上個禮拜， YoYo單拖去旺角花墟買花。
探熱計
同王浩信關係疏離陳自瑤擺桃花陣救夫妻感情
老公王浩信終於得償所願榮升視帝，可惜人紅自然多女纏身，搞到緋聞不斷，加上陳自瑤（ YoYo）一邊湊女之餘，又要開工拍劇，搞到兩夫妻聚少離多，屢傳婚姻亮起紅燈，就連老公攞視帝咁大件事，陳自瑤都冇乜表示，甚至連在社交平台恭喜都冇句，夫妻關係好極有限。
做得王浩信「背後女人」，一直選擇啞忍的陳自瑤為了挽救夫妻關係，上週二（ 6日），素顏兼戴住口罩的她單拖去旺角花墟買桃花，其間緊張地同老闆娘研究擺位，避免擺錯位再催旺老公桃花運！
花墟買桃花
臨近新年，一向負責打理家頭細務的陳自瑤除咗忙着拍《包青天之再起風雲》外，都不忙抽空辦年貨，上週二（六日）下午，係寒冷天氣底下，著住黑色羽絨和戴口罩的陳自瑤就單拖出動現身旺角花墟，起初她不停拎起電話皺晒眉頭，一臉苦惱搜尋買花攻略，花店職員見佢睇到頭昏腦脹搞到皺晒眉，便主動上前幫忙，陳自瑤同對方講完一大輪，職員即向她推介一盆桃花，問清楚一輪資料後就決定扑槌，風水角度上桃花有助催旺感情及人緣運，陳自瑤喺屋企擺桃花陣，明顯係想增進自己同老公感情！
一腳踢
當日買完桃花，本來一條友冇人幫手的陳自瑤非常狼狽，職員見狀就幫她將桃花抬去的士站，又幫她截車，可惜交更時間無人理，心急的陳自瑤繼續努力打電話 Call車同時，都不忘提點職員小心盆桃花。
「王浩信呢段時間去咗菲律賓拍劇，不過過年前會趕返香港， YoYo當然想老公返嚟之前做得妥當啲雖然 YoYo呢排幾乎日日都要開劇集《包青天》，但成日都聽到佢開工前已經話接送完囡囡同幫屋企買嘢，呢個老婆認真唔話得！」陳自瑤身邊人說。
繼續盲撐老公
對於台慶頒獎禮陳自瑤未有現身現場見證老公攞視帝，相反同王浩信傳過緋聞的蔡思貝就激動到中斷訪問兼衝入錄影廠睇住緋聞男友攞獎，轉個頭王浩信又被指同江嘉敏在英國拍外景時暗撻，對於老公多女埋身，記者當然要問吓陳自瑤有咩講，陳自瑤繼續盲撐：「佢而家去咗菲律賓！（王浩信攞完視帝有無慶祝？）其實我自己冇 po咋嘛，但係我有留言！（點睇老公緋聞不絕？）其實之前都講咗啦，其實我覺得""最近有嗰啲…… er……一睇都知……點講呢？總之我就相信佢囉！」
桃花助夫妻感情
新年好多人為催旺桃花運都會放大大棵桃花喺屋企，根據堪輿學家麥玲玲師傅表示，狗年桃花位於西北方。
桃花放啱位置有助兩夫妻感情、自己的姻緣及人緣，更能強化事業運，但要注意，一旦催得過旺，會容易出現三角關係。
撰文：娛樂組
攝影：陳亦龍
|
鍾意就快D Share啦！
|
|
|