盧宛茵做野蠻奶奶，同新抱Ali或者親家陳秀珠對著幹，搞到家嘈屋閉固之然好睇。不過，佢嘅身份係奶奶，同時亦係媽媽。除咗負責強調婆媳糾紛，亦話俾大家聽，特別係做仔女嘅，多啲關心一下年老嘅長輩，其實佢哋好寂寞、好需要關心同愛架。
睇《BB來了》，Madam盧絕對係錦上添花、畫龍點睛嘅存在。不過原來Madam盧奶奶呢個角色，除咗負責「鬧劇」，亦肩負溫情教化重任。事關喺第6集入面，睇得出Madam盧其實好易氹、好易教。平時不可一世、高高在上嘅西太后嘴臉，只係無人教又無人提而養成嘅闊太習性，並唔係有惡意，只要好似陪月員阿妙（楊卓娜飾）咁適當引導下佢、指點下佢，佢就會乖乖聽話改善。其實大家家中長輩都係咁，好似好㒼塞好多陋習講唔聽，但係大家又有無嘗試俾耐性去傾去講呢？
另外，好多長輩同Madam盧一樣，表面睇落精神無事，鬧起人上嚟更中氣十足，又不時約埋啲三姑六婆飲茶講是非，但私底下其實又凍又寂寞。尤其係老伴唔喺身邊，仔女大晒有自己生活，就算返到屋企都鎖門匿喺房。嗰種叫天不聞嘅感覺，真係睇見都鼻酸。之後仲有Madam盧睇返兩個仔細個啲錄影帶呢一幕，應該睇喊唔少觀眾，亦會令唔少為人子女嘅反思。
不得不讚新監製廖晉碩，《BB來了》雖然係小本製作，但由劇本到選角都相當出色、吸引，而且貼地，起碼啲角色係平民公屋戶就真係有返間公屋樣俾觀眾睇，唔再係人人住大屋。難怪首集收視有29.3點，成為截至現時為止，本年度第一集最高收視嘅劇集。
請參與壹週刊大獎賞活動！有機會贏取郵輪假期 、名牌腕錶、4K超高清電視或金箔護膚品，仲有機會同陶傑共晉晚餐添！
即按：http://bit.ly/Appinstall18
立即按此連結下載APP：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|