探熱針
江若琳的名字蕭潤邦的姓氏
相識十年，由朋友變戀人，然後相戀一年，蕭潤邦求婚成功，江若琳，將要改名叫蕭江若琳，蕭太。
他們的愛情故事，不轟烈，但動人。
在對的時間，遇上對的人，是生命裡最好的事。
求婚籌備兩個月
因為碰巧於情人節出書，所以便約江若琳（ Elanne）與蕭潤邦（ Oscar）合體接受訪問，當時並未知道男方已求婚成功。直至訪問前一星期，二人將喜訊公告天下，眼前的一對人，時時刻刻放閃，好寃氣。問 Oscar為了求婚一事，籌備多久？他說：「預備咗兩個月，其實係喺佢舉行音樂會嘅時候，因為當時好多朋友都專登嚟睇佢，我就喺咁嘅情況之下召集好友，話俾佢哋聽邊一日，睇吓佢哋有冇時間去上海同我做呢單大茶飯。」 Oscar一路講一路望住 Elanne，眼中只有她一樣。 Oscar去年於上海向女友求婚，他說：「我哋識咗十年，但真係兩個人食飯就係喺上海，因為我煮上海菜，所以每年都會去上海好似考察咁樣，食吓佢哋啲嘢，睇吓有啲乜嘢新派上海菜帶返嚟香港，○七年嗰班新人有個 WhatsApp group，我就話自己會去上海，聽講你（ Elanne）都喺上海打滾咗好多年，咁啱佢又喺上海，就係咁樣，大家第一次去食飯、傾偈。」聽完 Oscar講， Elanne已急不及待插嘴，「十幾年嚟第一次兩個人真係單獨食飯，但其實初初都係好朋友嗰種，喺內地咁多年都係自己一個，突然間有個香港朋友上咗嚟，難得有人同我食餐飯。」訪問時， Oscar不時會掃掃 Elanne的肩及背，又會摸她的頭髮，對她如小朋友一樣，十分呵護。
我成日都話俾人聽我係一個女漢子，成日話俾人聽我性格好男仔頭，
原來呢個係我去鼓勵自己要好堅強嘅一個藉口。
罰食一世生煎包
Elanne與 Oscar是○七年同期出道的樂壇新人，那年的新人很團結，會自組群組聚在一起。對於 Oscar， Elanne直言當時並不知道他轉了行去整生煎包，「我淨係知道大家同年出道，跟住佢無端端就喺娛樂圈消失咗，當佢喺上海學完師返香港嘅時候，就輪到我去咗內地，好似向左走向右走咁樣，直至我再返香港，大家搞咗個 group，我仲好記得小肥話，試吓 Oscar啲生煎包，我都未知咩嘢事，佢問我唔知 Oscar而家做緊生煎包咩？我話唔知喎。嗰刻我先知道原來佢喺另一個範疇發展，仲發展得幾好。」 Oscar扮嬲說：「其實係得佢無嚟過食我嘅生煎包，我而家成日都逼佢解釋，所以要罰佢食一世。」
身心都有安全感
在對的時候遇上對的人，是人生最動人的愛情故事， Oscar與 Elanne相識十年，由朋友變戀人，拍拖一年便決定結婚，他說：「其實我哋一齊後，真係好合拍，所有生活習慣都好似，連近視度數都一樣，所以無話邊一刻決定，成件事好自然，我哋應該都會一路好快樂、好自然咁生活落去。」 Elanne說：「我係一個非常無安全感嘅人，同埋我唔係好識同人溝通，但唔知點解，當我遇到佢嘅時候，由上海大家傾偈開始，我覺得對住佢可以好放開自己，佢係一個好識得同人哋傾偈，同埋佢好識得去開解人，我覺得而家都好少男仔會真係用心去聽你嘅經歷、故事，甚至乎佢好投入喺我嘅經歷裡面，有時我同佢講我嘅經歷，佢仲嬲過我，即使我已經放低咗，好多男仔其實都係好敷衍，但佢真係會好投入，直至同佢相處，我發覺原來可以喺一個人面前，咁願意去表達自己情感，嗰時開始覺得，會唔會係呢個人喺我隔籬，令我身心都好有安全感，只要佢喺我隔籬，我覺得好多嘢都好似好易解決。」 Elanne的一言一語， Oscar邊聽邊微笑，這個畫面，很有愛。
我是一個好脆弱的人
Elanne曾經講過，有次行街， Oscar見到她的鞋帶鬆了，二話不說便蹲下來為她綁鞋帶，這個動作，比起他送一千枝玫瑰花更窩心， Oscar有冇講過一些令她很難忘的說話？她說：「佢係一個喺生活上會令你好感動，每一個生活小細節，之前都分享過，好似綁鞋帶事件，即係喺生活上會好懂得照顧你，我覺得最感動係，我成日都話俾人聽我係一個女漢子，成日話俾人聽我性格好男仔頭，原來呢個係我去鼓勵自己要好堅強嘅一個藉口，但係其實我並唔堅強，其實我係一個好脆弱嘅人，但因為咁多年嚟都係自己一個去面對種種難關，直至有一個人嘅出現，佢話俾你聽，你嘅人生最重要唔係要咁樣去搏，唔係成日要以雞蛋撞石頭，人生最重要係快樂，你而家同咗我一齊，我希望你每一日都好快樂。」
你嘅人生最重要唔係要咁樣去搏，唔係成日要以雞蛋撞石頭，人生最重要係快樂，你而家同咗我一齊，我希望你每一日都好快樂。
將最好的東西留給我
Elanne分享了 Oscar曾對她說過的話，那她有沒有做過一些令 Oscar很感動的事？他說：「有㗎，就係上海嗰餐飯，餐飯嘅開場就係我哋各自嗌咗一啲嘢食，但個湯係一樣嘅，都係海鮮湯，但首先嚟咗一碗，當然係俾咗女仔先啦，但等咗好耐我嗰碗都未嚟，原來我哋只係叫咗一碗，漏咗單，跟住過咗大約十分鐘，我嗰碗都嚟埋，就問佢嗰碗湯仲熱唔熱，佢話正呀仲好熱，但我知道擺咗咁耐應該唔熱，我就試咗一羮，原來真係凍咗，我就知道呢個女仔會將最好嘅留俾你，因為佢知道如果我見到佢個湯凍咗，一定會同佢換，但佢寧願你飲一碗熱辣辣嘅湯，佢自己飲一碗凍嘅湯，呢個係我都幾難忘，嗰一吓覺得呢個女仔好好。」
姊妹兄弟團名額已滿
Oscar與 Elanne將於十二月底結婚擺酒，有多點時間籌備，他說：「決定咗十二月尾，我哋嘅宗旨係，希望嗰日可以見到好多好耐無見嘅朋友，或者好難先見到嘅屋企人。」兩人相識滿天下，姊妹及兄弟團名額已滿， Elanne說：「我哋個 group嘅人已經舉晒手，係唔知將佢哋分喺兄弟定姊妹團好，小肥就梗係姊妹啦，我諗住俾佢著伴娘裙。」兩人拍拖時已經四圍旅行，度蜜月地方揀好未呢？「我覺得度蜜月都係一個旅行嚟啫，我哋成日都會去唔同地方旅行，反而係要睇吓大家時間，佢有啲地方都想去嘅，因為啱啱實現咗我去英國睇波嘅夢想，睇吓佢有啲咩嘢夢想，因為夢想成日變，去到年尾睇吓佢個夢想，即係個幸運輪轉到去邊再決定。」 Oscar說。
飽滿愛
這次的訪問，筆者的感受很深，因為被訪者 Elanne與 Oscar，毫無掩飾他們的「愛」，影相時，十足影結婚照，動作很合拍，亦很肉麻，
訪問時，每句話每個眼神，很有愛，但不是對我！老土都要講一句，
祝 Elanne與 Oscar，白頭到老，幸福快樂。
撰文：海 山
攝影：黃志明
服裝提供： Whistles
飾物提供： DR鑽戒（ Darry Ring）
場地提供： KERRY HOTEL HONG KONG
|
鍾意就快D Share啦！
|
|
|