一名去年結婚的港女，因與奶奶同住，生活上出現磨擦，她覺得奶奶對她不好，老公亦從沒有站在她那一邊，所以受盡委屈。她早前開了一個FB專頁，細說跟奶奶同住的悲哀，引來千多名港女讚好。本刊聯絡上事主，她只肯作文字訪問。以下，是這名港女的自述。
我叫阿美，今年29歲，上年年中結婚既，未有小朋友。我同老公都要返工，我係做文職既。由於我同老公收入唔多，所以就住喺奶奶屋企，一個350呎兩房一廳既細單位。其實我有表達過搬出去住，但老公話自己係單親家庭，奶奶好辛苦湊大佢，所以要一齊住。
同奶奶住當然唔方便啦，首先大家生活習慣唔同，老人家唔多注意衛生，成日去完廁所唔沖水；次次煮完野食，廚房都好似打仗咁，又要我執手尾，但重點係，我冇份食囉，奶奶只係煮俾佢自己同我老公，我覺得自己好似一個外人，甚至係工人。
而好多奶奶都會覺得，新抱一定要服侍奶奶，當然我奶奶都唔例外啦。而且佢會認為，自己個仔返工好辛苦，放工返到屋企就唔應該做家務。咁邊個做呢，咪我囉。大佬呀，我返工都辛苦架。如果老公幫手做，奶奶會即刻黑我面，好難頂。
其實最令我難受既，係每次同老公嗌交，奶奶都會加把嘴。我覺得，呢啲係我地兩公婆既事，奶奶唔應該干涉。就算係出聲，都應該立場中立，而唔係一出聲就話我唔啱，仲要加鹽加醋火上加油，咁樣只會影響我哋夫妻關係。
我曾經上討論區睇過，原來有好多新抱同我經歷一樣，都係同奶奶一齊住，雙方關係好差，生活得唔開心。點解唔將呢的事同老公講？好多男人都唔會明，佢地只會幫住自己阿媽，同佢講只會鬧交收場，無謂啦。
所以我開呢個FB專頁，係想提供一個平台，俾一班有口難言、生活得唔開心既新抱，可以盡情發洩內心既鬱悶，俾大家有機會盡情吐苦水。因為內心既抑鬱如果唔講出黎，好易出現情緒病架。我亦希望透過呢個專頁，令各位新抱能夠搵到同聲同氣既同路人，令大家明白，其實我地會有人支持既。
開呢個FB專頁，當然怕俾老公，以及佢嘅家人知道啦，所以我唔會add老公既家人facebook，奶奶facebook更加唔會add，甚至block埋佢添，同佢講我唔玩faccebook囉，費事有麻煩。
婆媳不和喺香港特別嚴重，歸根究底係居住問題。樓價貴，結婚冇能力搬出去，逼住要同老公家人一齊住。所謂相見好，同住難，始終大家生活習慣唔同，一定會有磨擦。新抱唔係佢哋個女，佢哋一定唔會包容你，只會挑剔你。所以如果當初知道要同奶奶住，我一定唔會結婚囉，就算嫁唔出，我都唔想過呢種生活。
我覺得，當婆媳出現問題時，老公既立埸真係好重要，如果老公肯幫老婆講下說話，起碼奶奶會覺得，自己個仔緊張老婆喎，就唔會樣樣野打橫黎，免得個仔難做。好可惜，我老公好愚孝，就算係佢阿媽唔岩，佢都照幫。久而久之，我奶奶就變得好霸道，因為佢覺得老公都唔幫我，佢更加唔使尊重我啦。所以我更加想開一個facebook專頁，發洩自己同奶奶一齊住既不滿。講起都好嬲呀。
當然，我唔否認會有好錫新抱既好奶奶，可能係我自己唔好彩，遇著一個思想古板，覺得新抱係下人既奶奶。其實，我都試過改善大家之間既關係，盡量去包容對方，但時間過去，愈來愈多唔開心既事發生，我真係唔可以再忍受，所以現在惟一解決雙方關係既方法，就係大家盡量少碰面。例如放假時，會盡量出街或返娘家，希望減少同奶奶衝突。依家最大既心願，係可以同老公搬出去住。
所以我奉勸各位絲打，將來結婚，盡可能同老公搬出去自己住，就算奶奶點好人，一齊住始終會出現問題架。
採訪：程志康
攝影：蔡福生
立即按此連結Download: https://goo.gl/NVySCK
|
鍾意就快D Share啦！
|
|
|