藝人簡淑兒（Jessica）正在拍無綫劇《C9特工》，劇中她飾演一位完美女神，被朱敏瀚飾演的「廢青」追求。但她覺得這個女神太過無懈可擊，很難演。
前男友嫌棄
拍過四次拖的她，在過往的男友心目中都不是女神，她說：「覺得呢個世界係冇呢個人（女神）存在，冇乜人做到女神，我好多缺點，大頭蝦、硬頸，又唔夠小鳥依人，之前嘅男友投訴過我太獨立兼成日玩失蹤，我一做嘢就好投入，會幾個鐘頭唔睇電話，有時同朋友出去，我都唔會睇電話，覺得要尊重朋友，正如我唔鍾意朋友同我一齊時成日睇住電話一樣，搵唔到我，就畀人感覺失蹤，要男朋友體諒。」她更對數字完全不能上心，男友的中文名和電話號碼也記不入腦，最誇張一次是試過忘記當時男友的生日，遲了三天才為對方慶祝，令對方大惑不解。
想同男友共患難
劇中她被「廢青」朱敏瀚追求，現實中無事業無錢的男人若向她追求，可會接受？她說：「我接受到男仔未有事業，但係接受唔到無上進心，搵唔到錢同無能力搵錢係兩樣嘢，好多人要時間建立事業，窮唔緊要，窮得嚟要有上進心，我可以喺身邊支持，陪你捱過，但如果連上進心都無，呢啲接受唔到。」她續說：「記得有人同我講過，你同一個人經歷成長，好過你喺佢成長咗之後先識得佢，無為佢付出過，無同佢捱過，感情係無咁深厚。」不過笑言陪着成長的過程定會好痛苦：「好彩我仲有能力照顧自己。」
拒絕與圈內人拍拖
透露現時單身的Jessica，承認有人追，是圈外人，她覺得與圈外人拍拖是很難，但更不喜歡與圈內人拍拖，她説：「首先圈外人好難接受我嘅工作時間，之前朋友話我係一個幾難愛嘅人，意思係同我拍拖要接受我好多嘢，要接受我同其他異性有親熱戲，呢個都唔係個個男仔接受到，出街唔可以太高調，佢又會變咗半個公眾人物，預咗畀人起底。雖然圈內人係會容易體諒啲，但我唔鍾意娛樂圈嘅男仔，覺得佢哋比較自戀，兩個都係藝人，太高調，自己唔係咁鍾意。」（有冇圈內人追過你？）咁又冇，自己唔會畀Signal人哋，收工就收工，不過好多男仔初初識我時，會幾驚我，佢哋話我唔講嘢個樣好Cool，寸寸地，識咗我之後先知道我係儍嘅。」
拍拖一定要父母接受
她說喜歡暖男系、好脾氣的男仔，揚言拍拖先要過父母一關：「呢個一定，因為我好緊張屋企，父母唔喺香港，唔想佢哋隔個海嚟擔心我，依家擔心我無拖拍，唔想我拍拖都擔心，想佢哋見到我拍拖係安心，我就開心。」曾試過知道父母不喜歡她另一半，令她不敢帶男友見家長，但已有預感遲早分手。
被初戀男友劈腿
近日忙於宣傳新歌《謝謝你傷過我》，坦言是自己的戀愛真經歷，由識於微時的鄺俊宇作曲和填詞，她說：「佢成日覺得我畀到人治療情傷嘅感覺，所以搵我唱，可能覺得我鍾意笑，望住我就開心番，希望我唱得出治療人心嘅效果。佢初初問我改呢個歌名好唔好，我聽落覺得歌名好似有啲說話，好似同前度講：『好多謝你傷過我』，我真係有講過類似嘅說話，當時發覺初戀男友劈腿，仲唔止一個，就係呢個男仔令我成長咗好多，一夜成長。」
髮型:Daniel Cheng @ Salon Amarone
場地:The Stadium
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|