2017國際小姐澳門代表麥嘉欣（Sofia）來自選美世家，有個澳門小姐殿軍的媽咪從旁教路，大讚女兒比自己靚，對她信心十足！
Sofia人氣愈來愈勁，憑着甜美樣子被網民瘋狂洗版讚靚女。Sofia是通過「澳門選美連盟」的面試而挑選出來代表澳門出戰11月在東京舉行的《2017國際小姐選美》，Sofia除了母親外，阿姨與姑媽也參加過澳門小姐選舉，而阿姨則是亞軍，靚女基因一脈相傳，說：「其實我冇諗過參加選美，我好怕醜，不過，屋企人叫我參加，所以先參加，希望可以大膽啲同見識世面，如果將來自己有個女，我都會叫佢參加，因為覺得好好玩又學到好多嘢。」
麥媽媽畀90分
至於麥媽媽對女兒參加選美也有給予意見，不過麥媽媽認為現時選美比當年更難、更辛苦：「佢哋要做好多嘢，至少我哋着嘅鞋冇佢哋依家咁高呀！」並大讚女兒做得好。問會給Sofia打多少分﹖她說：「我畀90分。（有信心囡囡會贏﹖）唔好話贏，做到最好。（覺得囡囡邊個部位最靚？）對眼。（遺傳到你？）佢靚我好多！」
六歲當模特兒
Sofia本身是模特兒出身，她六歲時已經開始做童裝模特兒，直至中學因為要專心學業，才減少工作。雖然面對鏡頭可謂駕輕就熟，但她坦言依然會怕醜及緊張，至於有否信心當選國際小姐？Sofia認為信心是努力換來的：「有努力去準備，信心自然大，但準備唔夠當然會驚，如果依家叫我出嚟選，我都可以，但可以做得更好，好在仲有兩個月時間畀我準備。我除咗上堂之外，都有喺屋企練習，最重要係做運動，因為我好鍾意食嘢，好易肥。（覺得自己有咩優勝之處？）搞笑同親和力，但就唔夠信心。」現時仍在大學讀書的Sofia不諱言對娛樂圈有興趣，現時也有在香港及澳門接工作，但揚言不會為娛樂圈而放棄學業，並待大學畢業才決定將來路向。
網民火速起底
其實Sofia成為澳門代表已經有兩個多月，直至今屆港姐誕生，一夜之間連帶她也被網民關注，她也大感意外：「我同家人當晚都有睇香港小姐決賽，第二日就有朋友傳短訊畀我，話有人喺網上講起我，之後就愈嚟愈多人講，對呢方面我嘅感覺係正面嘅，覺得好開心，因為大家都係讚我，對我好好。」
雖然被火速起底，將Sofia以往的照片及與男友的合照一一翻出來，依然她保持樂觀正面的心態，並豁達地說：「其實都只係攞番我以前中學、大學讀書嘅相，最多都係素顏相，至於男友嘅相都OK。我唔會剷走啲相，因為都想比人了解吓我嘅過去，而且我又冇唔見得人嘅相。」
忙到冇暇拍拖
至於會否因為名氣大增而影響與男友感情，Sofia謂仍是一樣，但就因為要專注讀書及選美，所以難免會影響與男友的相處時間。問麥媽媽會否想女兒嫁個大錢人？她認為順其自然。
場地﹕富薈馬頭圍酒店
服裝﹕A Gal Secret Macau
化妝﹕Candice Li
髮型﹕Dick Cheng@Reborn Hair Ltd
|
鍾意就快D Share啦！
|
|
|