訪問當日，二人剛好相識兩個月，熱戀期度過首個情人節，梗係要嚟個熱吻
探熱計
情人節放閃拍拖兩個月 52歲韋家雄閃娶銀行之花：個仔戥我開心
年過半百的韋家雄，經歷過失婚失戀，數年前跟圈中人陳嘉嘉分手後，更自認是愛情失敗者，灰到爆。直至今年元旦破例高調公告「破 dry」有第三春，至今拍拖兩個月，已認定比他年輕近廿年的銀行之花 Keynes，連韋家雄個仔，都戥老豆搵到幸福開心，故他計劃今年內閃婚，將銀行之花全面私有化。
以一敵三追到手
韋家雄在與 Keynes邂逅的酒吧公開放閃，趁準「家雄嫂」未到，當日目擊韋家雄「破 dry」的兄弟戴耀明，大爆當晚他在芸芸對手中，一家截三家胡！
戴耀明說：「恭喜你終於夾到個幸福下半生返嚟。佢嗰晚好多對手，有同事幫 Keynes影咗張相，跟住就話 send番俾佢，乘機抄佢牌。人哋抄牌，家雄哥偷聽到，自己記低就去截胡，哈哈！」
俾兄弟踢爆追女一幕，韋家雄四萬咁口話：「當晚 Keynes俾人抄牌時講得比較大聲，我聽到啫，哈哈！」
女友 Keynes到場，韋家雄已經深情望住她，難怪戴耀明速撇避閃光蛋。「我第一眼見佢，覺得呢個女仔幾舒服，我就唔係幾舒服！」一個爛 gag，已經令 Keynes笑一餐。
單獨約會口震震
雖然當晚成場對手，但韋家雄自感贏面高。「我靚仔過佢哋，所以有信心，哈哈！唔係，緣分嚟嘅，我冇拍拖幾年，咁啱嗰段時間我未有工作，抽到時間同朋友飲吓酒，咁就識到佢。」
對 Keynes一見鍾情，韋家雄想盡快私有化，翌日就膽粗粗約她在黃金海岸單獨見面。不過呢幕撐枱腳，搞笑多過浪漫。
「約佢冇十足把握，但始終都要踏出第一步，點知嗰晚間酒店自助餐 full晒要坐室外，成餐飯我係口震震咁食，唔係因為心跳，係好凍，因為我唔知當晚氣溫跌到十度，我著住短袖衫赴會。本來食完飯想直落飲杯嘢傾偈，但佢見我咁凍，問使唔使借佢件褸俾我著，下場飲嘢都要改期。不過嗰晚之後，我哋係有 feel準備開始，之後每日都見。」他說。
兄弟爆料
女友到場前，兄弟過來搞亂檔。與韋家雄女友認識十年的戴耀明，爆韋家雄遇上心儀 Keynes，第二日就表明心跡，對住成班人宣布封盤。「佢玩到咁大，其他男人邊夠佢嚟！雖然佢唔係劉華，但佢溝女堅過劉華㗎！每次都係用誠意打動啲女。」韋家雄問佢係咪好葡萄，十年追唔到，佢幾日就搞掂。
拍拖一週傾婚事
今年二人首次共度情人節，給女友最有誠意的禮物，莫過於一份承諾。「我哋喺十二月九日相識，一相識就有種熟悉感，好啱傾。拍拖一星期就有結婚嘅諗法，大家亦有傾呢個話題，因為我哋係認真。幾年前同一個女仔分手後，我冇刻意諗再婚嘅事，但遇到啱嘅人就好想。我哋希望今年內，婚禮想以西式派對進行。」
過埋阿仔一關
唔只一班兄弟，就連韋家雄的母親，及跟前妻所生，現時廿多歲的兒子，也為他找到幸福的另一半開心。「我個仔同佢成日都見，阿媽都認定佢係新抱。」
追到銀行之花的韋家雄，驚喜求婚點少得。「我會嚟一次轟轟烈烈嘅求婚，我一定俾驚喜佢，而最驚喜嘅，就係冇驚喜，哈哈！」兩個傾唔夠三句就攬埋係咁笑，夾到呢個點，睇嚟佢哋都走唔甩對方！
女友 Keynes：第一眼覺得佢好 charm
對於邂逅當晚，眾多蜜蜂，最後點解揀韋家雄， Keynes說：「對佢印象只係停留喺《真情》嘅『大力』，嗰晚第一次見佢，覺得佢好 charm（有吸引力），個人又真誠。俾佢打動係第一次單獨約會，佢著唔夠衫好凍，但佢仍堅持直落下場再飲杯嘢，最後我唔忍心見佢咁凍先拒絕。
「相處落我好欣賞佢嘅孝順，又好錫個仔。佢仲主動陪我去探嫲嫲，同埋拍拖唔夠一個月，已經俾好多安全感我，我覺得佢係 Mr.Right。」
撰文：娛樂組
攝影：蕭敬漁
場地： BEACH CLUB CAFE大樹吧
鳴謝：杜貞貞
|
鍾意就快D Share啦！
|
|
|