分享做老豆喜訊，除屋企人外，他第一個通知的是娛圈老豆曾志偉：「志偉爸好開心，佢話我大個仔，（湯）盈盈話要送張 BB櫈俾我，佢已經 WhatsApp咗啲相俾我揀，我就同老婆食咗一餐好開心嘅飯慶祝。」
明年升呢做老豆， Wilson表現輕鬆，為氹老婆開心，他有時間便會煮早餐、煲湯和切公仔生果，經常製造驚喜。
「我一啲都唔緊張，反而老婆開始諗小朋友讀書嘅嘢，好似打仗咁，未出世就話要報定名。」 Wilson說。
撰文：娛樂組
攝影：陳亦龍、李玄、蕭敬漁
來源 source: http://hk.next.nextmedia.com
|
鍾意就快D Share啦！
|
|
|