影后惠英紅和亡兄惠天賜同屬武打明星，80年代紅極一時，惠天賜家中排行第四，暱稱小四，父母自幼送他去學京劇，所以他10餘歲就加入影壇，曾參演電影《圓月彎刀》、《英雄無淚》、《倚天屠龍記大結局》等，99年更憑電影《一代梟雄曹操》獲得第三十六屆金馬獎最佳動作指導獎提名。
惠天賜在80年代轉往拍電視，星運平平，及至中年事業走下坡，並轉營開酒吧，惠天賜身形隨之發福。紅姐早年情緒病康復後，她在04、05年復出，做事循序漸進的她病後裝備自己，事業得再創高峯，09年憑電影《心魔》就摘下第46屆金馬獎最佳女配角，之後頻頻拎獎。惠天賜看到妹妹成績不俗，他於12年時突然戲癮大發，於內地接下片約，心急減肥下用錯方法，同年北京猝死，終年55歲，紅姐獲悉哥哥噩耗，馬上飛北京處理其後事。惠天賜離世5年多，紅姐今集悼亡兄。
「我完全接受人係會走嘅，人走我唔覺得有問題，但大家平等，佢嘅理由，我好唔舒服，我上幾日先去北京訪問，我喺北京就唔舒服。」
「佢演藝事業唔順利嗰幾年，去咗開酒吧，因為要睇場陪客，成日要飲酒，佢偶然打電話嚟，我見佢腫就叫佢唔好飲咁多酒，佢話有客嚟搵佢飲。佢婚姻唔係幾好，我哋多咗嘢講，後來佢見我慢慢好，佢又想出番嚟拍嘢，佢喺北京簽咗經理人。我出番嚟時，我係ready晒，做好心理準備，我之前學好多嘢，有做運動令自己好fresh，我認為唔裝備好，永遠唔會有機會。」
「佢最肥時190幾磅，一個月減40幾磅，我知道都好驚，我即刻message佢，又同佢講電話，我提佢咁減法有危機，唔可以求其食兩條芹菜，一隻香蕉，一個蘋果，跟住又去做幾個鐘頭運動，我話一定要睇營養師。佢兩個月就出事，身體虛耗晒，突然所有器官受損，所以坐喺度安詳瞓着咗，就走咗，佢走得安詳係最大福氣，但源自佢想再戰江湖。有時人真係要天時地利人和配合，我比較好運，好多天時地利人和配合，剛有部戲，我就順理成章走番出嚟。」
「記得當年哥哥學完京劇返嚟，佢返嚟屋企住都唔適應，住咗幾個月就搬走，佢去咗做龍虎舞師，當年我喺夜總會跳舞，跟住入行做主角，大家唔係咁close。哥哥猝死，媽咪狀況都唔好，所以到佢走都唔知哥哥死咗，哥哥早年去咗北京好多年，有時一年先返嚟一或兩次。」
「哥哥姐姐自幼離家學戲，八兄弟姊妹唔係一齊成長，細個大家十幾年冇見，過年過節又唔係一定一齊過，有幾個家姐個樣仲幾模糊，及至呢十多年接觸多先成日見，關係好。好朋友都唔需要日日見，大家各自生活，唔代表感情淡，屋企人都一樣，o依家個個結晒婚，得我同阿妹未結，我哋一齊住。以前媽咪在生，我過年一定逐個打電話，硬性叫晒返嚟陪佢，今年就冇，我啲姊姊都有孫，我畀番佢同自己一家團聚。」
「近年見多咗，我係有（凝聚力）㗎，佢哋有尊重我，亦有驚我，我係唔鍾意講美麗說話，當然人與人之間吹水亂講有，成日叫佢哋有錢快買樓。我會一針見血，個個見我會雞飛狗走，寧願約妹妹都唔約我，佢哋又怕同我出街，我冇化妝要戴口罩，鬼鬼祟祟。」
撰文：比華利
攝影：林德雄
攝錄：葉君海
髮型：James Lee＠HAiR
化妝：littlewhite
場地：金公館
|
鍾意就快D Share啦！
|
|
|