Lafelle略懂盧旺達語，到農村工作時也能和當地村民作簡單交流。
壹些事壹些情
第三世界的港女
若果叫港女去非洲或印度打工，無得扮靚又危險，恐怕十個有九個港女會耍手兼擰頭。
但兩名非一般港女，因為個人抱負，她們選擇從第一世界，走進第三世界去。
有碩士女生本享高薪厚職，平步青雲，反而去非洲打工，幫助農民自立，就算感染傷寒也在所不惜；另一個在公立醫院當護士，平日在壓力爆煲醫院上班，營營役役，受盡病人的氣，但一放假就跑去印度或柬埔寨做義工，又是服務病人。
有石屎森林唔住，走去住真嘅森林，有人鬧：「你黐線㗎？」、「攞苦嚟辛」，女生隻身去到印度、非洲，不怕嗎？
她們說不怕飛去落後國家，就是最怕留港做港豬。
非洲
自願去非洲打工
非洲很大，人們常以為一整片非洲大地，全都是電視上看到埃塞俄比亞的樣子。事實是這樣嗎？
朱芷均（ Lafelle）生長在一個小康之家，爸爸是導演，媽媽是高級公務員。長大後， Lafelle修讀工商管理，畢業後在一家食品公司擔任管理實習生（ MT），但後來她想起了小時候的志願：「可能我可以令食物更好食，但呢個世界有好多人無飯食。」於是她想幫助更多第三世界的貧民。
Lafelle毅然改變航道，攻讀國際關係碩士，其間到了非洲烏干達一非政府組織實習兩個月。「第一次踏足非洲，發現路上真係滿地泥濘，好亂。我哋住嘅大廈被爆竊過兩次。」非洲衞生比香港惡劣，而且始終是落後地區，購物比較不方便， Lafelle難得回港休假，都總會大量購入面膜、衞生巾、蚊怕水等日用品。「我覺得無論去非洲，定係玩跳傘，其實都係一樣，都係睇你自己能否承受風險。」
與盧旺達人相處
碩士畢業後， Lafelle被一間美國機構聘用，在盧旺達定居起來。不少人以為非洲就只有一個「窮」字能形容，但 Lafelle卻在盧旺達看到另一個光景。「有時候見到農民，真係好佩服佢哋，佢哋好用心工作耕種，真係希望小朋友可以讀書，去首都讀大學。但其實非洲嘅城市同樣發展得好快，我接觸到嘅人層面好廣，由最窮嘅農民，到最有錢嘅非洲人都有。有錢或中產嘅非洲人其實同我哋分別唔大。」
一九九四年，盧旺達經歷了一場殘酷的大屠殺，短短一百天內，有接近一百萬人被殺，自此盧旺達人的防衞心很重，大多不願和別人交心。「你試諗吓，坐喺你隔籬嘅人，佢媽媽可能殺咗你爸爸。經過呢件事，我能夠理解到點解信任對於佢哋而言係唔容易去建立。」
其實 Lafelle曾跟非洲男子拍拖，對方家境不錯，但最後無疾而終，以為黑人花心？反而是 Lafelle前男友跟她拍拖一星期，便說明是為結婚而拍拖，來得太快的束縛，嚇怕 Lafelle。
無力感
在盧旺達郊區工作已經差不多兩年， Lafelle每天早上就是被陽光和小鳥叫聲弄醒。她說，在非洲最難接受的是突然斷水斷電，但她「久經訓練」，自言已變得不再有所謂。
「來到非洲，我發現自己好渺小，亦好幸福。突然上上吓網睇 YouTube停電，上唔到網？無所謂啦。咁咪睇書瞓覺囉。其實好多事情都唔需要諗得太複雜，可以簡單好多。」
未來的路要怎樣走？ Lafelle說自己大概半年後便會辭職，未來可能留在非洲再找另外一份工作，可能去其他第三世界國家，也可能想去北歐探索。但她的名單上，並沒有「回港定居」這項選擇。「其實我好佩服有些香港嘅年輕人，佢哋真係好努力去捍衞我哋嘅自由。某程度上我覺得自己係自私，有時候都好慚愧，我走到咁遠，所謂去幫非洲嘅人，但我無為香港做好多嘢。」此時， Lafelle眼泛淚光：「但很可惜，我呢份心力，我放唔到落香港。」
印度
有假唔放
符菁華（ Kirsten）回想起第一次踏足印度，那一幕畫面依舊震撼她的心靈。
「我記得第一次去印度加爾各答，富豪區同貧民區只係相隔一條街。我們晚上十一點幾十二點見到一整條街都是人，大人、小朋友都有。佢哋衣衫襤褸，小朋友得一條布披住，我哋真係喊咗出嚟。」
Kirsten是公立醫院的護士，從小便已經很喜歡做義工的她，一放假就會去印度和柬埔寨義務照顧病人或當地的貧苦大眾。
每次到訪印度，作為護士的 Kirsten都會在當地德蘭修女之家裡的「垂死之家」服務，幫助患者洗傷口、洗澡等。而在柬埔寨，她會去固定一條村落。一行數人通常在村內義教英語和國語。護士工作辛苦人盡皆知，好端端一個女生，假日不好好休息，反而選擇繼續「勞動」， Kirsten卻形容：「我嘅心態係去度假，雖然真係落手落腳做，但我好享受。」
母親責備
過往， Kirsten的媽媽一度問她：「阿女，你係咪黐㗎？」
印度給人感覺十分危險，強暴事件時有聽聞，更是令 Kirsten媽媽深感擔憂。但她卻有另一種看法。「人哋覺得印度危險，印度男人好衰。但其實你無去過，你係唔會知道。只不過係因為佢哋不習慣出夜街，如果你出夜街，佢哋就會覺得你是壞女孩，每個地方都有自己的文化。」
後來， Kirsten邀請父母和她一起前往柬埔寨做一次義工。當地小朋友們一看到 Kirsten爸媽，立刻拖着他們的手，說要和他們外出跑步玩耍。「我從未見過我爸爸媽媽笑得咁燦爛。佢哋返香港之後即刻 call姨媽姑姐，話你哋下次都一齊去做義工啊！我明白我個女點解咁鍾意」行善，就是以生命影響生命。
異地情緣
到第三世界做義工，為 Kirsten帶來的除了是開闊視野，大開眼界外，還為她帶來了一段異地姻緣。
她和尼泊爾籍丈夫 Melville在印度宣明會做義工時認識，雖然彼此都有着相同的信仰，但這段異地戀來得絕對不容易。「自己嘅生活習慣同佢唔同，文化上差異好大。之前佢知我夜晚出去跑步都會鬧我，佢哋文化上女仔夜晚唔可以出街，要留喺屋企，更何況著背心短褲！慢慢大家知道對方生活習慣唔同，就會融洽好多。」加上 Kirsten父母起初的強烈反對，這對情侶一路走來，跨過種種難關。
兩人於去年八月結婚， Melville為了 Kirsten決定留在香港。目前二人正在計劃成立一個 NGO，於柬埔寨開設一個兒童中心，問她為何始終對印度和柬埔寨情有獨鍾？或許是因為當地人的真誠。「香港愈發達，人情味就愈單薄。有時去到嗰邊（印度､柬埔寨），我反而覺得，啊！呢個就係『家』」
撰文：黃心悅
攝影：韋 平，王 晴
news@nextdigital.com.hk
|
鍾意就快D Share啦！
|
|
|